ދެ ލޯންޗެއް ޖެހިގެން ހިނގި އެކްސިޑެންޓެއްގައި މީހަކު ނިޔާވި މައްސަލައިގައި ދެ މީހެއްގެ މައްޗަށް ދަޢުވާކުރުމަށް ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވެއެވެ.
މި އެކްސިޑެންޓް ހިނގާފައިވަނީ 2023 އޭޕްރީލް 29 ވަނަ ދުވަހުގެ 16:42 ހާއިރު "ސަސް އީ ސްޕީޑް" އަދި "އެމްޑަބްލިޔުއެސްސީ މެރިން 2″ ނަމަކަށް ކިޔާ ދެ ލޯންޗު ޖެހިގެންނެވެ. މި އެކްސިޑެންޓުގައި އެއް ލޯންޗެއްގައި ދަތުރުކުރި 52 އަހަރުގެ ފިރިހެނަކަށް ލިބުނު އަނިޔާތަކަށް އޭޑީކޭ ހޮސްޕިޓަލުގައި ފަރުވާދެމުން ދަނިކޮށް އެދުވަހުގެ 18:15 ހާއިރު ވަނީ ނިޔާވެފައެވެ.
ފުލުހުންގެ ފަރާތުން މި މައްސަލައިގެ ތަޙުޤީޤު ނިންމައި، ޖިނާއީ ދަޢުވާ ކުރުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ފުރަތަމަ ފަހަރަށް ފޮނުވާފައިވަނީ 2023 ޖޫން 4 ވަނަ ދުވަހުއެވެ. ނަމަވެސް، މައްސަލަ އިޞްލާޙުކުރުމަށް އަނބުރާ ފޮނުވުމާ ގުޅިގެން، ދެވަނަ ފަހަރަށް މި މަހުގެ 15 ވަނަ ދުވަހު ވަނީ އަލުން ހުށަހަޅާފައެވެ.
މި މައްސަލައިގައި ދަޢުވާކުރުމަށް ހުށަހަޅާފައިވަނީ އެދުވަހު އެކްސިޑެންޓް ހިނގި ވަގުތު އެ ދެ ލޯންޗު ދުއްވަން ތިބި ދެ މީހުންގެ މައްޗަށެވެ. އެއީ ކ. ކާށިދޫ / ހީނާވިލާގެ 35 އަހަރުގެ ޔާނިސް ޙަމީދު އާއި ހދ. ނޮޅިވަރަން / ގްރީންހައުސްގެ 43 އަހަރުގެ މުޙައްމަދު ޖަމީލެވެ.
