ވެރިކަން ކުރާ މައި ޕާޓީ އެމްޑީޕީ މިހާރު އޮތް ކޯލިޝަނަށް ކުރިއަށް އޮތް 2023 ވަނަ އަހަރުގެ ރިޔާސީ އިންތިޚާބު ކާމިޔާބު ނުވާނެކަމުގެ އިޝާރާތެއް އެމްޑީޕީގެ ރައީސް މުހައްމަދު ނަޝީދު ދެއްވައިފިއެވެ.
ވާދަވެރިކަން ބޮޑުވެފައިވާ އެމްޑީޕީގެ ޗެއާޕާސަން އިންތިޚާބާއި ގުޅިގެން ރައީސް ނަޝީދާއި، ރައީސް ޞާލިހަށް ތާއީދު ކުރާ މެމްބަރުންގެ މެދުގައި ދަނީ ބަހުގެ ހޫނު ހަމަލާތައް ބަދަލު ކުރެވެމުންނެވެ. މިއިންތިޚާބަކީ މިނިސްޓަރ ފައްޔާޟާއި، މެމްބަރު އިންތިޔާޒުގެ މެދުގައި އޮތް އިންތިޚާބަކަށް ވީނަމަވެސް މިއީ އެމްޑީޕީގެ ރިޔާސީ ޓިކެޓާއިމެދު ރައީސް ނަޝީދާއި، ރައީސް ޞާލިހު ކުރައްވާ ހަނގުރާމައިގެ ފެށުންކަމަސް ގިނަ ބަޔަކު ދެކެއެވެ.
މިއިންތިޚާބުގެ މަންޒަރުތައް މިހާރު ފެންނަ ގޮތުން އިންތިޚާބު ކާމިޔާބު ކުރާނެކަމަށް ބެލެވެނީ މިނިސްޓަރ ފައްޔާޟު އިސްމާއިލެވެ. އިންތިޚާބުގެ ވާދަވެރިކަން ބޮޑުވާ ވަރަކަށް އެމްޑީޕީގެ ރައީސް ނަޝީދު ގެންދަވަނީ ސަރުކާރަށް އެކި ތުހުމަތުކުރަމުންނެވެ. އެމްޑީޕީގެ ގައުމީ މަޖިލީހުގެ މެންބަރުންނަށް ހާއްސަ ވަޓްސްއެޕް ގުރޫޕަށް ފޮނުވި މެސެޖެއްގައި ރައީސް ނަޝީދު ވިދާޅުވީ އެމަނިކުފާނުގެ ނަޒަރުގައި އެމްޑީޕީއަށް ރައްޔިތުންގެ ވޯޓްގެ 50 ޕަސެންޓް ހޯދުން ވަރަށް އުނދަގޫ ވާނެ ކަމަށެވެ. އެ މިންވަރަށް ތާއީދު ހޯދޭވަރަށް ވުރެ މާ ގިނަ ގޯސްތައް ހަދާފައިވާ ކަމަށް ވިދާޅުވިއެވެ. އަދި އެ ގޯސްތައް އެއް ބަޔަކު ގަބޫލު ނުކުރާ ކަމަށްވެސް ވިދާޅުވިއެވެ.
އަޅުގަނޑަށް ހީވަނީ 50 ޕަސެންޓަށްވުރު އިތުރަށް ހޯދާން ވަރަަށް އުނދަގޫވާނެ ކަމަށް. މާގިނަ ގޯސް ހެދިއްޖެ. އަދި އެ ގޯސް އެއް ބަޔަކު އަނެއް ބަޔަކަށް ގަބޫލެއް ނުކުރޭ. ސަރުކާރަށް ލަފާ ކުރެވެނީ ވަރަށް ތާއީދު ބޮޑު ކަމަށް.
– ނަޝީދު ވިދާޅުވިއެވެ.
ނަޝީދު ވިދާޅުވީ ރައްޔިތުންގެ ވަރަށް ބޮޑު ތާއީދެއް އޮތް ކަމަށް މި ސަރުކާރަށް ހީވާ ކަމަށެވެ. ނަމަވެސް ރައްޔިތުން ތިބީ ވަރަށް ބޮޑަށް މާޔޫސްވެފައި ކަމަށާއި، މިސަރުކާރަށް ދެން ވެރިކަމަށް އާދެެވޭ ވަރަށް ވޯޓު ލިބުމަކީ ދުރުކަމެއްކަމަށް ނަޝީދު ވިދާޅުވިއެވެ.
ނަޝީދު ވަނީ ކުރެއްވި މެސެޖުގެ ތަފްސީލްވެސް ދެއްވާފައެވެ. އެގޮތުން މިއަހަރަކީ ދައުލަތުގައި އޮތް ބޮޑު ދަރަނި ދައްކަންޖެހޭ އަހަރަށް ވާއިރު މިކަމާއި އެއްވެސް ވަރެއްގެ ސަމާލުކަމެއް ސަރުކާރުން ދޭތަނެއް ނުފެންނަ ކަމަށެވެ. ފެނިގެންދަނީ އަމިއްލަ މަސައްކަތްތައް ހިތުހުރި ގޮތަކަށް ކުރަމުންދާތަން ކަމަށެވެ.
ރައީސް ނަޝީދު ވިދާޅުވީ ރާއްޖޭގެ މަސްވެރިންނަކީ ރާއްޖޭގެ އެންމެ ބޮޑު އެއް ސިނާއަތަށް ވާއިރު މިސިނާއަތާއި މެދުވެސް ސަރުކާރުން ވަރަށް އިހާނެތިކޮށް ކަންތައް ކުރަމުންދާކަމަށެވެ. ފެނިގެންދަނީ ވަރަށް ބޮޑަށް މަސްވެރިންނަށް އޮޅުވާލައި ކަންކަން ކުރާ މަންޒަރުކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވަނީ އެމްއެމްޕީއާރުސީގެ ރިޕޯޓް އޮތްކަމަށްވެސް އިއްޔެ ވިދާޅުވެފައެވެ. އަދި ރިޕޯޓް ހާމަ ކުރަންޖެހިދާނެ ކަމުގެ އިޝާރާތެއްވެސް ރައީސް ނަޝީދު ވަނީ ދެއްވާފައެވެ. ސިޔާސީ ގޮތުން ބާރުވެރިކަން ހޯދުމަށް ރައީސް ނަޝީދު ކުރައްވާ މަސައްކަތުގައި އެމަނިކުފާނަށް އެމްޑީޕީ އަތުން ގެއްލިގެންދާ ކަމުގެ އިހުސާސް މިހާރުވުމާއިއެކު ގެންދަނީ ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ. އަދި މީގެ ކުރިން ވަނަީ ރައީސް ޞާލިހަށް އެއްބާރުލުން ނުދެއްވާނެކަމަށްވެސް ވިދާޅުވެފައެވެ.
