ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގައި މަނީ ލޯންޑަރިންގެ ތުހުމަތުކުރެވޭ މައްސަލައިގެ ތަހުގީގުގެ ނުނިމި ހުރި ބައި އަވަސް ކުރުމަށް ޕްރޮސެކިއުޓާ ޖެނެރަލް (ޕީޖީ) ހުސައިން ޝަމީމް ފުލުހުންގެ ޓީމާ އެކު މަޝްވަރާ ކުރައްވައިފި އެވެ.
މި މައްސަލަ ޕީޖީން ބަލަނީ މަނީ ލޯންޑަރިންގެ ކުށުގެ ތުހުމަތުގައި ޕްރޮސެކިއުޓާ ޖެނެރަލްގެ ގާނޫނުގެ 15 ވަނަ މާއްދާގެ ދަށުންނެވެ.
އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް މަކަރާއި ހީލަތް ހެދުމާއި މަނީ ލޯންޑަރިންގެ ދައުވާ ވަނީ އުފުލައިފައެވެ. ނަމަވެސް އެ މައްސަލައިގެ ތަހުގީގު އަދިވެސް ދަނީ ހިނގަމުންނެވެ. ޕީޖީއޯ އިން ބުނީ ފުލުހުންނާ އެކު މިއަދު ބޭއްވި ބައްދަލުވުމުގައި އެ މައްސަލައިގެ ބާކީ ހުރި މަސައްކަތްތަކާއި މަސައްކަތްތައް ނިންމާނެ ޓައިމްލައިނެއް ކަނޑައެޅުމާ ގުޅޭ ގޮތުން މަޝްވަރާކޮށްފައިވާ ކަމަށެވެ.
މި މައްސަލާގައި މިހާތަނަށް ލިބިފައިވާ ހެކިތައް ޕީޖީ އޮފީހަށް ހުށަހަޅާފައިވާއިރު، އިތުރު ދިރާސާތައް ކުރަން ޖެހޭ ކަންކަމާ މެދު ޕްރޮސެކިއުޓަރުން ވަނީ މަޝްވަރާކޮށްފަ އެވެ. އަދި ދައުވާއާ ބެހޭ ގޮތުން މަޝްވަރާ ކޮށް، ދައުވާ ލިބޭ މީހުންގެ ބަޔާން ތައް ވެސް ނަގާފައިވާ ކަމަށް ޕީޖީ އޮފީހުން ވިދާޅުވި އެވެ.
މިއަދުގެ ބައްދަލުވުމުގައި ފުލުހުން ނިންމީ ދައުވާ ކުރުމާ މެދު ވީހާވެސް އަވަހަކަށް ގޮތެއް ނިންމުމަށް ޕްރޮސެކިއުޓާ އޮފީހަށް މައްސަލަ ހުށަހެޅުމަށެވެ.
މިމައްސަލާގައި ތުހުމަތު ކުރެވޭ ބައްސާމް އަނެއްކާވެސް ދަނީ އެފްއޭމްގެ ރައީސްކަމަށް ވާދަކުރައްވަމުންނެވެ.
