ރައްޔިތުންގެ މަޖިލިހުގައި ކުރިން ވަރަށް ބޮޑަށް ނަޝީދޮށް ތާއީދުކޮށް ވާހަކަ ދެއްކެވުމަށްފަހު، އެމްޑީޕީގެ އެތެރޭގަ އޮތް ސިޔާސީ ވާދަވެރިކަމުގައި ފަހުން ހަނު ހުންނަވަމުން ގެންދެވި، ބިލެތްދޫ ދާއިރާގެ މެމްބަރު ދޮނބިލެތް ހަލީމު، މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީ ކެމްޕޭންގައި ނަޝީދުގެ ކެމްޕޭން ޓީމާއި ގުޅިވަޑައިގެންފިއެވެ.

އެމްޑިޕީގެ އެތެރޭގަ ރައީސް އިބުރާހިމް މުހައްމަދު ސާލިހުއާއި ނަޝީދުއާއި ދެބޭފުޅުންގެ މެދުގައި ޚިޔާލު ތަފާތުވުން އުފެދި، ޕާޓީ ދެފެކްޝަނަކަށް ބެހިގެން އައިއިރު ދޮންބިލެތް ހަލީމު ފާހަގަވެގެން ދިޔައީ. ފާޅުގައި ނަޝީދު ފެކްޝަނަށް ތާއީދުކޮށް، ރައްޔިތުންގެ މަޖިލިހުގައި އެންމެ ބޮޑަށް ސަރުކާރަށް ފާޑު ވިދާޅުވަމުން ގެންދެވި އެއް ބޭފުޅެއްގެ ގޮތުގައެވެ.

އެހެންނަމަވެސް ފަހަކަށް އައިސް ކުއްލިއަކަށް އޭނާގެ އަޑު ފަނޑުވެ، އޭނާވަނީ ރައްޔިތުންގެ މަޖިލީހުގައާއި އަދި މީޑިއާގައިވެސް ވަކި ފަރާތަކަށް ޖެހި ވާހަކަ ދެއްކެވުން ހުއްޓަވާލައްވާފައެވެ.

އެއަށްފަހު ދުވަސްތަކެއް ފާއިތުވެ ދިއުމަށްފަހު ދޮންބިލެތް މިހާރުވަނީ ފާފު އަތޮޅުގައި ކުރިޔަށްދާ ނަޝީދުގެ ކެމްޕޭންދަތުރުތަކުގައި ނަޝީދުއާއެކީ ބައިވެރިވާން ފައްޓަވާފައެވެ.

މިހާރު ކުރިޔަށްދާ އެމްޑީޕީގެ އެތެރޭގެ އިންތިޚާބުގައި ރައީސް ސާލިހާއި ނަޝީދުއާއި ދެބޭފުޅުން ފޯރިއާއެކު ކެމްޕޭން ކުރައްވަމުން ގެންދަވާއިރު، އެޕާޓީގެ ބައެއް މަޖިލިސް މެމްބަރުންވެސް ގެންދަވަނީ ކޮޅު ބަދަލު ކުރައްވަމުންނެވެ.

މިގޮތުން، މީގެކުރިން ރައީސް ސާލިހަށް ތާއީދުކޮށް ކެމްޕޭން އިވެންޓުތަކުގައިވެސް ބައިވެރިވަމުން ގެންދެވި، ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބުދުއްލަތީފް ވަނީ ރައީސް ސާލިހަށް ކުރައްވަމުން ގެންދެވި ތާއީދު އަބުރާ ގެންދަވާ، ނަޝީދަށް ތާއީދު ކުރައްވަން ފައްޓަވާފައެވެ.

ހަމައެއާއެކު، ކުރިން އެމްޑީޕީގެ ނަޝީދު ފެކްޝަނަށް ތާއީދު ކުރަމުންދިޔަ ބައެއް މެމްބަރުން ފަހުން ރައީސް ސާލިހުއަށް ތާއީދު ކުރާކަން ހާމަކޮށް، ކޮޅު ބަދަލު ކުރައްވާފައިވެއެވެ. ހަމަ އެއާއެކު، އަދިވެސް އެޕާޓީގެ ބައެއް މެމްބަރުން ވަކި އަތަކަށް ތާއީދުކުރާ ހާމަނުކޮށް ހަނު ތިއްބެވިކަންވެސް ފާހަގަ ކޮށްލެވެއެވެ.