ކުރީގެ ރައީސް ޔާމީންގެ ވެރިކަމުގައި އިމާރާތް ކުރި ހިޔާ ފްލެޓްތަކުގެ އަގު ކުޑަކުރާނެ ގޮތްތަކެއް ހޯދިފައިވާކަމަށާއި، ހިތާ ފްލެޓުގައި ދިރިއުޅޭ ރައްޔިތުންނަށް ލުއިތަކެއް ލިބޭނެކަމުގެ ޔަޤީންކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ހިޔާ ފްލެޓުގެ އަގު ސަރުކާރުން ކުޑަކޮށްފައިވާކަމަށް ދެކެވޭ ވާހަކަތަކާއި ގުޅިގެން ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން ރައީސުލްޖުމްހޫރިއްޔާ ވިދާޅުވީ، ހިޔާ ފްލެޓުތަކުގެ އަގު ކުޑަކުރުމަށް މަޝްވަރާތަކެއް ކުރެވޭތާ ދުވަސްތަކެއްވެފައިވާކަމަށެވެ. ރައީސް ވިދާޅުވީ ހިޔާ ފްލެޓަށް ކޮށްފައިވާ އިންވެސްޓްމަންޓަށް ގެއްލުން ނުވާނެގޮތަށް އަދި ސަރުކާރަށްވެސް ގެއްލުން ނުވާނެ ބަދަލުތަކެއް ގެނައުމަށް ނިންމަވާފައިވާކަމަށެވެ. އެގޮތުން ހިޔާ ފްލެޓުތަކުގައި ކުއްޔަށް ދިޮރިއުޅޭ ރައްޔިތުންނަށް ލުއިތަކެއް ލިބޭނެކަަމށާއި، ނަމަވެސް އެ ފްލެޓްތަކަށް ކޮށްފައިވާ ޚަރަދުތައް ބަދަލުވަނީނޫންކަމަށެވެ. ރައީސް ވިދާލުވީ ހިޔާ ފްލެޓުގެ އަގަށް ގެންނަ ހެޔޮ ބަދަލު އަދި ޢާންމުކުރައްވާފައިނުވާކަމަށާއި، ވަރަށް އަވަހަށް ހާމަކުރައްވާނެކަމަށެވެ.
މާނަކީ އެތަނަށް، ހިޔާ ފްލެޓަށް ކުރި ޚަރަދަށް ބަދަލުވަނީއެއްނޫނޭ. ޚަރަދު 25 އަހަރަށް އިތުރުކުރީމަ އަންނަ ޢަދަދު ކުޑަކުރެވޭތޯ، އަދިވެސް ކުޑަކުރެވޭނެ ގޮތް ހުންނާނެ. އަޅުގަނޑުމެންނަށް މަޝްވަރާކޮށް ހޯދުނު ފޯމިއުލާއެއް އެއީ. އެ އަގު ވަރަށް އަވަހަށް ހާމަކުރެވޭނެ.
– ރައީސުލްޖުމްހޫރިއްޔާ ވިދާޅުވިއެވެ.
މައުލޫމާތު ލިބިފައިިވާ ގޮތުގައި ސަރުކާރުން ކުރަމުންދާ މަޝްވަރާތަކުގައި ހިޔާގެ ކުލި 5،300 އަށް ކުޑަކުރުމަށްވަނީ ނިންމާފައެވެ. ނަމަވެސްހިޔާ ފްލެޓުގެ އަގަށް ގެންނަ ބަދަލު ސަރުކާރުން ހާމަކުރައްވާފައެއް ނުވެއެވެ. ހިޔާގެ ކުލި ކުޑަކުރަނީ، އެ ފްލެޓްތަކަށް ދައްކާ ޚަލާސްކުރަންޖެހޭ މުއްދަތުކަމަށްވާ 25 އަހަރަށް، އިތުރު 7 އަހަރު އިތުރުކުރުމަށް ނިންމުމުގެ ސަބަބުންކަމަށް ރިޕޯޓްކޮށްފައިވެއެވެ. އެހެންކަމުން މިހާރު ކުލި ދައްކާ ނިންމަންޖެހޭނެ މުއްދަތު 32 އަހަރަށް އިތުރުވާނެއެވެ.
ހިޔާ ފްލެޓުތަކުގެ މަސައްކަތް ކުރީ ސަރުކާރުގައި ކޮންޓްރެކްޓަރާއި ޙަވާލުކޮށްފައިވަނީ ފްލެޓުތަކުގެ މަޝްރޫޢުގެ ފިނިޝިންގެ މަސައްކަތް ނުހިމަނާކަމަށް މި ސަރުކާރުންވަނީ 2019 ވަނަ އަހަރު ވިދާޅުވެފައެވެ. އެހެންކަމުން ފިނިޝިންގެ ގިނަ މަސައްކަތް ކުރަންޖެހުނީ ފްލެޓު ލިބުނު މީހުން އަމިއްލައަށެވެ.
ހިޔާ ފްލެޓުގެ މިހާރުގެ ކުއްޔަކީ 7500 ރުފިޔާއެވެ. އަދި މެއިންޓަނަންސްގެ 1،000 ރުފިޔާއާއިއެކު ޖުމްލަ 8،500 ރުފިޔާ ކޮންމެ މަހަކު ދައްކަންޖެހެއެވެ. ސަރުކާރުންވަނީ ހިޔާގެ ފިނިޝިންގއަށް ވަކި މުއްދަތެއް ކަނޑައަޅައި އެމުއްދަތުގައި ކުލި ނުދައްކާގޮތަށް ލުއިތަކެއްވެސް ދެއްވާފައެވެ.
