ފާއިތުވި ފެބްރުއަރީމަހު ތުރުކީއަށް އައި ބާރުގަދަ ބިންހެލުމުގައި މަރުވި، ގާނާގެ ފުޓުބޯޅަ ކުޅުންތެރިޔާގެ ޖަނާޒާ ގާނާގައި ބާއްވައިފިއެވެ.
ގާނާގެ ވެރިރަށް އަކުރާގައި ބޭއްވުނު ކުރިސްޓިއަން އަޓްސޫގެ ޖަނާޒާއަށް ގާނާގެ ރައީސްގެ އިތުރުން އެތައްސަތޭކަ ބަޔަކުވަނީ ހާޒިރު ވެފައެވެ.
މިޖަނާޒާގައި ވާހަކަ ދައްކަމުން، އަޓްސޫގެ ހުވަފަތް އަނބިކަބަލުން މާރީ-ކްލައިރު ރޫޕިއޯ ބުނެފައިވަނީ، "ދިރިހުރި އިރުވެސް ތިބާދެކެ އިންތިހާއަށް ލޯބިވީ ފަދައިން، މަރިވެދިޔަޔަސް ހަމަ އެފަދައިން ލޯބި ވާނެ" ކަމުގައެވެ.
ޖަނާޒާގައި އަޓްސޫގެ ހުވަފަތް އަނބިކަބަލުންނަށް އޭނާގެ ވާހަކަ ކުރިޔަށް ނުގެންދެވިގެން، ވާހަކައިގެ އަނެއްބައު ފުރިހަމަ ކުރާން ޖެހުނީ އަޓްސޫގެ ދައްތައަށެވެ.
"ވަކިވެގެން ދިޔައީ ގިނިކަންޏާއެއް ނޫން، ތި ދިޔައީ އަހަރެންގެ ހަށިގަޑުގެ އެއްބަޔާ އެކީ،" އަޓްސޫގެ އަނބިކަބަލުން ޖަނާޒާގައި ވާހަކަ ދައްކަމުން ބުނެފައި ވެއެވެ. "ތިބާގެ ހިނިތުންވުމާއި ލޯބި، ތާއަބަދަށް ދަރިންގެ ހިނިތުންވުމުން ފެންނާން އެބަހުރޭ."
އަޓްސޫގެ ޖަނާޒާގައި ގާނާގެ ނޭޝަނަލް ޓީމުގެ ފަރާތުންނާއި، އަޓްސޫ ކުޅެމުންއައި ތުރުކީގެ ހަޓޭސްޕޯރ ކުލަބުންވެސް ބައިވެރި ވެފައިވެއެވެ.
"އަޓްސޫގެ ކެރިއަރުގެ އެންމެ އުހުގައިވެސް އަޓްސޫގެ ދެމިހުރީ ފުރިހަމަ ޝަޚުސިއްޔަތެއްގެ ގޮތުގައި. ބޮޑަކަމާއި، ގޮތް ދޫނުކުރުމުގެ މައްޗަށް އޭނާ އިސްކޮށްފައިވަނީ ރިވެތި އަޚުލާގު،" މި ރަސްމިއްޔާތުގައި ވާހަކަ ދައްކަވަމުން ގާނާގެ ކުޅިވަރާބެހޭ ވަޒީރު މުސްތަފާ އުސިފް ވިދާޅުވެފައި ވެއެވެ.
އުމުރުން 31 އަހަރުގެ އަޓްސޫގެ ކެރިއަރުގެ ބޮޑުބައި އޭނާ ހޭދަކޮށްފައިވަނީ އިނގިރޭސި ޕްރިމިއަރ ލީގަށް ކުޅުމުގައެވެ. އޭނާ ކުޅެފައިވާ ޓީމްތަކުގެ ތެރޭގައި ޗެލްސީއާއި ނިއުކާސަލްއާއި އެވަރޓަން ހިމެނެއެވެ. އުމުރުން 31 އަހަރުގެ އަޓްސޫ ބިންހެލުން އައުމާއި ހަމައަށް ކުޅެމުން ދިޔައީ ތުރުކީގެ ހެޓޭސްޕޯ އަށެވެ. އެޓީމަށް އަޓްސޫ ބަދަލުވީ 2022 ވަނަ އަހަރުގެ ސެޕްޓެމްބަރު މަހުއެވެ.
2011 ވަނަ އަހަރު ޕޯޓޯ އިން ކްލަބް ކެރިއަރު ފަށައި އަޓްސޫ ވަނީ 2013 ވަނަ އަހަރު ޗެލްސީ އަށް ބަދަލުވެފައެވެ. އޭގެފަހުން އަޓްސޫ ވަނީ ޕްރިމިއާ ލީގުގެ އެވަޓަން އާއި ބޯންމައުތުގެ އިތުރުން ނިއުކާސަލް ޔުނައިޓެޑަށް ކުޅެފަ އެވެ. ލޯނު އުސޫލުން އެންމެ ފުރަތަމަ ނިއުކާސަލަށް ބަދަލުވީ 2016 ވަނަ އަހަރުއެވެ. އެ ކްލަބުގައި ފަސް ސީޒަން ހޭދަކުރިއިރު ރަނގަޅު ކުޅުމެއް ދެއްކިއެވެ.
އަޓްސޫ ވަނީ ނެދަލެންޑްސްގެ ވިޓެސީ އާއި ސްޕެއިންގެ މަލާގާ އަށް ވެސް ކުޅެފައެވެ. އަޓްސޫ ތުރުކީގައި ކުޅޭ ކްލަބް ނިސްބަތްވަނީ އެގައުމުގެ އަންޓަކްޔާ އަށެވެ. އެއީ ސީރިޔާ ބޯޑަރާ ކައިރިން ތުރުކީގެ ދެކުނުން އޮންނަ ހެޓޭ ޕްރޮވިންސް އަށް ނިސްބަތްވާ ސިޓީ އެކެވެ.
އަޓްސޫ ވަނީ އެޓީމު، ބިންހެލުން އައި ހަފްތާގެ އާދީއްތަ ދުވަހު ކުޅުނު މެޗުގައި ބަދަލު ކުޅުންތެރިއެއްގެ ގޮތުގައި ކުޅެން އަރައި މޮޅުވި ގޯލު ޖަހައިފައެވެ.
އަޓްސޫވަނީ ގާނާގެ ގައުމީ ޓީމަށްވެސް 65 މެޗު ކުޅެދީފައެވެ. އަދި 2015ވަނަ އަހަރު އިކުއެޓޯރިއަލް ގިނީގައި އޮތް އެފްރިކާ ކަޕް އޮފް ނޭޝަންސްގެ ފައިނަލަށް ގާނާ ގެންގޮސްދިނުމުގައި އޭނާވަނީ އެހީތެރިވެދީފައެވެ. އެ މުބާރާތުގައި އޭނާއަށްވަނީ މުބާރާތުގެ ގޯލް އެންޑް ޕްލޭޔަރގެ އެވޯޑްވެސް ލިބިފައެވެ.
