ފާއިތުވި އަހަރު ހުޅުމާލޭ ރަށު މާރުކޭޓު މަތީގައި ހުޅުވި ކޭއެފްސީ އާއި ޕިއްޒާ ހަޓް ރެސްޓޯރެންޓްތައް، ކަސްޓަމަރުން ނުލިބި ވިޔަފާރި ދަށްވުމާ ގުޅިގެން ބަންދުކޮށްފިއެވެ.
ރާއްޖޭގައި މި ދެ ފްރެންޗައިޒް ރެސްޓޯރެންޓްގެ ޚިދުމަތް އެންމެ ފުރަތަމަ ފެށިފައިވަނީ 2018 ވަނަ އަހަރުއެވެ. މި ދެތަން ހިންގަނީ ރާއްޖޭގެ އައިލެންޑް ފުޑާއި އިންޑިއާގެ ގަމާ ޕިއްޒާ ކްރާފްޓް އޯވަސީސްއާ ގުޅިގެން އުފައްދާފައިވާ ޖޮއިންޓް ވެންޗަރ ކުންފުނި، ގެމަ އައިލެންޑް ފުޑުންނެވެ.
މާލޭ ގާކޮށީގައި އަދި ހުޅުމާލޭގައި ހުޅުވާފައިވާ މި ދެ ރެސްޓޯރެންޓްގެ ވިޔަފާރި ދަށްވާން ފެށީ، ފަލަސްޠީނުގައި އިސްރާއީލުން ހިންގަމުންދާ ޤަތުލުއާންމަށް އެ ދެ ތަނުގެ މައި ކުންފުނިތަކުން ވެދެމުންދާ އެހީތެރިކަމާއި ކުރަމުންދާ ތާއީދާ ގުޅިގެންނެވެ.
މުޅި ދުނިޔޭގައި މިފަދަ ވިޔަފާރިތަކަށް އިހުތިޖާޖުކޮށް، ބޮއިކޮޓްކުރުމުގެ ހަރަކާތްތައް ހިންގަމުންދާއިރު، ރާއްޖޭގައިވެސް މިފަދަ ހަރަކާތްތައް ފެށި، މާލޭގައި ހުރި އެ ފްރެންޗައިޒްތަކުގެ އައުޓްލެޓްތައް ކުރިމަތީގައި މުޒާހަރާކޮށްފައިވެއެވެ. މި މުޒާހަރާތަކާއި ބޮއިކޮޓް ކެމްޕޭންތަކުގެ ސަބަބުން އެ ވިޔަފާރިތަކަށް އަންނަނީ ފޫނުބެއްދޭވަރުގެ ގެއްލުންތަކާ ކުރިމަތިވަމުންނެވެ.
މިހާރު ހުޅުމާލޭގައި ހުރި ޕިއްޒާ ހަޓާއި ކޭއެފްސީގެ އައުޓްލެޓްގައި ވަނީ އެ ދެތަން ބަންދުކުރިކަމުގެ ނޯޓިސް ބަހައްޓާފައެވެ.
