މިހަފްތާގެ ހޯމަދުވަހު ތުރުކީގެ ދެކުނުގެ ސަރަހައްދަށާއި، އަދި ސީރިއާގެ އުތުރަށް އައި ވަރުގަދަ ބިންހެލުމުގައި ތުރުކިއާއި ސީރިއާގައި މަރުވި މީހުންގެ އަދަދު 15،000 އަށްވުރެ މައްޗަށް އަރައިފިއެވެ.
މިގޮތުން ބިންހެލުމުގައި މިހާތަނަށް ތުރުކީން 12,391 މީހުން މަރުވެފައިވާކަން ޔަގީން ކުރެވިފައިވާއިރު، ސީރިއާގައި 2,992 މަރުވެފައިވާކަން ވަނީ ޔަގީން ކުރެވިފައެވެ.
މި ބާރުގަދަ ބިންހެލުމުގައި މީހުން ސަލާމަތް ކުރުމުގެ މަސައްކަތް ހުއްޓުމެއް ނެތި ކުރިޔަށް ދާއިރު، އިމާރާތްތައް ބިމާއި ހަމަވެފައިވާ ސަރަހައްދު ތަކުގައި މީހުން ސަލާމަތް ކުރުމުގެ މަސައްކަތް ދަނީ ލަސްކޮށް ކަމުގެ ޝަކުވާތައްވަނީ ވަރަށް ބޮޑުވެފައެވެ. އަދި އިމާރާތްތަކުގެ ދަށުވެފައިވާ މީހުންގެ ގާތްތިމާގެ ފަރާތްތަކުން ދަނީ، އެމީހުންގެ އާއިލާގެ މީހުން ސަލާމަތް ކުރެވުމާމެދު ކުރެވެމުންދާ އުއްމީދުތައް ފަނޑުވަމުން ދާކަމަށް ބުނަމުންނެވެ.
މިގޮތުން ބިންހެލުމުގައި މީހުން ސަލާމަތް ކުރުމާއި، އެހީ ފޯރުކޮށް ދިނުމުގެ ކަންކަން ތުރުކީގެ ސަރުކާރަށް އެކަށީގެންވާ ގޮތެއްގައި ކުރިޔަށް ނުގެންދެވޭކަމުގެ ޝަކުވާތަކާއެކު، ގިނަބައެއްގެ ނުރުހުން އަމާޒު ވެފައިވަނިކޮށް، އެގައުމުގެ ރައީސް ރެސެޕް ތައްޔިބު އެރެދޮގާން ވަނީ ބިންހެލުން އައި ސަރަހައްދުތަކަށް ޒިޔާރަތް ކުރައްވައިފައެވެ.
އަދި އެރެދޮގާންވަނީ މީހުން ސަލާމަތް ކުރުމުގެ މަސައްކަތްތައް ފެށިގެން ދިޔައިރު ކުރިޔަށް ގޮސްފައިވަނީ ލަސްކޮށް ކަމަށް އެއްބަސްވެވަޑައިގެންފައެވެ. އެހެންނަމަވެސް ވިދާޅުވެފައިވަނީ، އެއީ ގިނަ މަގުތަކާއި އަދި އެއަރޕޯޓުތައް ބިންހެލުމުގައި ހަލާކުވެފައި ވުމުގެ ސަބަބުން ކުރިމަތިވީ ހާލަތެއް ކަމުގައެވެ.
ފާއިތުވި ހޯމަދުވަހު ބިންހެލުން އައި ސަރަހައްދުގެ ފިނިހޫނުމިން 5- ޑިގްރީއަށް މިހާރު ވެއްޓިފައިވާއިރު، މި ސަރަހައްދުތަކުގައި އެތައް ހާސް އާއިލާއެއް، ގަދަ ފިނީގައި ވަގުތު ހޭދަކުރަމުންދަނީ ކާރުތަކުގެ އެތެރޭގައާއި އަދި ޓެންޓުތަކުގެ އެތެރޭގައި ކަމަށް މީޑިއާތަކުންވަނީ ރިޕޯޓު ކޮށްފައެވެ. އޭގެ އެއް ސަބަބަކީ، އެމީހުންގެ ގެތަކަށް އެނބުރި ދިއުމަކީ ރައްކާތެރި ކަމެއްގެ ގޮތުގައި ބެލެވިފައި ނެތުމެވެ.
