ޅ.ފެލިވަރު ބިން ހިއްކުމާއި ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތުގެ 84.91 ޕަސެންޓް ނިމިއްޖެކަމަށް މިމަސައްކަތް ކުރިއަށް ގެންދާ އެމްޓީސީސީން ބުނެއފިއެވެ.
އަދި މިމަޝްރޫއުގެ ދަށުން ކުރިއަށްގެންދާ އެރަށު ބިން ހިއްކުމާއި ބޭރުތޮށި ލުމުގެ މަސައްކަތް މިހާރުވަނީ މުޅިން ނިމިފައިކަމަށްވެއް އެމްޓީސީސީން ބުނެއެވެ.
ޅ. ފެލިވަރު ބިން ހިއްކުމާއި ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތް ފަށާފައިވަނީ މިދިޔަ އެޕްރީލް މަހުގެ 23ގައެވެ.
ޅ. ފެލިވަރު ބިން ހިއްކުމާއި ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތުގެ 84.91 ޕަސެންޓް ނިމިއްޖެ. އަދި ބިން ހިއްކުމާއި ބޭރުތޮށި ލުމުގެ މަސައްކަތް ވަނީ ނިމިފައި.#MTCCProjects #RayyithungeKunfuni pic.twitter.com/I7784UTeH9
— MTCC Plc (@MTCCPlc) January 10, 2023
ފެލިވަރު ތަރައްޤީކުރުމުގެ މަސައްކަތް ކުރިއަށްގެންދަނީ އިންޑިއާގެ އެގްޒިމް ބޭންކްގެ އެހީގައެވެ. މި މަޝްރޫޢުގެ އެންމެ ބޮޑު ބޭނުމަކީ ފެލިވަރުގެ ފްރީޒިންގް ކެޕޭސިޓީ އިތުރުކޮށް، މަސްގަނެ ޕްރޮސެސްކުރާ މިންވަރު އިތުރުކުރުމެވެ. އަދި ފެލިވަރުގެ ބަނދަރަކީ ބައިނަލްއަޤްވާމީ ބޯޓުފަހަރަށް ފަސޭހަކަމާއެކު ކައިރިކޮށް ޚިދުމަތް ދެވޭ ފެންވަރުގެ ބަނދަރެއްގެ ގޮތުގައި ތަރައްޤީކުރުމެވެ. ފެލިވަރު ހިއްކާ ބަނދަރު ބޮޑުކުރުމުގެ މަސައްކަތް އެމްޓީސީސީއާ ހަވާލުކުރީ 2021ވަނަ އަހަރުގެ ޖެނުއަރީމަހުއެވެ.
ފެލިވަރު ތަރައްޤީ ކުރުމުގެ މަސައްކަތްތައް ފަށާފައި މިވަނީ، ކޫއްޑޫއާއި އައްޑޫގެ ފިޝަރީޒް ކޮމްޕްލެކްސްގެ ތަޖުރިބާއަށް ބަލާ، ޚިދުމަތް ދިނުމަށް އެންމެ ލުއިސޭހަވާނެ ގޮތްތައް ބަލައިގެންކަމަށް މިފްކޯއިން ބުނެފައިވެއެވެ. ފެލިވަރު އިތުރަށް ތަރައްޤީ ކުރުމަށް ހިންގާ މަޝްރޫޢުގެ ދަށުން އެރަށުގައި 4000 ޓަނުގެ ކޯލްޑް ސްޓޯރޭޖެއް ނުވަތަ ފިނި ކޮށާރަކާއި، ދުވާލަކު 100 ޓަނުގެ މަސް ޕްރޮސެސްކޮށް، ދަޅުގައި އަދި ޕައުޗުގައި ބަންދުކުރެވޭނެ ކާރުޚާނާއެއް ޤާއިމުކުރުމަށް ވަނީ ހަމަޖެހިފައެވެ.
މީގެއިތުރުން ބްރައިން ފްރީޒިންގ ފެސިލިޓީއާއި، ރެފްރިޖަރޭޓަޑް ސީ ވޯޓަރ ފެސިލިޓީއާއި، ފިޝްމީލް ޕްލާންޓަކާއި އެހެނިހެން ވަޞީލަތްތައްވެސް ފެލިވަރުގައި ޤާއިމުކުރާނެއެވެ.
މިއީ ފެލިވަރު ތަރައްޤީކުރެވުނީއްސުރެ، ކެޕޭސިޓީ އިތުރުކުރުމަށް ހިންގޭ އެންމެ ބިޔަ މަޝްރޫޢުއެވެ. އެކި ނަންނަމުގައި ފެލިވަރާއެކު މިފްކޯގެ ޚިދުމަތް ފެށީ މީގެ 44އަހަރު ކުރިންނެވެ.
