ރައްޔިތުންގެ މަޖިލީހުގެ ބިލެތްދޫ ދާއިރާގެ މެމްބަރު އަހުމަދު ހަލީމް (ދޮންބިލެތް ހަލީމު) ރައީސް ޞާލިހާއި މިސަރުކާރާއިއެކު ހުންނެވިކަމުގެ ޔަގީންކަން ދެއްވާފައިވާއިރު، އަނބިކަނބަލުން ލުމް ވަހީދު ރައީސް ނަޝީދު އިސްކޮށް ހުންވައިގެން އުފައްދަވާ ދަ ޑިމޮކްރެޓްސް އަށް ސޮއިކޮށްފިއެވެ.
ދޮންބިލޭ ރައީސް ޞާލިހާއިއެކު ހުންނެވިކަމަށް ވިދާޅުވިއިރު އެމަނިކުފާނުގެ އަނބިކަނބަލުން ގެންދަވަނީ ރައީސް ނަޝީދު އިސްކޮށް ހުންވައިގެން އުފެއްދެވުމަށް މަސައްކަތް ކުރައްވާ "ދަ ޑިމޮކްރެޓްސް" އަށް ފޯމު ފުރުމުގައި އަވަދި ނެތި ހަރަކާތްތެރިވަމުންނެވެ. "ދަ ޑިމޮކްރެޓްސް"އަށް ފޯމު ފުރުމުގައި އިސްކޮށް ހަރަކާތްތެރިވާ ބޭފުޅަކު ވިދާޅުވީ ދޮންބިލޭގެ އަނބިކަނބަލުންނަކީ ޕާޓީ އުފެއްދުމަށް އެންމެ ބޮޑަށް މަސައްކަތް ކުރައްވާ އަދި ރައީސް ނަޝީދަށް ވަރަށް ބޮޑަށް ތާއީދު ކުރައްވާ ބޭފުޅެއްކަމަށެވެ.
ޕާޓީ އުފެއްދުމަށް ކުރާ މަސައްކަތުގައި ލުމް ވަނީ މިހާރު ރައީސް ނަޝީދުގެ ދަ ޑިމޮކްރެޓްސް އަށް ސޮއިވެސް ކުރައްވާފައެވެ. އެކަން ދަ ޑިމޮކްރެޓްސްގެ އިސްބޭފުޅަކުވެސް ބަނީ ކަށަވަރުކޮށް ދީފައެވެ.
ފ.އަތޮޅުގެ ރަށްތަކަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ކުރެއްވި ދަތުރުފުޅުގައި މަގޫދޫގައި ނިމިފައިވާ މަޝްރޫއުތައް ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އަހުމަދު ހަލީމް ވަނީ މަޖިލިސް އިންތިހާބުގެ ކެމްޕެއިނު ދުވަސް ވަރު ރައީސް އިބްރާހިމް މުހައްމަދު ސޯލިހު ވިދާޅުވި ވާހަކައެއްގެ ހަނދާން އާ ކުރައްވައިފައެވެ. އެގޮތުން, އިންތިހާބަށް ދެ ދުވަހަށް ވެފައިވަނިކޮށް ބިލެތްދޫގައި އޮތް ޖަލްސާއެއްގައި "ދޮންބިލެތް އަހުމަދު ރައްޔިތުންގެ މަޖިލީހުގައި އިންނަންޖެހެޔޭ" އެމަނިކުފާނު ވިދާޅުވި ކަމަށް އޭނާ ބުންޏެވެ.
މިއަދު އަޅުގަނޑަށް އެނގެނީ އަޅުގަނޑު މަޖިލީހުގައި އިންނަން ޖެހޭ ސަބަބަކީ ސަރުކާރު ދަމަހައްޓަން މަޖިލީހުގައި ހުރުން ކަން، އެކަންކަން ނުކޮށް ރައީސުލްޖުމްހޫރިއްޔާއަށް ސަރުކާރު ނުފިހެއްޓޭނެކަން.
– އަހުމަދު ހަލީމް ވިދާޅުވިއެވެ.
އަހުމަދު ހަލީމް މީގެ ކުރިން ބޮޑަށް މަސައްކަތް ކުރައްވާފައިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދުކޮށް، ސަރުކާރަށް ފާޑުވިދާޅުވާ މެމްބަރެއްގެ ގޮތުގައެވެ. އެހެންނަމަވެސް ޖީއެސްޓީ އާއި ޓީޖީއެސްޓީ ބޮޑުކުރުމަށް ވޯޓު ދީފައިވަނީ ސަރުކާރާ އެއްކޮޅަށެވެ. އޭގެ ފަހުން ދެމިހުރީ އެގޮތުގައެވެ.
ހަލީމް ވިދާޅުވީ އޭނާއަކީ އެއްވެސް މީހެއްގެ ނުފޫޒުގެ ދަށު ވެގެން މަސައްކަތް ކުރާނޭ މީހެއް ނޫން ކަމަށާއި މަސައްކަތް ކުރާނީ ރައްޔިތުން ބޭނުންވާ ގޮތަށް ކަމަށެވެ. އަދި ރައްޔިތުން ބޭނުންވަނީ މި ސަރުކާރު ދަމަހައްޓަން ކަމަށެވެ. ނަޝީދުގެ އަރިސް ބޭފުޅެއްގެ ގޮތުގައި ހުންނެވި ހަލީމް ވިސްނުން ބަދަލުކުރެއްވުމަށް ފަހު އެމްޑީޕީ ރިޔާސީ ޕްރައިމަރީގައި ވެސް ތާއީދުކުރައްވާފައިވަނީ ރައީސް ސޯލިހަށެވެ. އެހެން ނަމަވެސް ރައީސް ސޯލިހަށް ތާއީދުކުރައްވައި އޭނާ ފާޅުކަން ބޮޑުގޮތެއްގައި ވާހަކަ ދެއްކެވި މިއީ ފުރަތަމަ ފަހަރެވެ.
