ކޯވިޑް-19ގެ ޙާލަތާއި ގުޅިގެން ދައުލަތުގެ ޚަރަދުތައް ބޮޑުވެ އިޤްތިޞާދަށް އަސަރުކޮށް މާލިއްޔަތު ހުސްވެގެން ދިޔައިރުވެސް އާމްދަނީއާއި ގުޅޭ އެންމެ ބިލެއްވެސް ހުށަނާޅައި ސަރުކާރުން، އަދިވެސް ހުށައަޅަނީ ޚަރަދުތައް އިންތިހާއަށް ބޮޑުވާ ބިލްތަކެއްކަމަށް ވިދާޅުވެ މާވަށު ދާއިރާގެ މެންބަރު ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.
މެމްބަރު މުޙައްމަދު ސަޢީދު ސަރުކާރަށް ފާޑު ވިދާޅުވެފައި މިވަނީ ބިނާވެށި ޕްލޭންކުރުމާއި ހިންގުމާ ގުޅޭގޮތުން ވިލުފުށީ ދާއިރާގެ މެންބަރު ޙަސަން އަފީފް ހުށައަޅުއްވާފައިވާ ބިލަށް މިއަދުގެ ޖަލްސާގައި ވާހަކަފުޅު ދައްކަވަމުންނެވެ.
ކުރީ ސަރުކާރުގައި އިޤްތިޞާދާއި ބެހޭ ވަޒީރުކަންކުރެއްވި، އަދި މިހާރުގެ އިދިކޮޅު ޕީއެންސީގެ ނާއިބު ރައީސް މުޙައްމަދު ސަޢީދު ވިދާޅުވީ، ޙަސަން އަފީފް ހުށައެޅުއްވި ބިލްގެ ދަށުން ސަރުކާރުން ބޯޑެއް އެކުލަވާލަން ޖެހޭކަމަށެވެ. އެކަމުގެ ސަބަބުން ދައުލަތުގެ ޚަރަދުތައް ބޮޑުވެ ބިއުރޯކްރަސީ ދިގުވެގެންދާކަން ސަޢީދު ފާހަގަކުރެއްވިއެވެ. އޭނާ ވިދާޅުވީ ސަރުކާރުން ދާދިފަހުން ފާސްކުރި ގިނަ ބިލްތަކަކީ އިތުރު ޚަރަދުތަކެއް ކުރަންޖެހޭ ބިލްތަކެއްކަމަށެވެ. އެގޮތުން ދާދި ފަހުންފާސްކުރި ފެނާއި ނަރުދަމާގެ ބިލާއި، ޗާޓާޑް އެކައުންޓްގެ ބިލާއެކު އިތުރު އިދާރާތަކެއް އުފެދި އެތަންތަނުގެ ބޯޑުތަކަށް މީހުން އައްޔަންކުރުމާއި އެނޫންވެސް ގިނަ ޚަރަދުތަކެއް ކުރަންޖެހޭކަމަށް ވިދާޅުވެ ސަޢީދު ވަނީ ސަރުކާރުގެ އިޤްތިޞާދީ ސިޔާސަތަށް ފާޑުވިދާޅުވެފައެވެ.
"ކޮންމެ ބޯޑަކާއެކު، ކޮންމެ ޕްލެޓް ފޯމަކާއެކު، ކޮންމެ ކޮމްޕޮޒިޝަނަކުން ދައުލަތުގެ ޚަރަދުތައް އެބަދޭ އިތުރުވެގެން. މިތަނަކަށް ކޯވިޑް-19 އައިފަހުން މި ހައްސާސް ދަނޑިވަޅުގައި ބަހުސްކުރަމުންދާއިރު އެންމެ ފަހަރަކުވެސް އާމްދަނީއާއި ބެހޭ ބިލެއް ގެނައިތޯ؟ ފައިސާ ޗާޕްކުރަން އެއްފަހަރު ހުށައަޅާފާނެ، ޗާޕްކުރި ފައިސާ ހުސްވެގެން އެވާހަކަ ދައްކަފާނެ، އަނެއްކާ ޗާޕްކުރި ފައިސާއަށް ވީގޮތެއް ނޭނގިގެން އެވާހަކަ ދައްކަފާނެ." ސަޢީދު ވިދާޅުވިއެވެ.
ސަޢީދު ވަނީ އިޤްތިޞާދު ހީނަރުވެގެންގޮސް ވިަޔަފާރިތަކަށްވެސް ބޮޑެތި ގެއްލުންތަކެއް ވަމުން އަންނަކަން ފާހަގަކުރައްވާފައެވެ.
"އިއްޔެ އަޅުގަނޑަށް އެނގިގެންދިޔައީ ވިޔަފާރިވެރިންގެ ފަރާތުން މާލެސިޓީގައި ހުރި މުހިންމު ދެހޮޓަލެއް އަނެއްކާވެސް ބަންދުކޮށްފިއޭ އިއްޔެގަ. ދެހޮޓަލެއް ބަންދުކުރިއިރު އަޅުގަނޑުގެ މަޢުލޫމާތު ކުށްނޫންނަމަ ޖެން ހޮޓެލްވެސް ހިމެނޭ. ސަބަބެއް އަދިއަދަށްވެސް ނޭނގޭ. މިއީ މާލެސިޓިގައި ހުރި އެންމެ ޕްރީމިއަމް ހޮޓާތަކުގެ ވާހަކަ މިދައްކަނީ." ސަޢީދު ވިދާޅުވިއެވެ.
ބިނާވެށި ޕްލޭން ހެދުމާއި ހިންގުމާއި ގުޅޭ ބިލަށް ވާހަކަފުޅު ދައްކަވަމުން ސަޢީދު ވަނީ ބިން އަޅުވެތިކުރުމާއި، ބިންތައް އަވަށްޓެރި ޤައުމުތަކަށް ދީ ވާނުވާ ނޭގޭ ހިސާބަށް ގޮސްފައި ވާކަމަށްވެސް ވިދާޅުވެފައެވެ.
ސަޢީދު ވަނީ މަޖިލީހުގައި ސަރުކާރަށް ނިސްބަތްވާ މެންބަރުންގެ މެދުގައި ޚިޔާލު ތަފާތުތައް އުފެދި ރައްޔިތުންނަށް ފައިދާވާ އެއްވެސް މަސައްކަތެއް މަޖިލީހުގެ ތަޅުމުގައި ކުރެވެމުން ނުދާކަމަށް ވިދާޅުވެ ސަރުކާރުގެ ސިޔާސަތުތަކަށް ވަރަށް ބޮޑަށް ފާޑު ވިދާޅުވެފައެވެ.
ކޮމެންޓު ފޮނުވާ