ސްޓެލްކޯގެ މެނޭޖިން ޑިރެކްޓަރުގެ މަގާމުން ހުސައިން ފަހްމީ މިއަދު ވަކިކުރައްވައިފިއެވެ. ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މި ނިންމުން އިއުލާނުކުރުމާ ގުޅިގެން، ފަހްމީ ވަނީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒަށް ޝުކުރު އަދާކުރައްވާ ޕޯސްޓެއް ސޯޝަލް މީޑިއާގައި ކުރައްވާފައެވެ.
27 އަހަރުގެ ދިގު މުއްދަތެއްގައި ސްޓެލްކޯގެ އެކި މަޤާމުތަކުގައި ޚިދުމަތް ކުރެއްވި ފަހްމީ، އޭނާގެ ޕޯސްޓްގައި ވިދާޅުވީ މެނޭޖިން ޑިރެކްޓަރުގެ މަޤާމު ހަވާލުކޮށް ކުންފުނި ހިންގުމުގެ ފުރުޞަތު ދެއްވިކަމަށްޓަކައި ރައީސަށް ޚާއްޞަ ޝުކުރެއް އަދާކުރައްވާ ކަމަށެވެ. މީގެ އިތުރުން ސްޓެލްކޯގެ ކާމިޔާބީތަކަކީ ކުންފުނީގެ ވެރިންނާއި މުވައްޒަފުންގެ ގުޅިގެންކުރި މަސައްކަތުގެ ނަތީޖާއެއްކަން ފާހަގަކުރައްވާ، ހުރިހާ މުވައްޒަފުންނަށް ވެސް ޝުކުރު އަދާކުރެއްވިއެވެ.
ކުންފުންޏަށް ކުރިމަގުގައި އިތުރު ކުރިއެރުންތަކާއި ކާމިޔާބީތައް ލިބިގެންދިއުމަށް އެދިވަޑައިގަންނަވާކަން ވެސް ފަހްމީ ފާހަގަކުރެއްވިއެވެ.
ފަހްމީ ވަކިކުރެއްވި މި ވަގުތަކީ، މާލޭގެ ކަރަންޓް ޚިދުމަތުގައި ދަތިތަކާ ކުރިމަތިލާންޖެހިފައިވާ ވަގުތެއްކަން ފާހަގަ ކޮށްލެވެއެވެ. ޚާއްޞަގޮތެއްގައި މާލެ ސަރަހައްދުން ކަރަންޓް ކެނޑޭ މައްސަލަ ފަހަކަށް އައިސް އިތުރުވެފައިވެއެވެ. މި އަހަރުގެ ޖޫން މަހުގެ 1 ވަނަ ދުވަހު މުޅި މާލެ ސަރަހައްދުން ކަރަންޓް ކެނޑި، ބޮޑު ދަތިތަކާ ކުރިމަތިލާން ޖެހުނެވެ. އެ ހާދިސާއާ ގުޅިގެން މިނިވަން ތަހުޤީޤެއް ހިންގައި، އިހުމާލެއް ހުރިތޯ ބެލުމަށް ރައީސުލްޖުމްހޫރިއްޔާ ވަނީ ކަމާބެހޭ އިދާރާތަކަށް އަންގަވާފައެވެ.
ކޮމެންޓު ފޮނުވާ