ރައްޔިތުންގެ މަޖިލިސް ތެރެއިން ސަރުކާރު ދަމަހައްޓައި، ސަރުކާރުން ބޭނުންވާ ކަންކަން ކޮށްދެއްވުމުގައި ފުރިހަމަ އެއްބާރުލުން ދެއްވާނެކަމަށް ރައްޔިތުންގެ މަޖިލީހުގެ ބިލެއްދޫ ދާއިރާގެ މެމްބަރު އަހުމަދު ހަލީމް، ދޮންބިލޭ ވިދާޅުވެއްޖެއެވެ.
ރައްޔިތުންގެ މަޖިލީހުގެ އެމްޑީޕީ މެމްބަރުންގެ ތެރޭގައި އުފެދުނު ޚިޔާލް ތަފާތުވުންތަކުގެ ތެރެއިން ދޮންބިލޭ އަކީ ރައީސް މުހައްމަދު ނަޝީދުގެ ގާތް މެމްބަރެއްގެ ގޮތުގައި ގިނަ ބަޔަކު ދެކުނެވެ. އަދި ކުރިއަށް އޮތް ދުވަސް ތަނުގައި ދޮންބިލޭ ރައީސް ނަޝީދާއިއެކު މަސައްކަތް ކުރައްވާން އެމްޑީޕީން ވަކިވެ، ދަ ޑިމޮކްރަޓިކާއި ގުޅޭނެކަމަށްވެސް ވާހަތަކެއް ދެކެވުނެވެ.
ނަމަވެސް މިރޭ މަގޫދޫގަިއ ބޭއްވި ޖަލްސާގައި ވަރަށް ޖޯޝުގައި ވާހަކަ ދައްކަވަމުން ދޮންބިލޭ ވަނީ އޭނާ ރައީސް ޞާލިހާއި އެކުގައި ހުންނެވިކަން ވަރަށް ސާފުކޮށް ވިދާޅުވެފައެވެ. އޭނާ ވިދާޅުވީ މަޖިލިސް ތެރެއިން ކުރެވޭ މަސައްކަތުގައި ރައީސްގެ ސީދާ އިރުޝާދު އަންނަ ކަންތައްތަކެއްވެސް ހުންނަކަމަށް ވިދާޅުވެފައެވެ. އެގޮތުން ނިމިދިޔަ އަހަރުގެ ފަހުކޮޅު ނެގިގެންދިޔަ ޖީއެސްޓީ ބޮޑުކުރުމުގެ ބިލަށް ވޯޓު ދެއްވުމަށް ސީދާ ރައީސްގެ އިރުޝާދު ލިބުނުކަމަށެވެ.
ޖީއެސްޓީ ބޮޑުކުރަން ރައީސް ބޭނުންވީ ލިބިދާނެ ސިޔާސީ ގެއްލުމަކަށް ބެލުމަށްފަހު ނޫންކަމަށް އޭނާ ވިދާޅުވިއެވެ. ރައީސް ވިސްނެވީ ޤައުމަށާއި ރައްޔިތުންނަށް ކަމަށެވެ. މިއަދު އޭގެ ނަތީޖާ ރާއްޖޭގެ ހުރިހާ ރަށަކުން އަދި ވަކިން ޚާއްސަކޮށް ބިލެތްދޫ ދާއިރާއިން ފެންނަކަމަށް ދޮންބިލޭ ވިދާޅުވިއެވެ.
އަޅުގަނޑު ވަރަށް ސާފުކޮށް މިދަންނަވަނީ އަޅުގަނޑުމެން ފަރާތުން މަޖިލިސް ތެރެއިން ދޭންޖެހޭ އެއްބާލުން ދޭނަން. މަޖިލިސް ތެރެއިން ސަރުކާރު ދަމަހައްޓައި، ސަރުކާރުން ބޭނުންވާ ކަންކަން ބޭނުންވާ ގޮތަކަށް ކޮށްދޭން އަޅުގަނޑުގެ އެއްބާރުލުން ލިބޭނެ.
– ދޮންބިލޭ ވިދާޅުވިއެވެ.
ދޮންބިލޭ ވިދާޅުވީ މިސަރުކާރުން ރައްޔިތުންނަށް ތަރައްޤީ ގެނެދީފިކަމަށެވެ. އަދި ބިލެއްދޫ ދާއިރާއަކީ މިއަދު މުޅި ރާއްޖެއަށް ބަލައިލި ނަމަވެސް ތަރައްޤީގެ ގިނަ މަސައްކަތްތަކެއް ކުރެވޭ ދާއިރާއެއްކަމަށް އޭނާ ވިދާޅުވިއެވެ. ދޮންބިލޭ ވިދާޅުވީ އޭނާއަކީ ވަކި މީހެއްގެ މީހެއް ނޫންކަމަށާއި، އަދި ވަކި މީހަކަށް އޭނާއަށް ނުފޫޒުވެސް ނުފޯރުވޭނެކަމަށެވެ. އަދި ކުރިއަށްދާނީ ދާއިރާގެ ރައްޔިތުން އެދޭ ގޮތަކަށް ކަމަށް ދޮންބިލޭ ވިދާޅުވިއެވެ.
ދޮންބިލޭގެ އެއްބާރުލުން ސަރުކާރަށް ދެއްވާނެކަމަށް ވިދާޅުވިއިރު، ރައްޔިތުންގެ މަޖިލީހުގެ ނާއިބު ރައީސްކަމުގެ މަޤާމުން ގަލޮޅު އުތުރު ދާއިރާގެ މެންބަރު އީވާ ވަކިކުރެއްވުމަށް އެމްޑީޕީގެ ޕާލަމެންޓްރީ ގުރޫޕުން މަޖިލިހަށް ހުށަހެޅި ޕެޓިޝަންގައި ސޮއި ނުކުރާ އެމްޑީޕީގެ މެމްބަރުންގެ ތެރޭގައި އޭނާ ހިމެނެއެވެ.
