ރައްޔިތުންގެ މަޖިލީހަށް މަތިކޮށްފައިވާ މަސްއޫލިއްޔަތުތައް ފުރިހަމައަށް އަދާކުރާނެކަމުގެ ޔަޤީންކަން ދިވެހި ރައްޔިތުންނަށް އަރުވާ ކަމުގައި، ރައްޔިތުންގެ މަޖިލީހުގެ ރައީސް މުޙައްމަދު ޢަބްދުއްރަހީމް އަބުދުﷲ މިއަދު ދެއްވައިފިއެވެ.
އަބުދުއްރަހީމް މިހެން ވިދާޅުވީ، މިހާރު ޢަމަލުކުރަމުންދާ "ފެހި ޤާނޫނުއަސާސީ" ތަޞްދީޤުކުރެވުނުތާ 16 އަހަރު ފުރުނު ދުވަހުގެ މުނާސަބަތުގައި، މިއަދުގެ މަޖިލީހުގެ ޚާއްޞަ ޖަލްސާ ފައްޓަވާ، ވާހަކަފުޅު ދައްކަވަމުންނެވެ.
އަބުދުއްރަހީމް ވިދާޅުވީ ޤާނޫނުއަސާސީން އެމަޖިލީހަށް ލިބިދީފައިވާ ޙައްޤުތައް ކަށަވަރު ކޮށްދިނުމުގައި އަދި ރައްޔިތުންގެ މަޖިލީހަށް މަތިކޮށްފައިވާ ވާޖިބުތައް އަދާކޮށް، މުއައްސަސާތައް ޖަވާބުދާރީ ކުރުވުމުގައި އެމުވައްސަސާ ދެމިއޮންނާނެ ކަމުގައެވެ.
ޤާނޫނުއަސާސީން އަޅުގަނޑުމެންނަށް ލިބިދީފައިވާ ޙައްޤުތައް ކަށަވަރު ކޮށްދިނުމުގައި އަދި ރައްޔިތުންގެ މަޖިލީހަށް މަތިކޮށްފައިވާ ވާޖިބުތައް އަދާކޮށް، މުއައްސަސާތައް ޖަވާބުދާރީ ކުރުވުމުގައި ރައްޔިތުންގެ މަޖިލީހުގެ މަސްއޫލިއްޔަތު މި މަޖިލީހުން އަދާކުރާނެ ކަމުގެ ފުރިހަމަ ޔަޤީންކަން ދިވެހި ލޮބުވެތި އެންމެހާ ރައްޔިތުންނަށް އަރުވަން.
ރައީސް އަބުދުއްރަހީމް ވިދާޅުވިއެވެ.
މިއަދު ޖަލްސާގައި ވާހަކަ ދައްކަވަމުން އަބުދުއްރަހީމް ވަނީ މި ޤާނޫނުއަސާސީ އެކުލަވާލުމުގެ މަސައްކަތްކުރެއްވި ޚާއްޞަ މަޖިލީހުގެ މެންބަރުންނަށާއި، އެ މަޖިލީހުގެ ރިޔާސަތު ބެލެހެއްޓެވި މާމިގިލި ދާއިރާގެ މެންބަރު ޤާސިމް އިބްރާހިމަށް ޚާއްޞަ ޝުކުރެއް ދަންނަވާފައެވެ.
ޚާއްޞަ މަޖިލީހުގެ ރައީސްގެ ހައިސިއްޔަތުން ޤާސިމް އިބްރާހިމް މިއަދުގެ ޖަލްސާގައި ވާހަކަފުޅު ދައްކަވަމުން ފާހަގަކުރެއްވީ، ޤާނޫނުއަސާސީއަށް ފަސޭހައިން ބަދަލުތަކެއް ނުގެނެވޭ ގޮތަށް އިންތިޒާމުތައް ހަމަޖައްސަން ޖެހޭ ކަމަށެވެ. މިއީ ޤާނޫނުއަސާސީގެ މުހިންމުކަމާއި، އޭގެ ދެމެހެއްޓެނިވިކަން ކަށަވަރުކުރުމަށް އެޅިދާނެ މުހިންމު ފިޔަވަޅެއްގެ ގޮތުގައި އޭނާ ދެކެވަޑައިގަންނަވާ ކަމަށް ވިދާޅުވިއެވެ.
2004 ވަނަ އަހަރު ފެށުނު ޤާނޫނުއަސާސީ އިޞްލާޙުކުރުމުގެ މަސައްކަތް ނިމި، މިހާރު ބޭނުން ކުރެވެމުންދާ ޤާނޫނުއަސާސީ ތަޞްދީޤުކުރެވުނީ އޮގަސްޓް 7، 2008 ގައެވެ.
