ރާއްޖޭގެ ދެކުން އައްޑު އަތޮޅާއި 600 ކިލޯ މީޓަރު ދުރުގައި، މޮރިޝަސްއާއި 2،200 ކިލޯ މީޓަރު ދުގައި އޮންނަ ފޯޅަވައްސަކީ މޮރިޝަސްގެ ބައެއްގެ ގޮތުގައި ބަލައިގަތުމަށް ސަރުކާރުން އެއްބަސްވުމާއި ގުޅިގެން ސަރުކާރަށް އަމާޒުވެފައިވާ ފާޑު ކިއުންތަކަށް އިކޮނިމިކް މިނިސްޓަރު ފައްޔާޒު އިސްމާއިލް ރައްދު ދެއްވައިފިއެވެ.

މިގޮތުން، ފޯޅަވައްސަކީ ރާއްޖޭގެ ބައެއްކަމަށް ދިވެހިރާއްޖެއަށް ދައުވާ ކުރެވޭނެކަމަށް ވިދާޅުވެ، ރައްޔިތުންގެ މަޖިލިހުގެ ރައީސް މުހައްމަދު ނަޝީދު ދައްކަވަމުން ގެންދަވާ ވާހަކަފުޅުތަކަށް ރައްދު ދެއްވަމުން ފައްޔާޒު އިސްމާއިލް ވިދާޅުވެފައިވަނީ، ފޯޅަވައްސަކީ ރާއްޖޭގެ ބައެއްކަމަށް ނަޝީދު މިހާރު ދައުވާ ކުރައްވާނަމަ، 2011 ވަނަ އަހަރު ނަޝީދު ވެރިކަމުގައި ހުންނެވިއިރު، ފޯޅަވައްސާ ރާއްޖެއާއި ދެމެދު އިން ވަކިކުރުމަށް މޮރިޝަސްއާއެކު އެއްބަސްވި ސަބަބު މިއަދު ހާމަ ކުރައްވަން ޖެހޭ ކަމުގައެވެ.

2011 ގަ އޭރުގެ ރައީސުލް ޖުމްހޫރިއްޔާ ފޯޅަވައްސަކީ ރާއްޖޭގެ ބަޔެއްކަމަށް ދެކިލައްވާނަމަ ކީއްވެބާ މޮރިޝަޝްއާ އެއްބަސްވީ ފޯޅަވައްސާ ރާއްޖެއާމެދު އިންވަކިކުރުމަށް ؟

ފައްޔާޒު ކުރެއްވި ޓުވީޓުގައި ސުވާލު ކުރައްވާފައެވެ.

ފޯޅަވަހީގެ މައްސަލާގައި ސަރުކާރަށް އަމާޒުވަމުންދާ ފާޑުކިއުންތަކުގައި ބައިވެރިވެވަޑައިގެން ނަޝީދު ވިދާޅުވަމުން ގެންދަވަނީ، ފޯޅައްސަކީ މޮރިޝަސްގެ ބައެއްކަމަށް ދިވެހި ސަރުކާރަށް އެއްބަސް ނުވެވޭނެ ކަމުގައެވެ. އަދި ތާރީޚީ ގޮތުން ފޯޅަވައްސަކީ ރާއްޖޭގެ ބައެއްކަމަށް ދައުވާކުރެވޭނެކަމަށް ވިދާޅުވަމުން ނަޝީދު ގެންދަވަނީ އެކަމާ ގުޅުންހުރި ބައެއް ތާރީޚީ މައުލޫމާތުވެސް އާންމު ކުރައްވަމުންނެވެ.

މިގޮތުން މަޖިލިސް ރިޔާސަތުގައި އިންނަވައިގެން ވާހަކަ ދައްކަވަމުން، ފޯޅައްވަސަކީ އެ އަތޮޅުގެ އިހުތިސާސްއާއި ގުޅޭގޮތުން ރާއްޖެއަށް ވަކާލާތު ކުރެވެން އޮތް ތަނެއްކަމުގައި ނަޝީދު ވިދާޅުވިއިރު، އަމިއްލަފުޅު ވެރިކަމުގައި، މޮރިޝަސްއަށް ކުރެއްވި ދަތުރުފުޅުގައި ފޯޅަވަހީގެ މައްޗަށް އޮތް އިނގިރޭސި އިސްތިއުމާރާއި ދެކޮޅަށް ވާހަކަ ދައްކަވާ، އެއީ މޮރިޝަސްގެ އަތޮޅެއް ކަމުގައި ރާއްޖެއިން ދެކޭކަމަށް ވިދާޅުވެ ނަޝީދު ވާހަކަ ދައްކަވާފައިވާކަން މިހާރުވަނީ ހާމަވެގެން ގޮސްފައެވެ.

