އެމްޑީޕީ ޗެއަރޕާސަން އިންތިޚާބުގައި ވޯޓުލުމަށް ގުޅިކަމަށް ޕީއެންސީގެ ނާއިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު ވިދާޅުވެއްޖެއެވެ.
ޢާންމުންނަށް ނޭނގި ސިޔާސީ ޕާޓީތަކަށް މީހުން ވައްދާ މައްސަލާގައި މަޖިލީހަށް ވެއްދި މައްސަލަ ވަނީ އިއްޔެގެ ޖަލްސާގައި ބޭރުކޮށްލާފައެވެ، މިކަމާއި ގުޅިގެން އާދަމް ޝަރީފް މިއަދުގެ ޖަލްސާގައި ވިދާޅުވީ ނޭނގި ސިޔާސީ ޕާޓީތަކަށް ވައްދާ މައްސަލައަކީ ބޮޑުވެފައިވާ މައްސަލައެއްކަން ޤަބޫލުކުރަންޖެހޭކަމަށެވެ. އެގޮތުން އެ މައްސަލަ ބޮޑުކަން އެނގެނީ އޭނާގެ ނަން އެމްޑީޕީ ޗެއަރޕާސަން އިންތިޚާބުގައި ވޯޓުލެވޭ ލިސްޓުގައި އޮތުމުންކަމަށް އާދަމް ޝަރީފް ވިދާޅުވިއެވެ.
އާދަމް ޝަރީފް ވިދާޅުވީ އެ އިންތިޚާބުގައި ފައްޔާޟް އިސްމާއީލްގެ ކެމްޕެއިން އޮފީހުން ގުޅިކަމަށާއި، އެމްޑީޕީގެ ދަފްތަރު އޮތީ އެތެރޭގެ އިންތިހާބުތަކަށް އިދިކޮޅު ޕީޕީއެމަށް ނުފޫޒު ފޯރުވޭގޮތަށްކަމަށް ފައްޔާޟް ވިދާޅުވެފައިވާކަަމަށެވެ
ޗެއަރޕާސަން ކެމްޕެއިންގައި ފައްޔާޟް ވިދާޅުވެފައިވަނީ އެމްޑީޕީގެ ރިޔާސީ ކެނޑިޑޭޓް ކަނޑައަޅާން ޕީޕީއެމްގެ 20،000 މީހުންނަށް ވޯޓު ލެވޭކަމަށެވެ. އެހެންކަމުން އެމްޑިޕީގެ ދަފްތަރު ސާފުވާންޖެހޭކަމަށް ފައްޔާޟް ވިދާޅުވެފައިވެއެވެ.
ނޭނގި ޕާޓީއަށް ވައްދާ މައްސަލާގައި އީސީން ވަނީ ފޯމް ހުށައޅާ ފަރާތްތަކު މައުލުމާތު އާންމުކުރަން ފަށާފައެވެ.
