ތުރުކީއަށް އައި ބާރުގަދަ ބިންހެލުމުގައި، ބިންހެލުން އައި ސަރަހައްދު ތަކުގައި ހުރި ބިޔަ ގިނަ އިމާރާތްތައް ވެއްޓި ބިމާހަމަ ވެފައިވާތީ، ކުރިޔަށް ގެންދާ ތަހުގީގަށް މިހާތަނަށް 12 މީހަކު އެގައުމުގެ ކަމާބެހޭ މުވައްސަސާތަކުން ހައްޔަރު ކޮށްފައިވާކަމަށް މީޑިއާ ރިޕޯޓުތައް ބުނެފިއެވެ.
ތުރުކީގެ ލޯކަލް މީޑިއާތަކުން ބުނެފައިވަނީ ފުލުހުން މި 12 މީހުން ހައްޔަރު ކޮށްފައިވަނީ އެގައުމުގެ އިރުދެކުނުގެ ޕްރޮވިންސްތައް ކަމުގައިވާ ގަޒިއާންޓެޕް އަދި ސަންލިއުފާއިން ކަމުގައެވެ.
ފުލުހުން ހައްޔަރު ކޮށްފައިވާ ފަރާތްތަކުގެ ތެރޭގައި ކޮންޓްރެކްޓަރުންވެސް ހިމެނޭކަމަށް ލޯކަލް މީޑިއާތަކުން ރިޕޯޓު ކޮށްފައި ވެއެވެ.
ތުރުކީއަށް އައި 7.8 މެގްނިޓިއުޑްގެ ބާރުގަދަ ބިންހެލުމުގައި މިހާތަނަށް ޖުމްލަ 6،000 އިމާރާތެއް ބިމާއި ހަމަވެފައި ވެއެވެ. މި ބިންހެލުމުގައި ވެއްޓުނު އިމާރާތްތަކުގެ ދަށުވެގެން މިހާތަނަށް 25،000 މީހުން ތުރުކީއާއި އަވައްޓެރި ސީރިއާގައިވަނީ މަރުވެފައެވެ. އަދި މި ހާދިސާތަކާއި ގުޅިގެން، ތުރުކީގައި ފެންވަރު ދަށްކޮށް އިމާރާތް ކުރަމުންދާކަމަށް ބުނެ އެތައް ބައެއްގެ ރުޅިވެރިކަން ވަނީ އެގައުމުގެ ސަރުކާރަށް އަމާޒުވެފައެވެ.
މި ބިންހެލުމުގައި ގެއްލުން ލިބުނު ތުރުކީގެ އިރު ދެކުނުގެ 10 ޕްރޮވިންސްގެ ތެރެއިން އެއް ޕްރޮވިންސް ކަމުގައިވާ ޑިޔަބަކިރ ޕްރޮވިންސްގެ ޕަބްލިކް ޕްރޮސެކިއުޓަރ މިހާރުވަނީ އިތުރު 29 މީހަކު ހައްޔަރު ކުރުމުގެ އަމުރު ނެރުއްވާފައެވެ. ޚަބަރުފަތުރާ ވަސީލަތްތަކުން ބުނާ ގޮތުގައި އަދިވެސް އިތުރު މީހުން ހައްޔަރު ކުރާނެކަމަށް ބެލެވެއެވެ.
ތުރުކީގައި ހައްޔަރު ކޮށްފައިވާ މީހުންގެ ތެރޭގައި ހިމެނޭ އެއް ފަރާތަކީ ބިންހެލުމުގެ އަސަރު ވަރަށް ބޮޑަށް ކޮށްފައިވާ ގަޒިއާންޓެޕްގައި އިމާރާތްކުރުމުގެ މަސައްކަތް ފުޅާ ދާއިރާއެއްގައި ކުރާ ފަރާތެކެވެ. ތުރުކީގެ ފުލުހުން އޭނާ ހައްޔަރު ކޮށްފައިވަނީ ވެރިރަށް އިސްތަމްބޫލްއިންނެވެ.
ތުރުކީއަށްއައި ބާރުގަދަ ބިންހެލުމުގައި މަރުވެފައިވާ މީހުންގެ އަދަދު މިހާރު 25،000 އަށް އަރާފައިވާއިރު އޭގެ ތެރެއިން 21,848 މީހުންނަކީ ތުރުކީގެ ރައްޔިތުންނެވެ. ބާކީ ތިބި މީހުންނަކީ ސީރިއާގައި މަރުވެފައިވާ މީހުންނެވެ.
