ފިތުރު އީދުގެ މުނާސަބަތުގައި އެމްއެންޑީއެފް، ފުލުހުން އަދި ސަރުކާރު ހިއްސާވާ ކުންފުނިތައް ގުޅިގެން ބޭއްވި "އީދު ހަވީރު" ހަރަކާތަށް ގިނަ ރައްޔިތުންގެ ތަރުހީބު ލިބިފައިވެއެވެ. ސަލްޓަން ޕާކާއި ޖުމްހޫރީ މައިދާން ސަރަހައްދުގައި ބޭއްވުނު މި ހަރަކާތަށް ރައީސް މުހައްމަދު މުއިއްޒުގެ ދެކަނބަލުން ވެސް ވަޑައިގެން ހަވީރުގައި ބައިވެރިވި ކުޑަކުދިންނާ ސަލާމްކުރައްވައި، ފޮޓޯ ނަންގަވާފައިވެއެވެ.
މި ހަވީރުގެ ތެރެއިން ކުޑަކުދިންނަށް އެމްއެންޑީއެފްގެ ހަތިޔާރުތަކާއި ފުލުހުންގެ ވެހިކަލްތައް ބަލައިލުމުގެ ފުރުސަތު ލިބި، އެ ތަކެއްޗާއެކު ފޮޓޯ ނެގުމުގެ ފުރުސަތު ވެސް ލިބިގެންދިޔައެވެ. އަދި ތިންހަމަ، އަންބަލަން، އޮށްވަޅުގޮނޑި އަދި ފަސްއޮށް ފަދަ ދިވެހި ސަގާފީ ކުޅިވަރުތަކުގެ އިތުރުން ކުޑަކުދިން ގަޔާވާނެ ޒަމާނީ ކުޅިވަރުތަކާއި ގޭމުތައް ވެސް ކުރިއަށް ގެންދެވުނެވެ. އީދާ ގުޅުވައިގެން ކުރިއަށްގެންދިޔަ ހަވީރުގެ ސްޓޯލުތަކުގައި ކުޑަކުދިންނަށް ކަމުދާ ކާޓޫނު ކެރެކްޓަރުތައް ވެސް ހިމަނާފައިވެއެވެ.
ފާހަގަކޮށްލެވޭ ގޮތުގައި، މިއަދު މާލޭގައި ކުޑަކުދިންގެ ހަވީރު ބޭއްވުނުއިރު، ހުޅުމާލޭގައި މިރޭ ޑްރޯން ޝޯއަކާއެކު ހަވާއެރުވުމުގެ ހަރަކާތެއް ކުރިއަށްދާނެކަމަށް ވެސް އަންގާފައިވެއެވެ.