ނަޝީދުގެ ވެރިކަމުގައި 2011 ވަނަ އަހަރު މާޗް 11-13 އަށް މޮރިޝަސްގެ މިނިވަން ދުވަހުގެ ރަސްމިއްޔާތަށް އެ ގައުމުގެ އޭރުގެ ބޮޑުވަޒީރު ނަވިންޗަންދުރަ ރަމްގޫލަމްގެ ދައުވަތަކަށް އެގައުމަށް ނަޝީދު ޒިޔާރަތް ކުރައްވާފައި ވެއެވެ.

މިދަތުރުފުޅިގައި އެގައުމުގެ ބޮޑުވަޒީރާ ބައްދަލުކުރައްވާ އެ ބައްދަލުވުންތަކަށް ފަހު ނެރުނު "ޖޮއިންޓް ކޮމިނިކިއު"އިން އެގެން އިންނަ ގޮތުގައި، ބޮޑުވަޒީރާ ބައްދަލުކުރައްވާ ނަޝީދު ވިދާޅުވެފައިވަނީ ޗާގޮސްގެ ރަށްތަކުގެ ވަށައިގެންވާ ސަރަހައްދަކީ ހިމާޔަތްކޮށްފައިވާ ސަރަހައްދުތަކަަށް ނުވަތަ މެރިން ޕްރޮޓެކްޓެޑް އޭރިއާއެއްކަމަށް އިނގިރޭސި ވިލާތުން ކަނޑައެޅުމަކީ ދެ ލީޑަރުންވެސް ދެކޮޅު ހައްދަވާ ކަމެއް ކަމުގައެވެ.

އަދި ހަމަ އެއާއެކު 2017ވަނަ އަހަރު އޭރު އިންޓަރނޭޝަނަލް ކޯޓު އޮފް ޖަސްޓިސްއިން ފޯޅަވައްސަކީ މޮރިޝަސްގެ ބައެއްގެ ގޮތުގައި ކަނޑައެޅިއިރު، އޭރު ވެރިކަމުގައި ހުންނެވި ރައީސް ޔާމިން އެއީ ރާއްޖޭގެ ބައެއްގެ ގޮތުގައި ދައުވާ ނުކުރެއްވީ ކީއްވެތޯއާއި، ފޯޅަވަހި ރާއްޖޭގެ ތަނެއްގެ ގޮތުގައި ދެކި، ރާއްޖެއަށް އެތަން ގެއްލިގެން ދިޔައިރު އޭރު ޑިފެންސް މިނިސްޓަރު ކަމުގައި ހުންނެވި މިހާރުގެ މަޖިލިސް މެމްބަރު އާދަމް ޝަރީފް ކުރެއްވީ ކީއްތޯވެސް ފައްޔާޒު ވަނީ ސުވާލު ކުރައްވާފައެވެ.

2017 ގަ ICJ ގައި މޮރިޝަޝް އަށް ފޯޅަވަހި ދޭން ނިންމި އިރު އޭރުގެ ސަރުކާ ކީއްވެބާ ދައުވާ ނުކުރީ ؟ އޭރުގެ ޑިފންސް މިނިސްޓަރ ކީއްބާ ކުރެއްވީ ފޯޅަވެހި ރާއްޖޭގެ ތަނެއް ކަމަށްދެކި ގެއްލި ދިޔައިރު.؟@Adamshareefz

— Fayyaz Ismail (@faya_i) October 25, 2022

ހަމަ އެއާއެކު، ފޯޅަވަހީގެ މައްސަލާގައި ކުއްލިއަކަށް މީޑިއާއަށް އަރުއްވާ ވާހަކަ ދައްކަވަމުން ގެންދަވާ، ޑރ. މުނައްވަރު އޭނާގެ ބަންޑާރަނައިބު ކަމުގައި 1992 ވަނަ އަަހަރު އިނގިރޭސިވިލާތާއެކު ދިވެހިރާއްޖެއާ ފޯޅަވަހީގެ ބައުންޑަރީ ކަނޑައެޅުމަށް ވާހަކަދެކެވުނީ ކީއްވެތޯވެސް ފައްޔާޒު ސުވާލު ކުރައްވާފައި ވެއެވެ.