ކަރަންޓް އިޤްތިޞާދު ކުރުމަށް ސްޓެލްކޯއިން އިލްތިމާސް ކޮށްފި

ރާއްޖެއަށް މިދުވަސްވަރަކީ ހޫނުގަދަ ދުވަސްވަރަކަށް ވާތީ، ކަރަންޓް އިޤްތިޞާދު ކުރުމަށް ސްޓެލްކޯއިން އިލްތިމާސްކޮށްފިއެވެ.

ސްޓެލްކޯގެ މެނޭޖިންގ ޑިރެކްޓަރު ހުސައިން ފަހްމީ މިއަދު ވިދާޅުވީ، ރާއްޖެއަށް މިއީ ހޫނުގަދަ ދުވަސްވަރަކަށްވާތީ އިޙްސާސްކުރެވޭ ހޫނުމިން މަތިވަމުންދާ ކަމަށެވެ. އެހެންވެ އެންމެން ވެސް ކަރަންޓު ބޭނުންކުރުމުގައި ޚާއްޞަ ސަމާލުކަމެއް ދިނުމަކީ ވަރަށް މުހިންމު ކަމެއް ކަމުގައި އޭނާ ވިދާޅުވެފައިވެއެވެ.

"ޚާއްޞަކޮށް އޭސީ ފަދަ ތަކެތި ބޭނުންކުރާއިރު އޭގެ ފިނިކަން 25 ޑިގްރީއަށްވުރެ ދަށް ނުކުރުމަށާއި ކޮންމެހެން ބޭނުންވާ މިންވަރަށް މެނުވީ ކަރަންޓު ބޭނުން ނުކުރުމަށް އިލްތިމާސް ކުރަން،" ފަހްމީ ވިދާޅުވިއެވެ.

ފަހްމީ ވިދާޅުވި ގޮތުގައި މި އަހަރުގެ މިހާތަނަށް މާލެ ސަރަޙައްދުގައި އެންމެ ގިނައިން ކަރަންޓު ބޭނުންކޮށްފައިވަނީ މިދިޔަ ބުރާސްފަތި ދުވަހުއެވެ. އެގޮތުން އެ ދުވަހުގެ 15:00 ގައި 114 މެގަވޮޓްގެ ކަރަންޓު ބޭނުންކޮށްފައިވެއެވެ. އަދި މިއަދުގެ 13:00 ގައި މާލޭގެ ލޯޑް ހުރީ 111 މެގަވޮޓްގައި ކަމަށް ފަހްމީ ވިދާޅުވިއެވެ.

"އެހެންކަމުން އަޅުގަނޑުމެން އެންމެން މިކަމަށް ސަމާލުވެ، ފަރުދީގޮތުން ކަރަންޓު އިޤްތިޞާދު ކުރުމަށް ކުރެވެންހުރި މަސައްކަތްތައް ކޮށްދިނުމަކީ މުޖުތަމަޢުއާއި އަމިއްލަ ލާބައާއި މަންފާއަށް ކުރެވޭ ވަރަށް މުހިންމު ކަމެކެވެ. ކަރަންޓު ހެޔޮގޮތުގައި ބޭނުންކޮށް، އިސްރާފު ނުކުރުމަށް އަޅުގަނޑުމެން އެންމެން ވެސް މަސައްކަތް ކުރަމާ،" ފަހްމީ ވިދާޅުވިއެވެ.