މިމަހުގެ 6 ވަނަ ދުވަހު ތުރުކީ އަދި ސީރިއާއަށް އައި ބާރުގަދަ ބިންހެލުމުގައި ދެގައުމުން މަރުވީ މީހުންގެ އަދަދު 45 ހާހުން މައްޗަށް އަރައިފިއެވެ.
ތުރުކީގެ ރަސްމީ އިދާރާތަކުން ހާމަ ކޮށްފައިވާ ގޮތުގައި ބިންހެލުމުގައި ގެއްލުން ލިބި، ތަޅާލަން ޖެހޭވަރަށް ހަލާކުވެފަފައިވާ އިމާރާތްތަކުގެ އަދަދު 84،000 އަށް އަރާފައި ވާކަމުގައެވެ.
ތުރުކީގެ ފަހުގެ ތާރީޚުގައި އެގައުމަށް ކުރިމަތިވި އެންމެ ގެއްލުންބޮޑު ބިންހެލުމުގައި އަދިވެސް މީހުން ސަލާމަތްކުރުމުގެ މަސައްކަތް އެގައުމުގައި ކުރިޔަށްދާއިރު، ވާރލްޑް ފުޑް ޕްރޮގްރާމުން ވަނީ، ސީރިއާގެ ހުޅަނގު އުތުރުން، މި ބިންހެލުމުން ގެއްލުން ލިބިފައިވާ ސަރަހައްދުތަކަށް އެހީ ފޯރުކޮށް ދިނުމަށް ހުރަސް ނޭޅުމަށް ކަމާއި ގުޅުންހުރި މުވައްސަސާތަކަށް ގޮވާލާފައެވެ.
މި ބިންހެލުމުގައި ތުރުކީން 40,642 މީހުން މަރުވެފައިވާކަން މިހާތަނަށް ޔަގީން ކުރެވިފައިވާއިރު، ސީރިއާއިން 5,800 މީހުން ވަނީ މަރުވެފައެވެ. ސީރިއާއިން މަރުވި މީހުން އަދަދަށް ބަދަލު ނާންނަތާ މިހާރުވަނީ ދުވަސްތަކެއް ފާއިތުވެގެން ގޮސްފައެވެ.
ސިއްޙީ ފަރާތްތަކުން ވަނީ، މި ބިންހެލުމުގައި ގެއްލުން ލިބުނު ސަރަހައްދުތަކުގެ ފާޚާނާގެ ނިޒާމުތަކަށް ބޮޑެތި ގެއްލުން ލިބިފައިވާތީ، މި ސަރަހައްދުތަކުގައި ބަލިމަޑުކަމެއް ފެތުރިގެން ހިގައިދާނެކަމުގެ ކަންބޮޑުވުން ފާޅުކޮށްފައެވެ.
މީގެ އިތުރުން ބިންހެލުން އައިތާ 14 ދުވަސް ފާއިތުވެގެން ގޮސްފައިވާއިރު، އަދިވެސް ވެެއްޓިފައިވާ އިމާރާތްތަކުގެ ދަށުން ދަނީ ދިރިތިއްބާ މީހުން ފެންނަމުންނެވެ.
ތުރުކީގެ ސަރުކާރުން ވަނީ، އިމާރާތްތައް ބަލިކަށިކޮށް އިމާރާތްކޮށްފައިވާ ކަމުގެ ތުހުމަތުގައި ގިނަބަޔަކު ހައްޔަރު ކޮށްފައެވެ. އަދި ތަހުގީގުކޮށް، އިމާރާތްތައް ވެއްޓުމުގައި އިހުމާލުވެފައިވާ ހުރިހާ ފަރާތްތަކެއްވެސް އިންސާފުގެ ކުރިމައްޗަށް ގެންނާނެ ކަމުގައިވެސް ތުރުކީގެ ސަރުކާރުންވަނީ ބުނެފައި ވެއެވެ.
