ޑައިވް ކުރަނިކޮށް ޑީކޯވެގެން ހާލު ދެރަވި މީހަކު އެމްއެންޑީއެފްގެ އެހީތެރިކަމާއެކު މާލެ ގެނެސްފިއެވެ.
އެމްއެންޑީއެފުން ބުނި ގޮތުގައި ޑީކޯވެގެން މާލެ ގެންދަން ޖެހުނީ ވ.އަތޮޅު އަލިމަތާ ރިސޯޓް ކައިރިއަށް އެންދަމަން ފައިބައިގެން އުޅުނު ދިވެއްސެކެވެ. އެމީހާ ޑީކޯވެ ހާލު ދެރަވެގެން އެހީތެރިކަމަށް އެދުމުން އެމްއެންޑީއެފް މާލޭ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަންގެ އެހީތެރިކަމާ އެކު މިހާރު ވަނީ މާލެ ގެނެސްފައެވެ.
އެމީހާއާ ބެހޭ އިތުރު މައުލޫމާތެއް އެމްއެންޑީއެފުން ހާމަކޮށްފައެއް ނުވެއެވެ.
ޑީކޯމްޕްރެޝަން ސިކްނަސް ނުވަތަ ޑީކޯވުމަކީ ފެނުގެ އަޑިއަށް ފައިބާ މީހުންނަށް ދިމާވެދާނެ ނުރައްކާތެރި ހާލަތެކެވެ. މިއީ ފެނުގެ އަޑިން މައްޗަށް އަރާއިރު ހަށިގަނޑުގެ ތެރޭގައި އުފެދޭ ނައިޓްރޮޖަން ބުޅުތަކުގެ ސަބަބުން ދިމާވާ ކަމެކެވެ. މި ހާލަތުގައި ވަގުތުން ފަރުވާ ނުލިބިއްޖެނަމަ، ނުރައްކާތެރި ނަތީޖާތަކަކާ ކުރިމަތިލާން ޖެހިދާނެއެވެ.
