ވިލިމާލޭގައި އަންނަ އަހަރު ބާރަސަތޭކަ މީހުންގެ ޖާގައިގެ ސްޕޯޓްސް ކޮމްޕްލެކްސްއެއް ތަރައްޤީކުރުމުގެ މަސައްކަތް ފެށުމަށް ސަރުކާރުން ނިންމަވައިފިއެވެ. މާލޭގެ ރައްޔިތުންނާ ބައްދަލުކުރުމުގެ ޕްރޮގްރާމްގެ ތެރެއިން ވިލިމާލޭ ރައްޔިތުންނާ ބައްދަލުކުރައްވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އިންޑޯ ކުޅިވަރުތައް ކުޅެވޭގޮތަށް މި މަރުކަޒު ތަރައްޤީކުރާނެ ކަމަށެވެ.
ރައީސް ވިދާޅުވީ މުޅި ރާއްޖޭގައި ޒުވާނުންނަށް ކުޅިވަރުގެ ވަސީލަތްތައް ގާއިމުކޮށްދެއްވުމަކީ ސަރުކާރުގެ މުހިންމު ސިޔާސަތެއްކަމަށާއި، ބޮޑު އާބާދީއެއް ދިރިއުޅޭ ވިލިމާލޭގައި ކުޅިވަރު ކުޅެވޭނެ ވަސީލަތްތައް ބިނާކުރަންޖެހޭ ކަމަށެވެ. އަންނަ އަހަރު ހިންގާނެ އެންމެ ބޮޑު މަޝްރޫއެއްގެ ގޮތުގައި މި ސްޕޯޓްސް ކޮމްޕްލެކްސް ތަރައްޤީކުރާނެކަމަށް ރައީސް ވިދާޅުވިއެވެ.
މީގެ އިތުރުން ވިލިމާލޭގައި މިހާރު އޮތް ފުޓްބޯޅަ ދަނޑު ފީފާ ފެންވަރުގެ ސްޓޭޑިއަމަކަށް އަޕްގްރޭޑްކުރުމަށް ކުރަންޖެހޭ ހުރިހާ ކަމެއް ކޮށްދެއްވާނެކަމަށްވެސް ރައީސް ވިދާޅުވިއެވެ. ކުޅިވަރުގެ ދާއިރާއިން އަތޮޅުތެރެއާއި މާލޭގައި މުހިންމު މަޝްރޫއުތައް ކުރިޔަށްގެންދިއުމަށް ބަޖެޓުގައި ހިމަނުއްވާފައިވާކަން ރައީސް ފާހަގަކުރެއްވިއެވެ.
ކޮމެންޓު ފޮނުވާ