ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ގެކޮޅު ގ.ކެނެރީގޭގެ ފާރުގައި އިންޑިއާ އައުޓް ސްޕްރޭކޮށްފިއެވެ.
ޤައުމީ ސަލާމާތާބެހޭ މަޖިލީހުން ނިންމި ނިންމުމާއި ގުޅިގެން ރައީސުލްޖުމްހޫރިއްޔާ ވަނީ އިންޑިއާއި ދެކޮޅަށް ހިންގާ ހަރަކާތްތައް ހުއްޓުވުމަށް ކަނޑައަޅައި، އެކަން ތަންފީޛް ކުރުމަށް ދައުލަތުގެ ކަމާބެހޭ އެންމެހައި އިދާރާތަކަށް އަންގަވާފައެވެ. އަދި އެމަނިކުފާނު ވަނީ ރާއްޖޭގައި އިންޑިއާ އައުޓް ހަރަކާތް ހުއްޓުވުމަށް ޤަރާރެއްވެސް ނެރުއްވާފައެވެ.
ޤަރާރަށްފަހު ރާއްޖޭގައި އިންޑިއާ އައުޓްގެ ހަރަކާތް މާބޮޑަށް ދަނީ ހިންގަމުންނެވެ. އިދިކޮޅުން ބުނަމުންދަނީ ޤާނޫނު އަސާސީން ލިބިދީފައިވާ އެއްވެ އުޅުމާއި ޚިޔާލް ފާޅު ކުރުމުގެ މިނިވަންކަމަކީ ޤަރާރަކުން ހުއްޓުވޭނެކަމެއް ނޫންކަމަށެވެ.
އިންޑިއާ އައުޓް ހުއްޓުވުމަށް އެންމެ ބޮޑަށް ވާކާލާތު ކުރައްވާ އެއްބޭފުޅަކީ މަޖިލިސް ރައީސް މުހައްމަދު ނަޝީދެވެ. ރައީސް ނަޝީދު އިންޑިއާގެ ދިފާއުގައި ވާހަކަ ދައްކަވަމުންދާއިރު، އެމަނިކުފާނުގެ ގެކޮޅު ގ.ކެނެރީގައި ވަނީ އިންޑިއާ އައުޓް ސްޕްރޭކޮށްފައެވެ. ރައީސް ނަޝީދުގެ ކޮއްކޯފުޅު ނާޒިމް ސައްތާރު ވަނީ ކެނެރީގޭގެ ފާރުގައި ބޮޑު އަކުރުން ފެހި ކުލައިގެ ސްޕްރޭއިން "އިންޑިއާ އައުޓް" ޖަހާފައިވާ ފޮޓޯއެއް ދެންމެ ޓްވީޓް ކުރައްވާފައެވެ.
Kenereege wall pic.twitter.com/1YHQe3Tojn
— Nazim Sattar (@nazimsat) May 31, 2022
ރާއްޖޭގައި އިންޑިއާ ސިފައިން ގާއިމުގެ ތިބުމާ ދެކޮޅަށް ކުރިއަށްގެންދާ އިންޑިއާ އައުޓް ކެމްޕެއިންގެ ތެރެއިން މީގެ ކުރިން ވަނީ ނަޝީދުގެ އިތުރުންވެސް ސަރުކާރުގެ ބައެއް އިސްވެރިންގެ ގެކޮޅަށް "އިންޑިއާ އައުޓް" ސްޕްރޭކޮށްފައެވެ. އޭގެ ތެރޭގައި ޑިފެންސް މިނިސްޓަރ މާރިޔާ ދީދީގެ ގެކޮޅާއި، ރާއްޖޭގައި ހުންނަވާ އިންޑިއާ ސަފީރުގެ ގެކޮޅުވެސް ހިމެނެއެވެ.
އިންޑިއާއާ މެދު ނަފްރަތު އުފެއްދުމަށް ހިންގާ ހަރަކާތްތަކާކީ ޤައުމީ ސަލާމަތަށް ހުރި ނުރައްކަލެއް ކަމުގައި ޤައުމީ ސަލާމާތާބެހޭ މަޖިލީހުން ވަނީ ނިންމާފައެވެ.
