ކުރިޔަށްދާ، ވާދަވެރިކަން ބޮޑު، އެމްޑީޕީގެ ޗެއަރޕާރސަން އިންތިޚާބުގައި، ރައީސް ސާލިހުގެ ކެބިނެޓްގެ ވަޒީރުންގެ ތެރެއިން، މިހާތަނަށް އެއްވެސް ފަރާތަކަށް ތާއީދުކުރާ ހާމަނުކޮށް ތިއްބެވީ އެންމެ 4 ވަޒީރެއްކަން ހާމަ ވެއްޖެއެވެ. މީގެތެރޭގައި ހިމެނިވަޑައިގަންނަވަނީ، ޔޫތު މިނިސްޓަރު އަހުމަދު މަހުލޫފާއި، ފޮރިންގ މިނިސްޓަރ އަބުދުﷲ ޝާހިދާއި، ޑިފެންސް މިނިސްޓަރ މާރިޔާ އަހުމަދު ދީދީއާއި، އަދި އޭގެ އިތުރުން ހައުސިންގ މިނިސްޓަރ މުހައްމަދު އަސްލަމްއެވެ.
އެމްޑިޕީގެ ދެ ފެކްޝަންގެ މެދުގައިވެސް ވާދަވެރިކަން ބޮޑުވެފައިވާ، އެޕާޓީގެ ޗެއަރޕާރަސަން އިންތިޚާބުގެ ވޯޓުލުމަށް ހަމަޖެހިފައިވަނީ އަންނަ ހޮނިހިރު ދުވަހުއެވެ. އަދި މިއިންތިޚާބު ގިނަ ބަޔަކު މިހާރު ސިފަކުރަމުން ދަނީ، ރައީސް ސާލިޙާއި ރައީސް ނަޝީދުގެ ގަދަ ހިފުމެއްގެ ގޮތުގައިވެސް މެއެވެ.
މިއިންތިޚާބުގައި ވާދަކުރަމުންދާ ދެކެނޑިޑޭޓުން ކަމުގައިވާ، ރައީސް ސާލިހުގެ ސަރުކާރުގެ އިކޮނޮމިކް މިނިސްޓަރ ފައްޔާޒް އިސްމާއިލަށް ރައީސް ސާލިހު ތާއީދު ކުރައްވަމުން ގެންދަވާއިރު، ފައްޔާޒުއާއި ވާދަ ކުރައްވަމުން ގެންދަވާ މާފަންނު އުތުރު ދާއިރާގެ މަޖިލިސް މެމްބަރު އިމްތިޔާޒު ފަހުމީއަށް ރައީސް ނަޝީދު ގެންދަވަނީ ފާޅުގައި ތާއީދު ކުރައްވަމުންނެވެ.
އެމްޑީޕީގެ އެތެރޭގައި އުފެދިގެން ގޮސްފައިވާ ދެ ފެކްޝަންގެ މެދުގައި ވާދަވެރިކަން ބޮޑުވެ، އެއްބަޔަކަކު އަނެއް ބަޔަކު ވަގަށް ގޮވާ، އަދި ޒިނޭގެ ތުހުމަތަށް ދަންދެއް އަޅުވަމުންދާ މި ކެމްޕޭންގައި ވަރަށް ފަހަކާއި ޖެހެންދެންވެސް އެއްވެސް ކެނޑިޑޭޓަކަށް ތާއީދު ކުރާކަން ހާމަނުކޮށް ތިއްބެވި، މަޖިލިސް ރައީސް ނަޝީދާއި މީގެކުރިން ވަރަށް ގާތް ގުޅުން ބާއްވަމުން ގެންދެވި ބައެއް ވަޒީރުން ފާއިތުވެދިޔަ ހަފްތާގައިވަނީ، ރައީސް ސާލިހުގެ ތާއީދުއޮތް ކެނޑިޑޭޓް ފައްޔާޒު އިސްމާއިލަށް ތާއީދު ކުރާކަން ހާމަ ކޮށްފައެވެ. މީގެ ތެރޭގައި ރައީސް ނަޝީދުގެ އާއިލީ ބޭއްފުޅެއް ކަމުގައިވާ، އަދި ނަޝީދުގެ ވެރިކަމުގައި ކެބިނެޓް މިނިސްޓަރުކަންވެސް ކުރެއްވި ކެރަފާ ނަސީމް ހިމެނިވަޑައިގަންނަވައެވެ. އަދި ނަޝީދުގެ ދައުރުގައި ރައީސް އޮފީހުގެ އިސްމަގާމްތަކެއް އަދާކުރެއްވި، މިހާރުގެ އެންވަޔަރމަންޓް އަދި ޓެކްނޮލޮޖީ މިނިސްޓަރު އާމިނަތު ޝައުނާވެސް ހިމެނިވަޑައި ގަންނަވައެވެ.
ޝައުނާ ފައްޔާޒަށް ތާއީދުކުރައްވާކަން ހާމަ ކުރެއްވުމާއެކު، ނަޝީދުވަނީ ޝައުނާއަށް ފާޑު ވިދާޅުވެ، އޭނާ ފައްޔާޒަށް ތާއީދު ކުރުމަށް ނިންމީ ވަޒީފާގެ ދަހިވެތިކަމުގައި ކަމަށް ވިދާޅުވެފައެވެ. ރައީސް ސާލިހުގެ ކެބިނެޓްގެ ވަޒީރުންގެ ތެރެއިން، ފައްޔާޒަށް ތާއީދުކުރާކަން އެންމެ ފަހުން ހާމަ ކޮށްފައިވަނީ، އެޑިއުކޭޝަން މިނިސްޓަރު އައިޝަތު އަލީއެވެ.
އަދި މީގެ އިތުރުން، މަޖިލީހުގައި އެމްޑީޕީގެ ސުޕަރ މެޖޯރިޓީ އޮތް، އެޕާޓީގެ ޕާލަމެންޓްރީ ގުރޫޕްގެ ގިނަ މެމްބަރުންވެސް ފައްޔާޒު އިސްމާއީލަށް ތާއީދު ކުރައްވަމުން ގެންދަވާއިރި، ނަޝީދާއި މިހާތަނަށް އެންމެ ގާތްކަން ބައްވަމުން ގެންދެވި ބައެއް މެމްބަރުންވެސް މީގެތެރޭގައި ހިމެނޭކަން ފާހަގަ ކޮށްލެވެއެވެ.
ވާދަވެރި ކެމްޕޭނެއް ކުރެވެމުންދާ، ޗެއަރޕާސަން އިންތިޚާބުގައި މިހާތަނަށް ވަކިފަރާތަކަށް ތާއީދުކުރާކަން ހާމަ ކޮށްފައި ނުވާ، ރައީސް ސާލިހުގެ ކެބިނެޓްގެ 4 ވަޒީރުންގެ ތެރެއިން ބޭފުޅަކު، މިހާތަނަށް އެއްވެސް ކެމްޕޭނަކާއި ގުޅުހުންހުރި ޓުވީޓެއްހާމިންވަރު ރީޓުވީޓުވެސް ކުރައްވާފައި ނުވާކަން ފާހަގަ ކޮށްލެވެއެވެ.
