ފުލުހުންގެ ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނެއްގައި ހެންވޭރު ގެއަކުން ފެނުނު ބަނގުރަލާއެކު ހައްޔަރުކުރެވުނު ސްރީލަންކާގެ ދެ ރައްޔިތަކު ޑީޕޯޓްކުރުމަށް މޯލްޑިވްސް އިމިގްރޭޝަނާ ހަވާލުކޮށްފިއެވެ.
މި މަހުގެ 5 ވަނަ ދުވަހު ހިންގުނު އޮޕަރޭޝަނުގައި ހައްޔަރުކުރެވުނީ 27 އަހަރުގެ ޕައްޓި ވިތަނަލަގެ ވިމޯޝާ ވިނަތަގެ އާއި 21 އަހަރުގެ ނުރުކުޝާން ކަވިންދަ ސިންގަޕުރަގެ އެވެ. ފުލުހުން މައުލޫމާތު ދެއްވާފައިވާ ގޮތުގައި، ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ކޯޓު އަމުރެއްގެ ދަށުން އެ ދެ މީހުން ދިރިއުޅޭ ގެ ބަލައި ފާސްކުރިއިރު، ބަނގުރާ ކަމަށް ބެލެވޭ 500 އެމްއެލްގެ 116 ފުޅިއާއި 5 ލީޓަރުގެ 6 ފުޅި ވަނީ އެ ގެއިން ފެނިފައެވެ.
ފުލުހުން މި މައްސަލައިގެ ތަހުގީގު މިހާރު ދަނީ ކުރިއަށެވެ.
