ސްޓޭޓް އިލެކްޓްރިކް ކޮންޕެނީ ލިމިޓެޑް (ސްޓެލްކޯ) ގެ ހުރިހާ ކަސްޓަމަރުންނަށް މިއަހަރުގެ ސެޕްޓެމްބަރު މަސް ނިމުމުގެ ކުރިން ސްމާޓް މީޓަރުގެ ޚިދުމަތް ފޯރުކޮށްދިނުމަށް އަމާޒުކުރާކަމަށް އެ ކުންފުނީގެ މެނޭޖިން ޑިރެކްޓަރ ޙުސައިން ފަހުމީ ހާމަކުރައްވައިފިއެވެ.
ޕީއެސްއެމް ނިއުސްއަށް ދެއްވި ޚާއްޞަ އިންޓަރވިއުއެއްގައި ވާހަކަފުޅު ދައްކަވަމުން ފަހުމީ ވިދާޅުވީ، ސްމާޓް މީޓަރު ހަރުކުރުމުގެ ޕައިލެޓް ޕްރޮޖެކްޓް ކާމިޔާބުކަމާއެކު ނިންމާލުމަށްފަހު، ހުޅުމާލޭގެ ދެވަނަ ފިޔަވަހީގައި މި މަސައްކަތް މިހާރު ފުރިހަމަކޮށް ނިމިފައިވާކަމަށެވެ.
"އަޅުގަނޑުމެން މިވަގުތު ހުޅުމާލޭގެ ސެކަންޑް ފޭސްގައި ސްމާރޓް މީޓަރުތައް އިންސްޓޯލްކުރުމުގެ މަސައްކަތް އެއްކޮށް ނިންމާލާފައި މިވަނީ. މިއަހަރުގެ ސެޕްޓެމްބަރުމަހުގެ ތެރޭގައި އަޅުގަނޑުމެންގެ އެންމެހާ ކަސްޓަމަރުންނަށް ސްމާރޓް މީޓަރުގެ ޚިދުމަތް ލިބޭނެގޮތް ހަމަޖެއްސުމަށް މަސައްކަތްކުރަމުން މިދަނީ،" ފަހުމީ ވިދާޅުވިއެވެ.
ސްމާޓް މީޓަރު ޕްރޮޖެކްޓާއެކު ތަޢާރަފުކުރާ ސްމާޓް އެޕްލިކޭޝަނުން ކަސްޓަމަރުންނަށް ލިބޭނެ ފަސޭހަތަކުގެ ތަފްޞީލު ދެއްވަމުން ފަހުމީ ވިދާޅުވީ، މި އެޕްލިކޭޝަން މެދުވެރިކޮށް ކަރަންޓު ބޭނުންކުރާ މިންވަރު ލައިވްކޮށް ބެލޭނެކަމަށާއި، ގަޑިއަކު، ދުވަހަކު އަދި ހަފްތާއަކު ކަރަންޓު ބޭނުންކުރާ މިންވަރު ތަފްޞީލުކޮށް ފެންނާނެކަމަށެވެ.
"ކޮންމެ ކަސްޓަމަރަކަށްވެސް އެމީހެއްގެ ފޯނުން މީޓަރު ލައިވްކޮށް ބަލާލެވޭނެ. މީޓަރަށް އަރާ އަދަދު ގަޑިން ގަޑިއަށް ފެންނާނެ. މިކަމުގެ ސަބަބުން ކަސްޓަމަރުންނަށް ކަރަންޓު އިޤްތިޞާދުކޮށް، ޚަރަދު ކުޑަކުރުމަށް މަގުފަހިވެގެންދާނެ،" އޭނާ ފާހަގަކުރެއްވިއެވެ.
މި އެޕްލިކޭޝަނުން ލިބޭނެ އިތުރު ފަސޭހަތަކުގެ ތެރޭގައި އެއްފަހަރާ ގިނަ ބިލުތަކަށް ފައިސާ ދެއްކުމުގެ ފަސޭހަކަމާއި، ސްޓެލްކޯ ކެއަރ މެދުވެރިކޮށް ކަސްޓަމަރ ސަރވިސް މުވައްޒަފުންނާ ސީދާ މުޢާމަލާތުކުރުމުގެ ފުރުޞަތު ހިމެނޭކަމަށް ފަހުމީ ވިދާޅުވިއެވެ.
ޤައުމީ ތަރައްޤީގައި މުހިންމު ދައުރެއް އަދާކުރާ ކުންފުންޏެއްގެ ގޮތުގައި ސްޓެލްކޯއިން ކަސްޓަމަރުންގެ އިތުބާރު ހިފެހެއްޓުމަށް ޒަމާނީ ޓެކްނޮލޮޖީ ބޭނުންކޮށްގެން ފުރިހަމަ ޚިދުމަތް ފޯރުކޮށްދިނުމަށް ކުރިއަށްވެސް މަސައްކަތްކުރަމުންދާނެކަމަށް ފަހުމީ ޔަޤީންކަން ދެއްވިއެވެ. މި މަސައްކަތުގައި ސަރުކާރާއި، ޚާއްޞަކޮށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތުން ލިބެމުންދާ އެއްބާރުލެއްވުމަށް ސްޓެލްކޯގެ ފަރާތުން ޝުކުރު އަދާކުރައްވާކަމަށްވެސް އޭނާ ވިދާޅުވިއެވެ.
ކޮމެންޓު ފޮނުވާ