ރޭ މާލޭގައި އެމްޑީޕީން ބާއްވާފައިވާ މުޒާހަރާއިގެ ބައިވެރިން މަގުމައްޗަށް ނިކުމެ އެއްވުން ކުރިއަށް ގެންދިއުމަކީ ފުލުހުންނާއި ކުރިން މަޝްވަރާކޮށް އެއްބަސްވެވިފައިވާ ގޮތާ ހިލާފުކަމެއްކަމަށް ފުލުހުން ބުނެފިއެވެ. ފުލުހުން ނެރުނު ބަޔާނެއްގައި ވަނީ އެއްވުމުގެ ބައިވެރިން މަޖީދީމަގުން ދިއުމަށް މަސައްކަތްކުރުމުން އެ މަގުން އެއްވުން ކުރިއަށް ނުގެންދެވޭނެކަމަށާއި ކުރިން އެއްބަސްވި ގޮތަށް ކުރިއަށް ގެންދިއުމަށް ނަސޭހަތްތެރިވެ އިލްތިމާސްކޮށްފައިވާކަމަށް ބުނެފައެވެ.
އެހެންނަމަވެސް އެއްވުމުގެ ބައިވެރިން އެގޮތަށް އަމަލުނުކޮށް ފުލުހުންނާ ކުރިމަތިލައި، މަގު ބަންދުކުރުމަށް ބޭނުންކުރާ ބެރިކޭޑް ނަގައި އެއްލާލާފައިވާކަމަށް ބަޔާނުގައިވެއެވެ. އަދި ގާނޫނު ތަންފީޒުކުރުމުގެ ގޮތުން އެއްވުންތައް ހުއްޓުވައި ކޮންޓްރޯލްކުރުމަށް ފުލުހުން ބޭނުންކުރާ ޝީލްޑެއް ނަގައި ބައިވެރިން ގާނޫނާ ހިލާފު ހަރަކާތްތަކެއް ހިންގާފައިވާކަމަށް ފާހަގަކޮށްފައިވެއެވެ.
ފުލުހުން ބުނީ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނުގައި ބަޔާންކޮށްފައިވާ ސުލްހަވެރި އެއްވުމެއްގެ ސިފަ އެއްވުމުގެ ބައިވެރިންގެ އަމަލުތަކުން ގެއްލިފައިވާކަމަށާއި، މާލޭގައި އެއްވުންތައް ބޭއްވޭނީ މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން ކަނޑައަޅައި އާންމުކޮށްފައިވާ ތަންތަނުގައި އެކަނިކަމަށާއި، ފުލުހުންގެ ލިޔުންކިޔުން ހުއްދަ ނެތި އެހެން ސަރަހައްދުތަކުގައި އެއްވުން ނުބޭއްވޭނެކަމަށެވެ. މުޒާހަރާގެ ބައިވެރިން މި ގާނޫނާ ހިލާފަށް މުޒާހަރާ ކުރިއަށް ގެންދިއުމަށް މަސައްކަތްކުރުމުން ގާނޫނު ނެގެހެއްޓުމުގެ ގޮތުން ނަސޭހަތާއި އިންޒާރު ދީފައިވާކަމަށާއި، އެއަށްފަހު އެއްވުން ހުއްޓުވުމުގައި ގާނޫނު ހުއްދަކުރާ ބާރުގެ ބޭނުން ކެތްތެރިކަމާއި ޕްރޮފެޝަނަލްކަމާއެކު ކޮށްފައިވާނެކަމަށް ފުލުހުން ބުނެފައިވެއެވެ.
ކޮމެންޓު ފޮނުވާ