މާލެ ސިޓީ ކައުންސިލްގެ ހިންގުން ހަރުދަނާ ކުރުމަށް އެ ސިޓީ ކައުންސިލަށް އިންޓާނަލް އޮޑިޓަރަކު އައްޔަންކޮށްފިއެވެ.
އިންޓާނަލް އޮޑިޓަރަކު ހޯދުމަށް ސިޓީ ކައުންސިލުން އިއުލާން ކުރީ މިދިޔަ އޮކްޓޯބަރު މަހުގައެވެ.
ސިޓީ ކައުންސިލުން ބުނީ އިންޓާނަލް އޮޑިޓަރަކު މަސައްކަތްކުރައްވަން ފެއްޓެވުމުން، ކައުންސިލް އިދާރާއިން ތައްޔާރުކުރަންޖެހޭ އެކިއެކި އިންޓާރނަލް އޮޑިޓް ރިޕޯޓް ތައްޔާރުކޮށް އިތުރު މަޢުލޫމާތު، މާލޭގެ ރައްޔިތުންނާއި އަދި ގުޅުންހުރި މުއައްސަސާތަކާ ހިއްޞާ ކުރެވެމުން ގެންދެވޭނެ ކަމަށެވެ. މި ކަމުގެ ސަބަބުން ނަހަމަ ނުފޫޒާއި ކޮރޮޕްޝަން ހުއްޓުވުމަށް ވަރަށް ބޮޑަށް މަގުފަހިވެގެން ދާނެ ކަމަށް އެކައުންސިލުން ބުންޏެވެ.
މާލޭގެ މޭޔަރު އާދަމް އާޒިމް ވިދާޅުވީ ފުރަތަމަ ފަހަރަށް މާލެ ސިޓީ ކައުންސިލުން އިންޓަރނަލް އޮޑިޓަރެއް އައްޔަންކޮށްފައިވާ ކަމަށާއި މިއީ މާލެ ސިޓީއިން ކުރާ ކަންކަމުގައި ފުރިހަމައަށް ޖަވާބުދާރީވުމަށާއި، އާންމުންގެ އިތުބާރު ހޯދުމަށް އެޅި ފިޔަވަޅެއް ކަމަށެވެ.
"އަޅުގަނޑުމެން ކަނޑައަޅައިގެން މި ތިބީ، ކުރާ ހުރިހާ ކަމެއްގައި ވެސް ނަޒާހަތްތެރިކަން ކަށަވަރު ކުރުމަށް. މިއަދު މި އެޅުނު ބިންގަލުގެ ސަބަބުން، އަޅުގަނޑުމެންގެ މާލެ ސިޓީގެ މުސްތަޤްބަލު ބައްޓަންވެގެންދާނީ، ދެފުށްފެންނަ ގޮތަށް މަސައްކަތް ކުރާ މުއައްސަސާއެއްގޮތަށް" އާޒިމް ވިދާޅުވިއެވެ.
