ވިލިމާލޭގައި ސަތޭކަ އެނދުގެ ޓާޝަރީ ހޮސްޕިޓަލެއް އެޅުމަށް ހުރިހާ އިންތިޒާމެއް ހަމަޖެހިފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ވިލިމާލޭ ރައްޔިތުންނާ މިރޭ ބައްދަލު ކުރައްވައި ރައީސް ވިދާޅުވީ ޗައިނާގެ ހިލޭ އެހީގެ ދަށުން ކުރިޔަށްދާ މި ހޮސްޕިޓަލްގެ އަމަލީ މަސައްކަތް އަވަހަށް ފެށޭނެކަމަށާއި ފަންޑިންގެ އެއްވެސް މައްސަލައެއް ނެތްކަމަށެވެ.
ރައީސް ފާހަގަކުރެއްވި ގޮތުގައި ރިޔާސީ އިންތިހާބުގައި ވިލިމާލޭ ރައްޔިތުންނަށް ވެވަޑައިގެންނެވި ވައުދުތަކުގެ މަތީން ހަނދާން ނައްތާލާފައި ނުވާނެއެވެ. ހޮސްޕިޓަލްގެ މަސައްކަތް ފެށުމުގެ ކުރިން މިހާރު ހުރި ހޮސްޕިޓަލް ވަގުތީ ގޮތުން އެހެން ތަނަކަށް ބަދަލުކުރުމުގެ މަސައްކަތް މާލެ ގްރޫޕް އޮފް ހޮސްޕިޓަލްސްގެ ފަރާތުން ކުރިޔަށް ގެންދާނެކަމަށް ރައީސް ވިދާޅުވިއެވެ.
ވިލިމާލޭގެ މަގުތައް ތަރައްގީކުރުމުގެ މަސައްކަތް ވެސް ޗައިނާ ހިލޭގެ އެހީގެ ދަށުން ކުރިޔަށް ގެންދަވާނެކަމަށް ރައީސް ވަނީ ހާމަކުރައްވާފައެވެ. މަގު ހެދުމުގެ ކުރިން ފެނާއި ނަރުދަމާ އަޕްގްރޭޑް ކުރުމުގެ މަސައްކަތް ކުރިޔަށްދާނެކަމަށް ވިދާޅުވިއެވެ.
މީގެއިތުރުން، 1200 މީހުންގެ ޖާގައިގެ ސްޕޯޓްސް ކޮމްޕްލެކްސްއެއް ވިލިމާލޭގައި އަންނަ އަހަރު އެޅުމަށް ނިންމައި، ފުޓްބޯޅަ ދަނޑު ފީފާ ސްޓެންޑަޑަށް އަޕްގްރޭޑް ކުރުމަށް ހަމަޖެހިފައިވާކަމަށް އެމަނިކުފާނު ވިދާޅުވިއެވެ. ރައީސް ވިދާޅުވީ ވިލިމާލެއަކީ މާލޭ ސިޓީގެ އެއްބައި ކަމަށާއި، އެރަށާ މެދު ތަފާތުކުރުން ގެންގުޅެން ޖެހޭކަމަށް ގަބޫލު ނުކުރައްވާކަމަށެވެ.
ކޮމެންޓު ފޮނުވާ