ޓެސްލާގެ ބިލިއަނަރު ސީއީއޯ އީލޮން މަސްކް އެމެރިކާގެ ރިޔާސީ ރޭހުގައި ފުރަތަމަ ފަހަރަށް ޑޮނަލްޑް ޓްރަމްޕަށް ފާޅުގައި ތާއީދު ކުރައްވައި، ރިޕަބްލިކަން ޕާޓީއަށް ނިސްބަތްވާ އެމެރިކާގެ ކުރީގެ ރައީސް ޓްރަމްޕްއަކީ "ވަރުގަދަ" ލީޑަރެއްކަމަށް ސިފަ ކުރައްވައިފި އެވެ.
ހޮނިހިރު ދުވަހު ޕެންސިލްވޭނިއާގައި ބޭއްވި ޓްރަމްޕްގެ އެއްވުމުގައި ޓްރަމްޕް އަވަހާރަކޮށްލުމަަށް ދިން ހަމަލާއަށްފަހު، ދުނިޔޭގެ އެންމެ މުއްސަނދި މީހާ މަސްކް ވަނީ ޓްރަމްޕްގެ މޫނުގައި ލޭ ހޭކިފައިވާ ވީޑިއޯއަކާ އެކު އޭނާގެ އެންޑޯސްމަންޓް ޕޯސްޓް އެކްސްގައި ޕޯސްޓުކޮށްފަ އެވެ.
މި ހަމަލާއިން ޓްރަމްޕް ސަލާމަތްވެވަޑައިގަތެވެ.
ގިނަބަޔަކު ސިފަކުރާގޮތުގައި، މި ޕޯސްޓުގެ ސަބަބުން ކަނާތު ފިޔައިގެ ސިޔާސީ މައިދާނަށް މަސްކް ބަދަލުވެ، ނޮވެމްބަރު މަހުގެ ފަސް ވަނަ ދުވަހު ބާއްވާ އިންތިހާބުގައި ވައިޓް ހައުސްއަށް އެނބުރި ވަޑައިގަތުމަށް ޓްރަމްޕަށް ވަރަށް ބޮޑު ތާއީދެއް ލިބިވަޑައިގަންނަވާނެއެވެ.
މިއަހަރުގެ ރިޔާސީ އިންތިޚާބަށް ކެމްޕޭން ކުރެއްވުމަށް، އެމެރިކާގެ ޕެންސެލްވޭނިއާގައި އޮތް ކެމްޕޭން އިންވެންޓެއްގައި ވާހަކަ ދައްކަވަމުން ގެންދަވަނިކޮށް، ޓްރަމްޕް އަވަހާރަކޮށްލުމަށް ހަމަލާ ދީފައިވަނީ އުމުރުން 20 އަހަރުގެ ތޯމަސް މެތިއު ކުރޫކްސް ނަމަކަށް ކިޔާ، ޕެންސެލްވޭނިއާގެ ބެތެލް ޕާރކަށް ނިސްބަތްވާ ޒުވާނެއްކަމަށް އެމެރިކާގެ ޖާސޫސީ އިދާރާ، އެފްބީއައިއިން ވަނީ ބުނެފައެވެ. މި ހަމަލާއިން ޓަރަމްޕް ވަނީ ސަލާމަތްވެވަޑައިގެންފައެވެ.
އަދި ޓްރަމްޕްގެ ސަލާމަތީ ކަންކަން ބަލަހައްޓަމުންދިޔަ ސިއްރު ފުލުހުން ވަނީ މި ހަމަލާ ދިން މީހާ މަރާލާފައެވެ. ސޯޝަލް މީޑިއާގައި އާންމުވެފައުވާ ފޮޓޯތަކުން ފެންނަ ގޮތުގައި އޭނާ ޓްރަމޕްގެ ބޮލަށް އަމާޒުކޮށް ހަމަލާ ފޮނުވާލާފައިވަނީ ޓްރަމްޕްގެ އެއްވުން އޮތް ސަރަހައްދުގެ ކައިރީގައި ހުރި އިމާރާތެއްގެ ފުރާޅުމަތީގައި ފިލައި އޮވެއެވެ. އަދި ޓްރަމްޕްގެ ސަލާމަތީ ކަންކަން ބަލަހައްޓަމުންދިޔަ ސްނައިޕަރުންގެ ޓީމުންވަނީ 20 އަހަރުގެ ޒުވާނާއަށް ރައްދު ހަމަލާދީ އޭނާ މަރާލާފައެވެ. އޭނާ ޓްރަމްޕަށް ހަމަލާދިން އިމާރާތުގެ ފުޅާލު މަތީގައި މަރުވެފައި އޮތް ފޮޓޯތައް ވަނީ ސޯޝަލް މީޑިއާގައި އާންމު ވެފައެވެ.
