މި ހަފްތާގެ ހޯމަ ދުވަހު ބެއްވުމަށް ހަމަޖެހިފައިވާ، އިނގިރޭސި ރާނީގެ ޖަނާޒާގައި ދުނިޔޭގެ 100 ގައުމެއްގެ އެންމެ އިސްވެރިންގެ އިތުރުން 20 ގައުމަކުން ޝާހީ އާއިލާގެ އެންމެ އިސްބޭފުޅުން ހިމެނޭގޮތަށް، 200 ގައުމަކުން 500 އިސް އޮފިޝަލުން ބައިވެރިވާކަމަށް އިނގިރޭސި ފޮރިންގ އޮފީހުން ހާމަ ކޮށްފިއެވެ.
ޖަނާޒާގައި ބައިވެވަޑައިގަންނަވާ އިއްޒަތްތެރިންގެ ތެރޭގައި، ބަހުރެއިންގެ ވަލީއަހުދުއާއި، ގަތަރުގެ އަމީރުއާއި އޮމާންގެ ރަސްގެފާނު ހިމެނިވަޑައިގަންނަވައެވެ. މީގެ އިތުރުން، ޖަޕާންގެ އެމްޕެރަރ ނަރުހީޓޯގެ ދެކަނބަލުންނާއި، އެމެރިކާގެ ރައީސް ޖޯބައިޑްންވެސް ރާނީގެ ޖަނާޒާގައި ބައިވެރިވެ ވަޑައިގަތުމަށްޓަކާ މިހާރުވަނީ އިނގިރޭސިވިލާތަށް ވަޑައިގެންފައެވެ.
ރާއްޖޭގެ ރައީސުލްޖުމުހޫރިއްޔާ އިބުރާހިމް މުހައްމަދު ސާލިހުގެ ދެކަނބަލުންވެސް މިހާރުވަނީ ރާނީގެ ޖަނާޒާއަށް އިނގިރޭސިވިލާތަށް ވަޑައިގެންފައެވެ.
ރާނީގެ ޖަނާޒާއަށް އިނގިރޭސިވިލާތުގެ ވެރިރަށް ލަންޑަންގެ ސަލާމަތީކަންކަން ވަނީ ވަރަށް ބޮޑަށް ވަރުގަދަ ކޮށްފައެވެ. މިގޮތުން ގިނަ އަދަދެއްގެ މަގުތައް ބަންދުކޮށް، ލަންޑަންގެ އެކި ހިސާބުތަކުގައި ގިނަ އަދަދެއްގެ ފުލުހުން ދަނީ ހަރަކާތްތެރި ވަމުންނެވެ.
ރާނީގެ ސަންދޯއް މިހާރުވަނީ ލަންޑަންގެ ވެސްޓްމިންސްޓަރ ހޯލުގައި ބޭއްވިފައެވެ. އަދި އިސްވެރިންނާއި ގިނަ އަދަދެއްގެ އާންމު ރައްޔިތުންވެސް ދަނީ ރާނީއަށް އެންމެ ފަހުގެ އިހުތިރާމް އަދާކުރަމުންނެވެ. ރާނީއަށް އިހުތިރާމް އަދާކުރުމަށްޓަކާ ގިނަބަޔަކު 24 ގަޑިއިރުވަންދެން ކިއުގައި ތިބެފައެވެ.
ރާނީގެ ޖަނާޒާ ރަސްމީކޮށް ފެށުމަށް ހަމަޖެހިފައިވަނީ ހޯމަ ދުވަހު، އިނގިރޭސިވިލާތުގެ ގަޑިން ހެނދުނު 11:00 ގައެވެ.
ރާނީ އަވަހާރަ ވެފައިވަނީ، 70 އަހަރުވަންދެން ރަނިކަން ކުރެއްވުމަށްފަހު، އުމުރުން 96 އަަހަރުގައި، މި ސެޕްޓެމްބަރުމަހުގެ 8 ވަނަ ދުވަހުއެވެ.
