ރައްޔިތުންގެ މަޖިލީހުގެ ބިލެތްދޫ ދާއިރާގެ މެމްބަރު އަހުމަދު ހަލީމް (ދޮންބިލެތް) ރައީސް ޞާލިހާއި މިސަރުކާރާއިއެކު ހުންނެވިކަމުގެ ޔަގީންކަން ދެއްވާފައިވާއިރު، އަނބިކަނބަލުން ލުމް ވަހީދު ރައީސް ނަޝީދާއިއެކު ހުންނެވިކަން ހާމަވެއްޖެއެވެ.

ދޮންބިލޭ ރައީސް ޞާލިހާއިއެކު ހުންނެވިކަމަށް ވިދާޅުވިއިރު އެމަނިކުފާނުގެ އަނބިކަނބަލުން ރޭވެސް އަދި މިރޭ ވެސް ގެންދަވަނީ ރައީސް ނަޝީދު އިސްކޮށް ހުންވައިގެން އުފެއްދެވުމަށް މަސައްކަތް ކުރައްވާ "ދަ ޑިމޮކްރެޓްސް" އަށް ފޯމު ފުރުމުގައި އަވަދި ނެތި ހަރަކާތްތެރިވަމުންނެވެ.

"ދަ ޑިމޮކްރެޓްސް"އަށް ފޯމު ފުރުމުގައި އިސްކޮށް ހަރަކާތްތެރިވާ ބޭފުޅަކު ވިދާޅުވީ ދޮންބިލޭގެ އަނބިކަނބަލުންނަކީ ޕާޓީ އުފެއްދުމަށް އެންމެ ބޮޑަށް މަސައްކަތް ކުރައްވާ އަދި ރައީސް ނަޝީދަށް ވަރަށް ބޮޑަށް ތާއީދު ކުރައްވާ ބޭފުޅެއްކަމަށެވެ.

ފ.އަތޮޅުގެ ރަށްތަކަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ކުރެއްވި ދަތުރުފުޅުގައި މަގޫދޫގައި ނިމިފައިވާ މަޝްރޫއުތައް ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އަހުމަދު ހަލީމް ވަނީ މަޖިލިސް އިންތިހާބުގެ ކެމްޕެއިނު ދުވަސް ވަރު ރައީސް އިބްރާހިމް މުހައްމަދު ސޯލިހު ވިދާޅުވި ވާހަކައެއްގެ ހަނދާން އާ ކުރައްވައިފައެވެ. އެގޮތުން, އިންތިހާބަށް ދެ ދުވަހަށް ވެފައިވަނިކޮށް ބިލެތްދޫގައި އޮތް ޖަލްސާއެއްގައި "ދޮންބިލެތް އަހުމަދު ރައްޔިތުންގެ މަޖިލީހުގައި އިންނަންޖެހެޔޭ" އެމަނިކުފާނު ވިދާޅުވި ކަމަށް އޭނާ ބުންޏެވެ.

މިއަދު އަޅުގަނޑަށް އެނގެނީ އަޅުގަނޑު މަޖިލީހުގައި އިންނަން ޖެހޭ ސަބަބަކީ ސަރުކާރު ދަމަހައްޓަން މަޖިލީހުގައި ހުރުން ކަން، އެކަންކަން ނުކޮށް ރައީސުލްޖުމްހޫރިއްޔާއަށް ސަރުކާރު ނުފިހެއްޓޭނެކަން.

– އަހުމަދު ހަލީމް ވިދާޅުވިއެވެ.

އަހުމަދު ހަލީމް މީގެ ކުރިން ބޮޑަށް މަސައްކަތް ކުރައްވާފައިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދުކޮށް، ސަރުކާރަށް ފާޑުވިދާޅުވާ މެމްބަރެއްގެ ގޮތުގައެވެ. އެހެންނަމަވެސް ޖީއެސްޓީ އާއި ޓީޖީއެސްޓީ ބޮޑުކުރުމަށް ވޯޓު ދީފައިވަނީ ސަރުކާރާ އެއްކޮޅަށެވެ. އޭގެ ފަހުން ދެމިހުރީ އެގޮތުގައެވެ.

ހަލީމް ވިދާޅުވީ އޭނާއަކީ އެއްވެސް މީހެއްގެ ނުފޫޒުގެ ދަށު ވެގެން މަސައްކަތް ކުރާނޭ މީހެއް ނޫން ކަމަށާއި މަސައްކަތް ކުރާނީ ރައްޔިތުން ބޭނުންވާ ގޮތަށް ކަމަށެވެ. އަދި ރައްޔިތުން ބޭނުންވަނީ މި ސަރުކާރު ދަމަހައްޓަން ކަމަށެވެ.

ރައްޔިތުން ވިސްނާ ގޮތާއި ރައްޔިތުންގެ ވިންދާއި ރައްޔިތުންގެ ރޫހާ އެއްގޮތަށް މަސައްކަތް ކުރާ މީހެއް، އަޅުގަނޑަކީ ވަކި މީހެއްގެ ނުފޫޒަކަށް ލެނބިހުރި މީހެއް ނޫން، އަޅުގަނޑަކީ ދޮންބިލެތް އަހުމަދު، އަޅުގަނޑު މާސްކު ނެގިޔަސް ހުންނާނީ ހަމަ ދޮންބިލެއް އަހުމަދު.

– އޭނާ ވިދާޅުވިއެވެ.

ނަޝީދުގެ އަރިސް ބޭފުޅެއްގެ ގޮތުގައި ހުންނެވި ހަލީމް ވިސްނުން ބަދަލުކުރެއްވުމަށް ފަހު އެމްޑީޕީ ރިޔާސީ ޕްރައިމަރީގައި ވެސް ތާއީދުކުރައްވާފައިވަނީ ރައީސް ސޯލިހަށެވެ. އެހެން ނަމަވެސް ރައީސް ސޯލިހަށް ތާއީދުކުރައްވައި އޭނާ ފާޅުކަން ބޮޑުގޮތެއްގައި ވާހަކަ ދެއްކެވި މިއީ ފުރަތަމަ ފަހަރެވެ.