ވިލިމާލޭގައި، މާލެ ސިޓީ ކައުންސިލުން ބަގީގެ ޚިދުމަތް ރަސްމީކޮށް ފަށައިފިއެވެ.
ބަގީގެ ޚިދުމަތް އިފްތިތާޙުކޮށްދެއްވީ މިރޭ ވިލިމާލޭގައި ބޭއްވި ރަސްމިއްޔަތެއްގައި މާލޭ ސިޓީގެ މޭޔަރު ޑރ.މުޙައްމަދު މުޢިއްޒެވެ. މި ރަސްމިއްހޔަތުގައި ވިލިމާލެ ދާއިރާގެ ކައުންސިލަރ ނަހުލާ ޢަލީއާއި ސިޓީ ކައުންސިލްގެ މެމްބަރުންނާއި ވިލިމާލޭގެ ރައްޔިތުން ބައިވެރިވިއެވެ.
މިރޭގެ ރަސްމިއްޔާތުގައި ވާހަކަފުޅުދައްކަވަމުން މޭޔަރު ވިދާޅުވީ މިއީ ފެށުމެއްކަމަށާ، މާލޑޭގެ ރައްޔިތުންނަށް ބޭނުން ޚިދުމަތްތައް ފުރިހަމަ ކުރުމާއި އެހެނިގެން ލުއިފަސޭހަތައް ހަމަޖެއްސުމުގެ މަސައްކަތް އެއްވެސް ތަފާތެއްނެތި ފޯރުކޯށްދެއްވުމަށް ސިޓީ ކައުންސިލުން މަސައްކަތްކުރައްވަމުން ދާނެކަމަށެވެ. އަދި ކުރިއަށް އޮތީ މާ އުފާވެރި ދުވަސްތަކެއްކަމަށާ، އިތުރު ކުރިއެރުމައި ލުއިފަސޭހަކަން ލިބިގެންދާނެކަމުގެ އުންމީ ބޮޑުކަމަށެވެ.
ވިލިމާލެ ދާއިރާގެ ކައުންސިލަރ ނަހުލާ ޢަލީ ވިދާޅުވީ މިއީ އޭނާ ވިލިމާލޭ ރައްޔިތުންނަށް ވެފައިވާ ވަޢުދެއް ފުރިހަމަވުންކަމަށެވެ.
ވިލިމާލޭގައި މާލެ ސިޓީ ކައުންސިލުން ބަގީގެ ޚިދުމަތް މާރޗް މަހުގެ 16 ވަނަ ދުވަހު ވަނީ ޢާންމުކޮށް ފެށިގެންގޮސްފަވެ. މިރޭ ފެށީ ރަސްމީކޮށެވެ.
ޕްރައިވެޓް ހަޔަރ ގެ ގޮތުގައި ބަގީ ނަގާނަމަ އަގު ތަކަކީ:
– 4 ސީޓްގެ ބަގީއަކަށް 6 ރުފިޔާ
– 6 ސީޓްގެ ބަގީއަކަށް 10 ރުފިޔާ
– 12 ސީޓްގެ ބަގީއަކަށް 15 ރުފިޔާ އެވެ.
ވިލިމާލޭގައި ބަގީގެ ޚިދުމަތް ދިނުމަށް ގެނެވުނު ބަގީތަކުގެ ތެރޭގައި، މުދާ އުފުލާ ބަގީ އާއި، ކުއްލި ޙާލަތް ތަކުގައި އިމަރޖެންސީކޮށް ބަލިމީހުންނަށް ދަތުރު ކުރެވޭނެ ގޮތަށް ހެދިފައިވާ ބަގީ ހިމެނެއެވެ. އަދި 4 ސީޓުގެ ބަގީ އާއި، 6 ސީޓުގެ ބަގީގެ އިތުރުން 12 މީހުންގެ ކެޕޭސިޓީ ހިމެނޭ ބަގީ ހިމެނެއެވެ.
މި ބަގީ ތަކަކީ ބެޓެރީ ލައިފް ގިނަވަގުތު ހިފެހެއްޓޭނެ ގޮތަށް ހެދިފައިވާ ވިލިމާލޭގެ މާހައުލާއިވެސް ގުޅޭގޮތަށް ފަރުމާކުރެވިފައިވާ ބަގީތަކެއްކަން ފާހަގަކޮށްލެވެއެވެ.
