ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓުތަކަށް އިތުރު ކުރާ ލިފްޓުތަކަށް 18 މިލިއަން ޑޮލަރު (278 މިލިއަން ރުފިޔާ) ހަރަދުވާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި މެމްބަރަކު ކުރެއްވި ސުވާލުގެ ޖަވާބުގައި ފަޒުލް ވިދާޅުވީ ލިފްޓް ހަރުކުރުމުގެ ޕްރޮޖްކެޓް މިހާރު ކުރިއަށްދާ އިރު، ކޮންމެ ޓަވަރަކު ދެ ލިފްޓް ހަރުކުރަންޖެހޭ ކަމަށެވެ.
ލިފްޓު ހަރުކުރުމުގެ ޕްރޮޖެކްޓް މި އަހަރުގެ ފެބްރުއަރީ މަހު ހަވާލުކުރީ ޗައިނާގެ ޝެންޔެންގް ޔުއަންޑާ އިންޓެލެކްޗުއަލް އިންޑަސްޓްރީ ގްރޫޕް ކޯ ލިމިޓެޑާއެވެ. ހިޔާ ޓަވަރުތަކުގައި އަލަށް ހަރުކުރާ ލިފްޓްތަކުގެ ތެރެއިން އެއް ލިފްޓަކީ ސްޓްރެޗާ އުފުލޭ ވަރުގެ ބޮޑު ލިފްޓެކެވެ. ދެން ހަދާ ލިފްޓަކީ 14 މީހުންގެ ޖާގައިގެ ލިފްޓެކެވެ. މިއާއެކު، ހިޔާ ފްލެޓްގެ 25 ބުރީގެ 16 ޓަވަރުގައި ޖުމްލަ 32 ލިފްޓް އިތުރަށް ހަރު ކުރުމަށް ހަމަޖެހިފައިވެއެވެ.
ލިފްޓު ހަރުކުރުމުގެ މަސައްކަތް އެއް އަހަރު ތެރޭ ނިމޭނެ ކަމަށް އެޗްޑީސީ އިން ލަފާ ކުރެއެވެ.
