ކުރިއަށް އޮތް 2023 ގެ ރިޔާސީ އިންތިހާބުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވާދަކުރައްވާނެ ކަމަށް ދެކެވަޑައިނުގަންނަވާ ކަމަަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ދިވެހި ޗެނަލުން މިއަދު ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުންނެވެ.
ނަޝީދު ވިދާޅުވީ ރިޔާސީ އިންތިޙާބުގައި އެމްޑީޕީން ނެރޭނެ ކެނޑިޑޭޓެއް ކަނޑައަޅާނީ ޕްރައިމަރީއަކުން ޕާޓީގެ މެމްބަރުން ކަމަށެވެ. އަދި ޕްރައިމަރީއަށް ރައީސް ސޯލިހް ނުކުންނަވާނެ ކަމަށް ދެކެވަޑައިނުގަންނަވާ ކަމަަށް ތަކުރާރުކޮށް ވިދާޅުވިއެވެ. ނަޝީދު ވިދާޅުވީ ރައީސް ސޯލިހް މިހާތަނަށް ވެސް އެފަދަ ވާހަކައެއް ދައްކަވާފައިނުވާކަމަށެވެ.
2023 ވަނަ އަހަރަށް އެމްޑީޕީގެ ޕްރައިމަރީގައި ރައީސް ނަޝީދު ވާދަކުރައްވާނެ ކަމަށް ވިދާޅުވަމުން ނަޝީދު ވިދާޅުވީ ޕްރައިމަރީއަށް ރައީސް ޞާލިޙާއި އެމަނިކުފާނުގެ އިތުރުން އެހެން އިތުރު ބޭފުޅުންވެސް ނިކުންނެވުން ވަރަށް މުހިންމު ކަމަށެއެވެ.
އެހެން ނަމަވެސް ރިޔާސީ ޕްރައިމަރީއަށް ރައީސް ޞާލިޙް ނިކުންނަވާނެ ކަމަށް ދެކެވަޑައިނުގަންނަވާ ކަމަަށް ނަޝީދު ވިދާޅުވިއެވެ.
"އަޅުގަނޑު ލަފަޔެއް ނުކުރަން ރައީސް އިބްރާހިމް މުހައްމަދު ސޯލިހު (ޕްރައިމަރީއަށް) ނުކުންނަވާނެ ކަމަކަށް. އެހެންނަމަވެސް އަޅުގަނޑު ނުކުންނަ ވާހަކަ ތަކުރާރުކޮށް އެކި ގޮތްގޮތަށް އެބަ ބުނެވޭ"
– ނަޝީދު
ރިޔާސީ ޕްރައިމަރީގައި ރައީސް ނަޝީދު ވާދަކުރައްވާނެ ކަމަށް ވިދާޅުވުމަށްފަހުވެސް އެމަނިކުފާނު ވިދާޅުވީ އަދިވެސް އެމަނިކުފާނު ތާޢީދު ކުރައްވާނީ ރާއްޖެއަށް ބަރުލަމާނީ ނަޒާމު ގެނައުމަށް ކަމަށާއި އެކަމަށް ރައީސް ޞާލިޙްވެސް އިތުރަށް ވިސްނާވަޑައިގަންނަވަން ޖެހޭނެ ކަމަށެވެ.
މީގެ އިތުރުން ކޯލިޝަންގެ ވެރިކަމެއްގައި މަޖިލީހުގެ ބޮޑު މެޖޯރިޓީއަކާއެކު އެމްޑީޕީން އޮތް ނަމަވެސް އެމްޑީޕީގެ އާންމު މެމްބަރުން ވަރަށް ބޮޑަށް ބާކީވަމުން ދާތަން ފެނިވަޑައިގަންނަވާކަމަށްވެސް ރައީސް ނަޝީދު ވަނީ ވިދާޅުވެފައެވެ.
ކޮމެންޓު ފޮނުވާ