ރައީސުލްޖުމްހޫރިއްޔާގެ އަނބިކަނބަލުން މެޑަމް ފަޒްނާ އަހުމަދު މިއަދު ހުޅުމާލޭ ދެވަނަ ފިޔަވަހީގައި ހުންނަ ހިޔާ ފްލެޓް ސަރަހައްދަށް ދިއުމުން މުޒާހަރާކޮށް، އަޑު އުފުލައިފިއެވެ.
މިޑަމް ފަޒުނާ މިއަދު ވަޑައިގެންނެވީ ހިޔާ ސަރަހައްދުގައި ދޮރުން ދޮރަށް ކެމްޕޭން ކުރެއްވުމަށެވެ. ހިޔާ ސަރަހައްދުން ވަނީ ފަޒުނާ ދިއުމާއިއެކު ހިޔާގެ އެކި ވައިބާ ގްރޫޕްތަކުގައި ފަސްޓްލޭޑީ ވަޑައިގެން އުޅުއްވާކަމަށް ލިޔެފައެވެ. މިއާއިއެކު ހިޔާ ފްލެޓްތަކުގައި ދިރިއުޅޭ ބައެއް ފަރާތްތަކުން ވަނީ ނިކުމެ ޝުއޫރުފާޅުކޮށް އަޑު އުފާލާފައެވެ. އެއްވި މީހުން ވަނީ މިވެރިކަން ނިމެނީ ކަމަށާއި، ހިޔާ ސަރަހައްދުން ތާއީދެއް ނެތްކަމަށް ބުނެފައެވެ.
ފަޒްނާއާ ދެކޮޅަށް އަޑު އުފުލި މީހަކު ބިޑި އަޅުވައިގެން ފުލުހުންގެ ބެލުމުގެ ދަށަށް ގެންދަން މަސައްކަތް ކުރި ތަން ވެސް ވީޑިއޯއަކުން ފެނެއެވެ. ފުލުހުގެ މީޑިއާ އޮފިޝަލް މިރޭ ވިދާޅުވީ، އެ މީހާ ފުލުހުންގެ ބެލުމުގެ ދަށަށް ގެންދިޔައީ ފުލުހުންގެ ދައުރު އަދާކުރުމަށް ހުރަސްއަޅައި ފުލުހުންގެ އަމުރަށް ނުކިޔަމަންތެރިކަން ދެއްކުމުގެ ތުހުމަތުގައި ކަމަށެވެ. އެކަމަކު، އެ މީހާ މިހާރު ދޫކޮށްލާފައިވާ ކަމަށް ފުލުހުންގެ އޮފިޝަލް ވިދާޅުވިއެވެ.
ހިޔާ ސަރަހައްދަށް ފަސްޓް ލޭޑީ ވަޑައިގަތުމުން އިދިކޮޅުގެ ބަޔަކު ކަންތައް ކުރި ގޮތުން އެމްޑީޕީގެ މެމްބަރުން ދަނީ ނުރުހުން ފާޅު ކުރަމުންނެވެ.
ހިޔާ ޓަވަރުތަކަކީ ކުރީގެ ރައީސް ޔާމީން އެޅި އިމާރާތްތަކެކެވެ. ހިޔާގެ 16 ޓަވަރު ހެދިއިރު، ކޮންމެ ޓަވަރެއްގައި 25 ބުރި ހުރެއެވެ. ސެޕްޓެމްބަރު 9، ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި ރައީސް ސޯލިހަށް ލިބިވަޑައިގަތީ ވޯޓުލީ އާބާދީގެ 39 ޕަސެންޓެވެ. އިދިކޮޅު ކެންޑިޑޭޓް ޑރ. މުހައްމަދު މުއިއްޒަށް 46 ޕަސެންޓު ވޯޓު ލިބިވަޑައިގަތެވެ.
