ޓީމުތަކަށް ފަރިތަކުރުންތައް ބޭއްވުމުގެ ހުއްދަ ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ދީފައިވާ ކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.
އެފްއޭއެމުން ބުނީ ނިއު ނޯމަލްގައި ޕްރެކްޓިސްތައް ކުރިޔަށްގެންދާނެ ގޮތްތައް އަދި ފައިނަލްނުވާ ކަމަށާއި ކަމާބެހޭ ފަރާތްތަކާއެކު ބާއްވާ މަޝްވަރާތަކަށްފަހު އާ ގައިޑްލައިނެއް އެކުލަވާލުމުގެ މަސައްކަތް ކުރަމުންގެންދާ ކަމަށެވެ.
ފަރިތަކުންތައް ފެށުމަށް ހުއްދަދީފަވަނީ މިދިޔަހަފްތާގެ ބުރާސްފަތި ދުވަހުކަމަށް އެފްއޭއެމްއިން ބުނެއެވެ. އަދި މާދަމާ އެޗްޕީއޭއާއެކު ބައްދަލުވުމެއް ބާއްވަން ނިންމާފައިވާ ކަމަށާއި މި ބައްދަލުވުމުގައި އެ ގައިޑްލައިން ފައިނަލްކުރެވިގެން ދާނެ ކަމަށާއި އަދި ކުލަބުތަކަށް ޕްރެކްޓިސްތައް ކުރުމުގެ ހުއްދަ ދޭނީ އެ ގައިޑްލައިން ފައިނަލް ވުމުންކަމަށްވެސް އެފްއޭއެމްއިން ބުނެއެވެ.
އާ ސީޒަން ފެށުމަށް އެފްއޭއެމުން މަސައްކަތްކުރަމުން އަންނަނީ މިއަހަރުގެ ފަހުކޮޅުގައެވެ. ނަމަވެސް ފަށާނެ ތާރީހެއް ރަސްމީކޮށް އެފްއޭއެމުން އަދި ހާމައެއްނުކުރެއެވެ. މިފަހަރުގެ ލީގުގައި ވާދަކުރާނީ 8 ޓީމެކެވެ. އެފްއޭއެމް އަންނަނީ އަންނަ ޑިސެމްބަރުމަހުގެ ކުރީކޮޅު ސީޒަން ފެށޭތޯ މަސައްކަތް ކުރަމުންނެވެ.
