ޑޮމެސްޓިކް ކެޓެގަރީގެ ކަރަންޓު ޓެރިފް ރޭޓްތައް ކުޑަކުރުމަށް ރައީސް ޑރ. މުހައްމަދު މުއިއްޒު ނިންމެވުމަކީ ރައްޔިތުންގެ އިހުސާސްތަކާ އެއްގޮތަށް ހިންގާ ހެޔޮލަފާ ވެރިކަމެއްގެ ހެއްކެއް ކަމަށް ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެއެވެ.
ޖޫން 1 ވަނަ ދުވަހުން ފެށިގެން ކަރަންޓު ރޭޓްތައް ކުޑަކުރުމަށް ރައީސުލްޖުމްހޫރިއްޔާ ނިންމެވި ނިންމެވުމަކީ ކުރީގެ އެއްވެސް ސަރުކާރަކުން ކުރަން ކެރިފައިނުވާ ކަމެއްކަމަށް ފަހުމީ ފާހަގަކުރެއްވިއެވެ. މި ނިންމެވުން ތަންފީޒުކުރުމަށް ދެމެހެއްޓެނިވި ގޮތެއްގައި މަސައްކަތްކުރުމަށް ކަމާބެހޭ ފަރާތްތަކަށް ރައީސް އަންގަވާފައިވާ ކަމަށްވެސް އޭނާ ވިދާޅުވިއެވެ.
ރައްޔިތުންގެ މާލީ ބުރަ ލުއިކުރުމަށްޓަކައި ދިގު މުއްދަތެއް ވަންދެން ބޭނުންކުރަމުން އައި ކަރަންޓުގެ ޓެރިފްތަކަށް ބަދަލުގެނެސްދެއްވި ކަމަށްޓަކައި ރައީސަށް އިހްލާސްތެރިކަމާއެކު ޝުކުރު އަދާކުރައްވާކަމަށް ފަހުމީ ވިދާޅުވިއެވެ.
އާ އުސޫލުގެ ދަށުން ކަރަންޓު ރޭޓްތަކަށް ގެނެވޭ ބަދަލުތަކުގައި 0-100 ޔުނިޓު ބޭނުންކުރާ ފަރާތްތަކަށް މިހާރު ނަގާ 1.50 ރުފިޔާ 1.25 ރުފިޔާއަށް ދަށްވާނެއެވެ. 101-200 ޔުނިޓުގެ ބޭންޑުގައި 1.70 ރުފިޔާގެ ބަދަލުގައި 1.50 ރުފިޔާ ނެގޭނެއެވެ. 201-300 އަދި 301-400 ޔުނިޓުގެ ބޭންޑުތަކުގައި މިހާރު ނަގާ 2.15 އަދި 2.50 ރުފިޔާގެ ބަދަލުގައި 1.50 ރުފިޔާ ނެގޭނެއެވެ.
401-500 ޔުނިޓުގެ ބޭންޑުގައި 2.95 ރުފިޔާގެ ބަދަލުގައި 2.66 ރުފިޔާ ނެގޭނެ އިރު، 501-600 ޔުނިޓުގެ ބޭންޑުގައި 3.55 ރުފިޔާގެ ބަދަލުގައި 3.20 ރުފިޔާ ނެގޭނެއެވެ. 600 ޔުނިޓަށްވުރެ މަތީ ބޭންޑުގައި 4.25 ރުފިޔާގެ ބަދަލުގައި 3.83 ރުފިޔާ ނެގޭނެއެވެ.
މި ސަރުކާރުގެ ފުރަތަމަ ދައުރުގައި ވޭތުވެދިޔަ ދެ ރަމަޟާން މަހުގައިވެސް ކަރަންޓު ބިލްތަކުން ޑިސްކައުންޓް ދީފައިވާކަމާއި، ވަކި މިންވަރެއް މާފުކޮށްދީފައިވާކަން ފާހަގަކުރެވެއެވެ. މީގެ އިތުރުން ޑޮމެސްޓިކް ރޭޓުގައި ހުންނަ ގޭބިސީތަކުގެ ކަރަންޓު ބިލާއި ފެން ބިލުތައް ނުދެއްކި ގިނަދުވަސްވެގެން އަރާފައިވާ ޖޫރިމަނާވެސް ސަރުކާރުން ވަނީ މާފުކޮށްދީފައެވެ.
ފާއިތުވި ރޯދަމަހުގެ ކަރަންޓު ބިލްތަކަށް ދިން ޑިސްކައުންޓުގެ އިތުރުން، ހޫނު ގަދަވުމުގެ ސަބަބުން ކަރަންޓު ބޭނުންކުރި މިންވަރު އިތުރުވެފައިވާތީ، އޭގެ ފަހުން އައި މަހުގައިވެސް ގޭބިސީތަކުގެ ކަރަންޓު ބިލްތަކަށް ސަރުކާރުން ލުޔެއް ދީފައިވާކަން ފާހަގަކުރެވެއެވެ.
ކޮމެންޓު ފޮނުވާ