ވާދަވެރި ކެމްޕޭނަކަށްފަހު މިހާރު ކުރިޔަށްދާ އެމެރިކާގެ ރިޔާސީ އިންތިޚާބުގެ ވޯޓު ގުނުމުގައި، ގިނަ ސްޓޭޓްތައް ރިޕަބްލިކަން ޕާޓީގެ ކެނޑިޑޭޓް، ކުރީގެ ރައީސް ޑޮނަލްޑް ކާމިޔާބު ކޮށް، އެމެރިކާގެ ރައީސްކަމުގެ ދެވަނަ ދައުރެއް ކާމިޔާބުކުރުމާ ގާތަށް ދަތުރު ކޮށްފިއެވެ.
އެގޮތުން ޓްރަމްޕްގެ ކެމްޕޭން ޓީމުންވަނީ އަންގާރަ ރޭ ފުރަތަމަ ނަތީޖާތައް ފެންނަން ފެށުމާއެކު އުފާފާޅުކުރަން ފަށާފައެވެ.
އެމެރިކާގެ ރިޔާސީ އިންތިޚާބު އަދިވެސް ނިމިފައިނުވި ނަމަވެސް، ޑޮނަލްޑް ޓްރަމްޕަށް ނަތީޖާ ރަނގަޅުވަމުންދާކަން ވަނީ ފާހަގަކުރެވެން ފަށާފައެވެ..
ރިޕަބްލިކަން ކެންޑިޑޭޓް މިހާރު ވަނީ ސްވިންގް ސްޓޭޓް ޖޯޖިއާ ހޯދުމަށްފަހު، ނޯތު ކެރޮލައިނާގައިވެސް ކާމިޔާބު ހޯދާފައެވެ. އިލެކްޓޯރަލް މެޕް މިހާރު ބަދަލުވަމުން ދަނީ 2020 ގައި ޓްރަމްޕް ބަލިވި އިންތިޚާބަށްވުރެ، 2016 ގައި އޭނާ ކާމިޔާބުކުރި އިންތިޚާބާ އެއްގޮތަށެވެ.
މިހާތަނަށް ނަތީޖާ އިއުލާންކޮށްފައިވާ ހުރިހާ ކައުންޓީތަކެއްގައިވެސް، ކުރީގެ ރައީސް ދަނީ މަޑުމަޑުން ނަމަވެސް ފާހަގަކުރެވޭ ކުރިއެރުންތައް ހޯދަމުންނެވެ. ކަމަލާ ހެރިސް ސިޓީތަކާއި އަވަށްތަކުގައި ޖޯ ބައިޑަންގެ ވޯޓު އަދަދާ އެއްވަރަށް ވޯޓު ހޯދަމުން ދިޔަ ނަމަވެސް، މިހާތަނަށް އެއީ ކުރީގެ ރައީސްއާ ހުރި ފަރަގު ކުޑަކުރުމަށް އެކަށީގެންވާ މިންވަރެއް ނޫންކަމަށް ދަނީ ފެންނަމުންނެވެ.
ޓްރަމްޕްގެ ކޮންވެންޝަން ސެންޓަރުގައި އޭނާއަށް ލިބޭ ކޮންމެ ކާމިޔާބަކާ ގުޅިގެން އުފާވެރި އަޑުތައް އުފުލެމުންދާއިރު، ފްލޮރިޑާގެ މާ-އަ-ލާގޯގައި ބޭއްވުނު ޕާޓީގެ ބައިވެރިން ވަނީ މި ސެންޓަރަށް އަންނަން ފަށާފިއެވެ.
ޓްރަމްޕް މިތަނަށް އަންނާނެތޯ އަދި އަންނާނެ ނަމަ އެއީ ކޮން ވަގުތެއްގައިކަން އަދި ވަނީ ނޭނގެއެވެ.
އެމެރިކާގެ ރައީސްކަން ކާމިޔާބުކުރުމަށް ކެންޑިޑޭޓަކު 270 އިލެކްޓޯރަލް ކޮލެޖް ވޯޓު ހޯދަން ޖެހެއެވެ. މި ވޯޓުތައް އެކި ސްޓޭޓުތަކަށް ކަނޑައަޅާފައިވަނީ އެ ސްޓޭޓެއްގެ އާބާދީގެ ނިސްބަތުން ކޮންގްރެސްގައި އެ ސްޓޭޓަކަށް ލިބޭ ތަމްސީލުގެ މައްޗަށް ބިނާކޮށެވެ.
މިސާލަކަށް، އާބާދީގައި ގާތްގަނޑަކަށް 1 މިލިއަން މީހުން ދިރިއުޅޭ އުތުރު ސަރަހައްދުގެ ކުޑަ ސްޓޭޓެއް ކަމުގައިވާ ޑެލަވެއަރއަށް ލިބެނީ އެންމެ 3 އިލެކްޓޯރަލް ވޯޓެވެ. އެމެރިކާގެ އެންމެ އާބާދީ ބޮޑު ސްޓޭޓް ކަމުގައިވާ، 39 މިލިއަން މީހުން ދިރިއުޅޭ ކެލިފޯނިއާއަށް 54 އިލެކްޓޯރަލް ވޯޓު ލިބެއެވެ.
ގިނަ ސްޓޭޓުތަކުގައި، އެ ސްޓޭޓެއްގައި އެންމެ ގިނަ ވޯޓު ލިބޭ ކެންޑިޑޭޓަކަށް އެ ސްޓޭޓެއްގެ ހުރިހާ އިލެކްޓޯރަލް ވޯޓެއް ލިބެއެވެ.
މި ނިޒާމުގެ ސަބަބުން، ކެންޑިޑޭޓަކަށް މުޅި ގައުމުގެ ޕޮޕިއުލަރ ވޯޓު ކާމިޔާބުކުރެވުނު ނަމަވެސް، އިލެކްޓޯރަލް ކޮލެޖުން ބަލިވުން އެކަށީގެންވެއެވެ. 2000 އަދި 2016 ވަނަ އަހަރުގެ ރިޔާސީ އިންތިޚާބުގެ ނަތީތާއް ނުކުމެވައި ވަނީ މި ގޮތަށެވެ.
އެމެރިކާގެ މީޑިއާތަކުން ހިސާބުކުރާ ގޮތުގައި މި އިންތިޚާބުގައި ހެރިސްއަށް ޑިމޮކްރެޓިކް ޕާޓީއަށް އާންމުކޮށް ވޯޓުދޭ ނުވަތަ އެ ޕާޓީއަށް ލެނބޭ ސްޓޭޓުތަކުން 226 އިލެކްޓޯރަލް ވޯޓު ލިބޭނެ ކަމަށް ލަފާކުރެވޭއިރު، ޓްރަމްޕަށް 219 އިލެކްޓޯރަލް ވޯޓު ލިބޭނެ ކަމަށް ބެލެވެއެވެ.
އެހެންކަމުން، ހެރިސްއަށް 270 ވޯޓަށް ވާސިލުވުމަށް އިތުރު 44 ވޯޓު ބޭނުންވާއިރު، ޓްރަމްޕަށް އިތުރު 51 ވޯޓު ބޭނުންވެއެވެ. ހޮވޭނެ ކެންޑިޑޭޓަކާމެދު އަދި ކަނޑައެޅިގެން ނުދާ "ސްވިންގް ސްޓޭޓްސް" 7 ސްޓޭޓުގައި ޖުމްލަ 93 އިލެކްޓޯރަލް ވޯޓު އެބަހުއްޓެވެ.
