އިންތިޚާބީ ރައީސް ޑރ. މުއިއްޒު ހުވާކުރައްވާ ރަސްމިއްޔާތަށް ވަޑައިގެންނެވުމަށް އިންޑިއާގެ ބޮޑުވަޒީރު ނަރެންދުރަ މޯދީއަށް ދައުވަތު ދީފިއެވެ.
މުއިއްޒު ހުވާކުރައްވާ ރަސްމިއްޔާތަށް ވަޑައިގަތުމަށް މޯދީއަށް ދައުވަތު ފޮނުވާފައިވާކަން އިންތިޚާބީ ރައީސްގެ އޮފީހުގެ ތަރުޖަމާން ފިރުޒުލް މުހައްމަދު ވަނީ ޔަގީންކޮށް ދެއްވާފައެވެ. ބައެއް މީޑިއާތަކަށް މައުލޫމާތު ދެއްވަމުން އޭނާ ވިދާޅުވެފައިވަނީ މޯދީއަށްވެސް ދައުވަތު ފޮނުވާފައިވަނީ އަވައްޓެރި ހުރިހާ ގައުމަކަށްވެސް މި ރަސްމިއްޔާތަށް ދައުވަތު ފޮނުވުމަށް ނިންމާފައިވާތީ ކަމުގައެވެ.
އިންޑިއާގެ ބޮޑުވަޒީރުވަނީ 1018ވަނަ އަހަރު ރައީސް ސާލިހު ހުވާކުރެއްވި ރައްމިއްޔާތަށްވެސް ރާއްޖެއަށް ވަޑައިގެންފައެވެ. އާ ރައީސް ހުވާކުރައްވާ ރަސްމިއްޔާތަށް އަވައްޓެރި ގައުމުތަކުގެ ރައީސުން ވަޑައިގެންނެވުމަކީ ރިޔާސީ އާ ދައުރެއް ފެށޭއިރު އާންމު ކަމެކެވެ.
އެހެންނަމަވެސް، ޑރ. މުއިއްޒު ހުވާކުރައްވާ ރަސްމިއްޔާތަށް މޯޑީ ވަޑައިގަތުމާއި ގުޅޭގޮތުން ގިނަބަޔަކު ޚާއްސަ ނަޒަރަކުން ދެކެނީ، ޑރ. މުއިއްޒުގެ ވެރިކަމުގެ އިންޑިއާއާއި ރާއްޖެއާއި ދެމެދު އޮންނަ ގުޅުން ބައްޓަންވެގެންދާނޭ ގޮތާއި ގުޅޭގޮތުން ގިނަ ބަޔަކު ސުވާލު އުފައްދާފައި ވާތީއެވެ.
މިގޮތުން ބައެއް ފަރާތްތަކުން ކުރިއްސުރެ ސިފަކުރަމުން އައިސްފައިވަނީ، މުއިއްޒުވެ ވެރިކަމުގައި އިންޑިއާ ރާއްޖޭގެ ގުޅުން ގޯސްވެގެން ދާނެކަމަށެވެ. އެހެންނަމަވެސް މުއިއްޒު ރިޔާސީ އިންތިޚާބު ކާމިޔާބު ކުރެއްވުމަށްފަހު މީޑިއާތަކަށް ދެއްވި އިންޓަވިއުތަކުގައި ވިދާޅުވެފައިވަނީ، އެމަނިކުފާނުގެ ސަރުކާރު ވެގެންދާނީ ހުރިހާ ގައުމަކާއެކީވެސް ގުޅުން ބާއްވާނެ ސަރުކާރަކަށް ކަމުގައެވެ. އެހެންނަމަވެސް ވެރިކަމާ ހަވާލުވެވަޑައިގެންނެވުމާއެކު، ރާއްޖޭގައިތިބި އިންޑިއާ ސިފައިން ރާއްޖެ ދޫކޮށް ދިއުމަށް އަމުރު ކުރައްވާނޭކަމަށްވެސް މުއިއްޒު ވިދާޅުވެފައި ވެއެވެ.
