އައްޑޫ ސިޓީގައި ސަރުކާރުން ކުރިއަށް ގެންދާ މަގު ހެދުމުގެ މަޝްރޫއުގައި ހުރި ކަންބޮޑުވުންތަކަށް ހައްލު ހޯދައިދިނުމުގެ ގޮތުން ޕްލޭނިން މިނިސްޓަރު މުހައްމަދު އަސްލަމު އައްޑޫ އަށް ވަޑައިގެންފިއެވެ.
މިނިސްޓަރު އަސްލަމު ރޭގެ ވަގުތެއްގައި އައްޑޫއަށް ވަޑައިގެން ކަމާ ގުޅޭ ފަރާތްތަކާ މިއަދު ހެނދުނު ބައްދަލުކުރައްވައި މަޝްވަރާތައް ވަނީ ފައްޓަވާފައެވެ. އިންޑިއަން އެގްޒިމް ބޭންކްގެ 800 މިލިއަން ޔޫއެސް ޑޮލަރގެ ލައިން އޮފް ކްރެޑިޓް ފެސިލިޓީގެ ދަށުން ހިންގާ މި މަޝްރޫޢު ހަވާލުކޮށްފައިވަނީ އެފްކޯންސް އިންފްރާސްޓްރަކްޗަރ ލިމިޓެޑާއެވެ. 77.6 މިލިއަން އެމެރިކާ ޑޮލަރު ނުވަތަ 1.1 ބިލިއަން ދިވެހި ރުފިޔާ ޚަރަދުކޮށްގެން ހިންގާ މި މަޝްރޫޢު 730 ދުވަސް ތެރޭގައި ނިންމަންޖެހެއެވެ.
މަގުގެ މަސައްކަތްކުރާ އިންޑިއާގެ ކޮންޓްރެކްޓަރު އެފްކޮންސް އާއި ޕްރޮޖެކްޓް ކޮންސަލްޓަންޓް އަދި އައްޑޫ ސިޓީ ކައުންސިލާއެކު މިއަދު ހެނދުނު 9:00 ގައި މަޝްވަރާތައް ވަނީ ފަށާފައެވެ. އެފްކޮންސް ކުންފުންޏާ ހަވާލުކޮށްގެން ހަދާ މަގުތަކާ ގުޅޭގޮތުން އާއްމުންގެ ޝަކުވާ ބޮޑުވުމުން، އެ ކަންބޮޑުވުންތަކަށް ހައްލެއް ގެނެސްދިނުމަށް ކަމާގުޅޭ ފަރާތްތަކުން މަޝްވަރާކުރިއެވެ. ނަމަވެސް އެ ބައްދަލުވުންތަކުން ވެސް އެކަށީގެންވާ ނަތީޖާއެއް ނުނިކުތުމުން އަސްލަމް ނިންމެވީ ދުވަސްކޮޅަކު އައްޑޫގައި މަޑުކުރައްވާށެވެ.
މިގޮތުން މިއަދު ފަށާފައިވާ ދަތުރުގައި އަސްލަމް މިކަމަށް ހައްލު ހޯދައި ދިނުމަށް ކުރަންޖެހޭ މަޝްވަރާތައް ކުރުމަށާއި، ދާއިމީ ހައްލު ހޯދުމަށް އެއްމަސް ދުވަހުގެ މުއްދަތަކަށް މަޑު ކުރުމަށް ހަމަޖެހިފައިވާކަމަށް މައުލޫމާތު ލިބިފައިވެއެވެ.
އައްޑޫ ސިޓީގެ މަގުތައް ހެދުމުގެ މަސައްކަތް ކުރަނީ ތިލަމާލެ ބްރިޖު އެޅުމުގެ މަސައްކަތް ކުރަމުންދާ އިންޑިއާގެ އެފްކޮންސް ކުންފުނިންނެވެ. އައްޑޫ ސިޓީގެ މަގުތައް ހަދަމުންދާއިރު ރައްޔިތުންގެ މައިގަނޑު ކަންބޮޑުވުމަކީ މަގުގައި އުޅަނދު ދުއްވަން އޮންނަ ބައި ކުރިއަށް ވުރެ ކުޑަކޮށް، ކުރިއަށް ވުރެ ދުވާރު ބޮޑުކުރުމެވެ. މަގު ހެދުމަށް މަގު ކޮނުމަށްފަހު ގިނަ ދުވަސްތަކެއް ވަންދެން ބަހައްޓަން ޖެހުމާއި އެފަދަ ބައެއް ވަޅުގަނޑުތަކަށް އާންމުންނާއި ވެހިކަލް ވެއްޓޭ މައްސަލަ އަކީވެސް ކަންބޮޑުވުމެކެވެ. އަދި ދުވާރު ހަދާއިރު ބައެއް ގޭގެއަށް އުޅަނދު ވައްދަން ދަތިވާ މައްސަލަ ވެސް ރައްޔިތުން ފާހަގަކުރެއެވެ.
އައްޑޫ ސިޓީގެ މަގުތަކުގައި ގާ އަތުރައިގެން މަގުތައް ހެދުމަށް އެފްކޮންސް ކުންފުންޏާ ހަވާލުކުރީ ފެބްރުއަރީ 2021 ގައެވެ. ޖުމްލަ 107 ކިލޯމީޓަރުގެ މަގު ހެދުމުގެ މަޝްރޫއުގެ އަމަލީ މަސައްކަތް މިދިޔަ އަހަރުގެ ފެބްރުއަރީ 18 ވަނަ ދުވަހު ފަށާފައިވާއިރު މިމަޝްރޫއު ނިންމަން ދިނީ ދެ އަހަރު ދުވަހެވެ.