މިހަމަލާ އެމެރިކާގެ އެފްބީއައިން ދަނީ ތަހުގީގު ކުރަމުންނެވެ.
ހަމަލާއަށްފަހު މީޑިއާތަކުގައި އާންމުވެފައިވާ ފޮޓޯތަކުން ފެންނަ ގޮތުގައި ޓްރަމްޕްގެ މޫނުގައި ލޭހުރިތަން ވަނީ ފެނިފައެވެ. ބައެއް ފޮޓޯތަކުން ފެންނަ ގޮތުގައި މިހަމަލާ އަމާޒުވެފައިވަނީ ޓްރަމްޕްގެ ކަނާތްފަރާތު ކަނަފަތަށެވެ. އަދި ހަމަލާއަށްފަހު، ޓްރަމްޕް ބިންމައްޗަށް ވެއްޓެ ވަޑައިގަތް މަންޒަރު ފެނިފައިވެއެވެ. އެހެންނަމަވެސް ކުޑަ އިރުކޮލެއްގެ ތެރޭގައި ސީކްރެޓް ސާވިސް ފުލުހުން ވަނީ ޓްރަމްޕް އަތުލަފިކޮށްގެން ނަގާއިގެން ގެންގޮސްފައެވެ. ސީކްރެޓް ފުލުހުން ޓްރަމްޕް ގެންދަމުންދިޔައިރު ޓްރަމްޕް އަތުން އިޝާރާތް ކުރަމުންދިޔަތަން ވަނީ ފެނިފައެވެ.
އެހެންނަމަވެސް ފަހުން މީޑިއާތަކުން ރިޕޯޓު ކޮށްފައިވާ ގޮތުގައި، ހަމަލާއިން ޓަރަމްޕަށް ސީރިއަސް އަނިޔާއެއް ލިބިފައެއް ނުވެއެވެ. އަދި ފަރުވާ ދިނުމަށްފަހު މިހާރު ޓަރަމްޕްވަނީ ހޮސްޕިޓަކުން ދޫކޮށްލާފައެވެ.
ހަމަލާއަށްފަހު ޓްރަމްޕް އޭނާގެ އަމިއްލަ ސޯޝަލް މީޑިއާ ޕްލެޓްފޯމް "ޓްރޫތް"ގައި ކުރެއްވި ޕޯސްޓެއްގައި ވިދާޅުވީ، ކަނާތްފަރާތު ކަންފަތުގައި އެއްޗެއް ޖެހުނުހެން ހީވި ކަމަށެވެ. އަދި އަޑެއް އިވުމަށް ކަނާތްފާރާތު ކަންފަތުގައި އައިސް ޖެހުނީ ވަޒަނެއްކަމަށް އިހުސާސްވިކަމަށްވެސް ޓަރަމްޕް ވިދާޅުވެފައި ވެއެވެ.
އެމެރިކާގެ ރިޔާސީ ގަނޑުވަރު ވައިޓް ހައުސްއިން ބުނެފައިވަނީ، މި ހަމަލާއަށްފަހު އެމެރިކާގެ ރައީސް ޖޯ ބައިޑްން ޓަރަމްޕްއަށް ގުޅުއްވާ ތައުޒިޔާ ވިދާޅުވެފައިވާކަމުގައެވެ.
މިހަމަލާއާއި ގުޅިގެން ދުނިޔޭގެ ގައުމުތަކުގެ ލީޑަރުން ގެންދަވަނީ ޓްރަމްޕަށް ތައުޒިޔާގެ މެސެޖްތައް ފޮނުއްވަމުންނެވެ.
