ވެރިކަން ކުރާ ކޯލިޝަންގައި ހިމެނޭ އެމްއާރުއެމްއިން ކ.ކާށިދޫގައި ތިބި އެޕާޓީގެ އާންމު މެމްބަރުންނާއި ބައްދަލު ކުރުމަށް ޚާއްސަ ދަތުރެއްކޮށްފިއެވެ.
މިދަތުރުގައި އިސްކޮށް ހަރަކާތްތެރިވީ އެމްއާރުއެމްގެ ރައީސް ފާރިސް މައުމޫނެވެ. މިދަތުރުގައި އެޕާޓީގެ ކައުންސިލްގެ ބައެއް މެމްބަރުންވެސް ބައިވެރިވެފައިވެއެވެ. މިދަތުރަކީ ކާށިދޫގައި ތިބި އެމްއާރުއެމްގެ އާންމު މެމްބަރުންނާއި، އަދި އެރަށުގެ ރައްޔިތުންގެ ހާލަތު އޮޅުންފިލުވުމަށް ކުރި ދަތުރެކެވެ.
އެމްއާރުއެމްއަކީ ރައީސް މައުމޫން އިސްކޮށް ހުންވައިގެން އުފެއްދެވިި ސިޔާސީ ޕާޓީއެކެވެ. އެޕާޓީން ގެންދަނީ މެމްބަރުން އިތުރުކުރުމުގެ ހަރަކާތްތަކެއްވެސް ކުރިއަށް ގެންދަމުންނެވެ.
ފާރިސް މައުމޫން ކާށިދޫއަށް އިއްޔެ ކުރި ދަތުރުގެ ތެރެއިން.
އެރަށުގެ ރައްޔިތުންނާއި ރަށު ކައުންސިލްއާއި ބައްދަލުކުރެެއްވި. pic.twitter.com/I9LgAQwtDq
— Team MRM (@TeamMRM_) March 15, 2023
ކުރިއަށް އޮތް ރިޔާސީ އިންތިޚާބުގައި އެމްއާރުއެމްއިން އަމަލުކުރާނެ ގޮތެއް އަދި ނިންމާފައި ނުވެއެވެ. އެމްޑީޕީގެ ކެނޑިޑޭޓް ރައީސް އިބްރާހިމް މުހައްމަދު ޞާލިހުގެ ފަރާތްޕުޅުން ކޯލިޝަން މަޝްވަރާ ކުރުމަށް އެޕާޓީއަށް ސިޓީއެއް ފޮނުވާފައިވާއިރު، އެޕާޓީން ވަނީ ރައީސް މައުމޫން ރާއްޖޭ ވަޑައިގެންނެވުމުން މަޝްވަރާ ކުރުމާއިމެދު އެޕާޓީން ގޮތްތަކެއް ނިންމާނެކަމަށް ބުނެފައެވެ.
އެމްއާރުއެމްއިން ސަރުކާރު ކޯލިޝަންގައި އޮތް ނަމަވެސް ސަރުކާރުން ނިންމާ ބައެއް ނިންމުންތަކާއި، ބައެއް ސިޔާސަތުތަކަށް އެޕާޓީން ދަނީ ފާޑުކިޔަމުންނެވެ.
