އުމުރުން 11 އަހަރުގެ ކުއްޖަކަށް ޖިންސީ ގޯނާ ކޮށްގެން ދެމީހަކު ހައްޔަރު ކޮށްފައިވާކަން ފުލުހުން ހާމަ ކޮށްފިއެވެ. ފުލުހުން ހާމަކޮށްފައިވާ ގޮތުގައި މިމައްސަލާގައި ހައްޔަރު ކޮށްފައިވަނީ އުމުރުން 63 އަހަރުގެ ފިރިހެނަކާއި 25 އަހަރުގެ ޒުވާނެކެވެ.
މީޑިއާތަކަށް ރޭ ފޮނުވި މެސެޖެއްގައި ފުލުހުން ވިދާޅުވެފައިވަނީ ސައުތު ޕޮލިސް ޑިވިޝަންގައި ހިމެނޭ ރަށަކުން 11 އަހަރުގެ އަންހެން ކުއްޖަކަށް ޖިންސީ ގޯނާ ކުރި މައްސަލައެއް ފުލުހުންނަށް ހުށަހެޅީ ރޭ 23:02 ކަންހާއިރު ކަމަށެވެ. އަދި އެމައްސަލާގައި ކޯޓު އަމުރެއްގެދަށުން 63 އަހަރުގެ ފިރިހެނަކު ހައްޔަރު ކޮށްފައިވާކަމުގައެވެ. އެއަށްފަހު އިރުކޮޅެއް ފަހުން ފުލުހުން ވަނީ ޖިންސީ ގޯނާގެ މައްސަލާގައި 25 އަހަރުގެ ޒުވާނަކުވެސް ހައްޔަރު ކޮށްފައިވާކަންވެސް ހާމަ ކޮށްފައެވެ.
ފުލުހުންގެ ސައުތު ޕޮލިސް ޑިވިޝަންގައި ހިމެނޭ އަތޮޅުތަކަކީ ދެކުނުގެ 4 އަތޮޅު ކަމުގައިވާ ގއ.ގދ، ފުވައްމުލަށް އަދި އައްޑު އަތޮޅެވެ. މި ދެމީހުން ހައްޔަރު ކުރި ވަކި ރަށެއް ހާމަކޮށްފައި ނުވަނީ އަންހެންކުއްޖާގެ ވަނަވަރު ސިއްރު ކުރުމުގެ ގޮތުންނެވެ.
ފުލުހުން ވިދާޅުވެފައިވަނި މިމައްސަލަ ތަހުގީގު ކުރަމުން އަންނަ ކަމުގައެވެ.
