ރޮބަޓް އެފް. ކެނެޑީ ޖޫނިއަރ އޭނާގެ އަމިއްލަ ކެމްޕެއިން ހުއްޓާލުމަށްފަހު، ހުކުރު ދުވަހު އެރިޒޯނާގައި އޮތް ރެލީއެއްގައި ކުރީގެ ރައީސް ޑޮނަލްޑް ޓްރަމްޕްއާ ގުޅިވަޑައިގެންފިއެވެ. އަދި އެ ރެލީގައި ސްޓޭޖުގައި ޓްރަމްޕްގެ އަރިހުގައި ކެނެޑީ ވަނީ ޓްރަމްޕަށް ތަޢުރީފުކުރައްވާފައެވެ.
ކެނެޑީ ވިދާޅުވީ ބޭރުގެ ސިޔާސަތާއި، ސަރުކާރުގެ ސެންސަރޝިޕާއި، "ދިގު މުއްދަތުގެ ބަލިތަކުގެ ނުރައްކާ ނައްތާލުމާ" ގުޅޭ ގޮތުން ޓްރަމްޕް އޭނާއާ އެއް ހިޔާލެއްގައި ހުންނެވި ކަމަށެވެ.
އޭނާގެ ވާހަކަފުޅުގައި ކެނެޑީ ވިދާޅުވީ، ޓްރަމްޕް މަރާލަން ދިން ހަމަލާއަށްފަހު މިދިޔަ މަހު ޓްރަމްޕްއާ ބައްދަލުކުރެއްވި ކަމަށާއި، ހަފްތާތަކެއް ފަހުން ފްލޮރިޑާގައި އަނެއްކާވެސް ބައްދަލުކުރައްވާ އެކުގައި ހިއްސާކުރެއްވޭނެ ކަންކަމާއި ބެހޭގޮތުން ވާހަކަދެއްކެވި ކަމަށެވެ.
"އަޅުގަނޑުމެން ވާހަކަދެއްކީ އަޅުގަނޑުމެންނަށް ތަފާތުވާ ކަންކަމަކާ ނޫން، އެއީ އަޅުގަނޑުމެން ހުރިހާ ކަމަކަށް އެއްބަސްނުވާތީ. އެކަމަކު އަޅުގަނޑުމެން އެއްބަސްވާ މައްސަލަތަކާ ބެހޭ ގޮތުން،" ކެނެޑީ ވިދާޅުވިއެވެ. "އޭނާ ވާހަކަދެއްކެވި އެއް މައްސަލައަކީ ރައްކާތެރި ކާނާ އަދި ދިގު މުއްދަތުގެ ބަލިތަކުގެ ނުރައްކާ ނައްތާލުން."
"އަމެރިކާ އަނެއްކާވެސް ދުޅަހެޔޮ ޤައުމަކަށް ހަދާނެ ރައީސަކު ބޭނުމެއް ނުވޭތަ؟" އޭނާ ފަހުން ވިދާޅުވިއެވެ.
ކެނެޑީ ވާހަކަދެއްކެވުމަށް ކުރިން، ޓްރަމްޕް ވިދާޅުވީ "އޮޓޯއިމިއުން ބަލިތަކާއި، އޯޓިޒަމްއާއި، ފަލަވުމާއި، ދަރިމައިވުމުގެ ދަތިކަމާއި އަދި އެތައް އެހެން ބަލިތަކެއް އިތުރުވަމުންދާ ގޮތް" ބެލުމަށް އެކުލަވާލާ ޕެނަލެއްގައި މަސައްކަތްކުރުމަށް ކެނެޑީއަށް އެދިވަޑައިގަންނަވާނެ ކަމަށެވެ.
ކެނެޑީ އޭނާގެ ވާހަކަފުޅުގައި ވިދާޅުވީ، "އަމެރިކާގެ ބޭރުގެ ސިޔާސަތުގައި ނިއޯ-ކޮންސަވޭޓިވުންގެ ބާރު ނިމުމަކަށް ގެނެސް" ބޭރު ޤައުމުތަކުގައި ހުރި އަމެރިކާގެ ސިފައިންގެ އަދަދު މަދުކުރަން ބޭނުންފުޅުވާ ކަމަށް ޓްރަމްޕް އޭނާގާތު ވިދާޅުވި ކަމަށެވެ.
އޭނާ އިތުރަށް ވިދާޅުވީ ސެންސަރޝިޕާ ދެކޮޅަށް ދެ ބޭފުޅުންވެސް އެއް ހިޔާލެއްގައި ތިއްބެވި ކަމަށެވެ. މިއީ ކެނެޑީގެ ކެމްޕެއިންގެ މައިގަނޑު މައްސަލައެކެވެ. ކެނެޑީ ވަނީ އިންޓަރނެޓުގައި ދޮގު މަޢުލޫމާތު ހުއްޓުވުމަށް ސޯޝަލް މީޑިއާ ކުންފުނިތަކާއެކު މަސައްކަތްކުރާތީ ބައިޑެންގެ ސަރުކާރަށް ފާޑުކިޔުއްވާފައެވެ.
ކެނެޑީ އޭނާގެ ވާހަކަފުޅު ނިންމެވީ ޓްރަމްޕަށް ތާއީދުކުރައްވާ ކަމަށް ސީދާ ވިދާޅުނުވެއެވެ. އޭނާ ވާހަކަފުޅު ނިންމެވި އިރު ސްޓޭޑިއަމްގައި "އާރް.އެފް.ކޭ ޖޫނިއަރ ޓްރަމްޕަށް ތާއީދުކުރައްވައިފި" ލިޔެފައިވާ ބޯޑުތަކާއި ބެނާތައް ދައްކާފައިވެއެވެ.
ރޮބަޓް އެފް. ކެނެޑީ ޖޫނިއަރއަކީ އެމެރިކާގެ ކުރީގެ ރައީސް ޖޯން އެފް ކެނެޑީއަށް ބޮޑުބޭބެ ވިދާޅުވާ ބޭފުޅެކެވެ.
