ކޯލިޝަން ޕާޓީތަކާއެކު ވެރިކަމަށް ވަޑައިގަންނަވަމުން ރައީސް އިބުރާހިމް މުހައްމަދު ސާލިހު ވެވަޑައިގެންނެވި އެންމެ މުހިންމު އެއް ވައުދަކަށް ވެގެންދިޔައި ކޮރަޕްޝަނަށް ޒީރޯ ޓޮލަރަންސްގެ ވައުދެވެ.

ރައީސް ޔާމިންގެ ސަރުކާރުގައި ހިގައިދިޔަ އެމްއެމްޕީއާރުސީގެ ބޮޑު ޚިޔާނާތަށްފަހު، މިފަދަ އިތުރު ޚިޔާނާތެއް ދައުލަތުގެ އެތެރެތޭގައި ހިގައިގެން ނުދާނޭކަން ޔަގީން ކުރުމާއެކު، އަދި މި ނޫނަސް ސަރުކާރުގެ އެކި މުވައްސަސާތަކުގައި ހިގަމުންދާ ކޮރަޕްޝަނާއި ފަސާދައިގެ އަމަލްތައް ހުއްޓުވާ، މި ތަންތަނުގައި ޒަމާނުއްސުރެ އަށަގެންފައިވަ ނުރަގަޅު އާދަތައް ނައްތާލުމުގެ މަގުސަދުގައި، 2018ވަނަ އަހަރު ބޭއްވުނު ރިޔާސީ އިންތިޚާބުގެ ވަަރަށްވެސް މުހިންމު އަމާޒަކަށް ވެގެންދިޔައީ ރައީސް ސާލިހުގެ ވެރިކަމުގައި ދައުލަތުގެ އެކި ފަށަލަތަކުން ކޮރަޕްޝަންގެ ބަލިމަޑުކަން ނައްތާލުމަށް އަމާޒުކޮށް ވެވުނު މުހިންމު ވައުދުތަކެވެ.

މިގޮތުން ރައީސް ސާލިހުވެރިކަމަށް ވަޑައިގެންނެވުމަށްފަހު، ދައުލަތުގެ އެކި މަރުހަލާތަކުން ކޮރަޕްޝަން ނައްތާލުމަށް ސަރުކާރުގެ އެކި މުވައްސަސާތައް މެދުވެރިކޮށް މުހިންމު މަސައްކަތްތަކެއް ކުރައްވާފައި ވާކަންވެސް މިފުރުސަތުގައި ފާހަގަ ކޮށްލާން ޖެހެއެވެ. މީގެ ތެރޭގައި ދައުލަތުގެ ޕްރޮކިއުމަންޓް އުސޫލުތަކަށް ހެޔޮ ބަދަލުތައް ގެނައުމާއި، ކޮރަޕްޝަނަށް ތުހުމަތުކުރެވޭ ބައެއް ފަރާތްތައް މަގާމުން ވަކިކުރުމާއި ސަސްޕެންޑް ކުރުންވެސް ހިމެނެއެވެ.

އެހެންނަމަވެސް، ސަރުކާރުން އެޅުއްވި މިދެންނެވުނު ބައެއް ފިޔަވަޅުތަކާއެކުވެސް، ސަރުކާރުގެ މައްޗަށް ކުރެވެމުންދާ ކޮރަޕްޝަންގެ ތުހުމަތުތަކާއި، ފެންމަތިވަމުންދާ ކޮރަޕްޝަންގެ މައްސަލަތަކަށް ވަނީ ހުއްޓުމެއް ނުގެނެވިފައެވެ. އަދި ވަކީން ޚާއްސަކޮށް، ދައުލަތުގެ ބައެއް ކުންފުނިތަކުން ހިންގަމުންދާ ކޮރަޕްޝަންގެ އަމަލްތައް ފެންމަތިވެ، ބޮޑެތި ތުހުމަތުތައް ކުރެވި، މިފަދަ ބައެއް ބޮޑެތި ތުހުމަތުތައް ބައެއް ކުންފުނިތަކުގެ އިސްވެރީންގެ މައްޗަށް ކުރެވި، މައްސަލަތައް އެންޓި ކޮރަޕްޝަން ކޮމިޝަންގައި ވާކަންވެސް މި ފުރުސަތުގައި ފާހަގަ ކޮށްލާން ޖެހެއެވެ.

ބައެއް ކުންފުނިތަކުގެ މައްޗަށް ބޮޑެތި ތުހުމަތުތަކެއް!

ހުރިހާ ސަރުކާރެއްގައިވެސް ދައުލަތުގެ ގިނަ ކުންފުނިތަކެއް ވެގެން ގޮސްފައިވަނީ، ކޮރަޕްޝަންގެ ތުހުމަތުތައް އެންމެ ބޮޑަށް ކުރެވޭ، މި ތަންތަނުގެ އިސްފަރާތްތަކުން ހިންގާފައި ކޮރަޕްޝަންގެ އަމަލުތައް ފާއިތުވެދިޔަ ތަނުގައި ސާބިތުވެ، އަދި މިފަދަ ބައެއް މައްސަލަތައްވަނީ މިހާރު ޝަރުއީ މަރުހަލާއާއި ހަމައަށް ދަތުރުވެސް ކޮށްފައެވެ.

މީގެތެރޭގައި ހުރިހާ ސަރުކާރެއްގައިވެސް އެންމެ ބޮޑު ތުހުމަތެއް ކުރެވޭ، ދައުލަތުގެ އެންމެ ބޮޑު ކުންފުންޏަކަށް ވެގެން ގޮސްފައިވަނީ، ރަށްރަށަށް ކަރަންޓުގެ ޚިދުމަތް ފޯރުކޮށް ދިނުމަށް އަމާޒުކޮށް އުފައްދާފައިވާ ފެނަކަ ކޯޕަރޭޝަންއެވެ. މިގޮތުން މިސަރުކާރުގައިވެސް މި ކުންފުނީގެ މައްޗަށް ކޮރަޕްޝަންގެ އެތަކެއް ތުހުމަތުތަކެއް ކުރެވި، އަދި ކުންފުނީގެ އެމްޑީ އަހުމަދު ސައީދުއާއި ގުޅުންހުރި 28 މައްސަލައެއް، އޭގެ ތަފްސީލުތައް ހިމެނޭގޮތުން އޭސީސީއަށް ހުށަހެޅިގެން ގޮސްފައިވާކަން މިފުރުސަތުގައި ފާހަގަ ކޮށްލާން ޖެހެއެވެ.

މިގޮތުން ފެނަކަ ކޯޕަރޭޝަން މެދުވެރިކޮށް ހިންގާ ކޮރަޕްޝަންގެ އަމަލުތައް ނުހުއްޓުވައިފި ނަމަ ދައުލަތަށް ބޮޑު ގެއްލުމެއް ލިބިދާނެ ކަމަށް ތުހުމަތުކޮށް އެ ކުންފުނީގެ މުވައްޒަފުންތަކެއް އެންޓި ކޮރަޕްޝަން ކޮމިޝަން (އޭސީސީ)އަށް ހުށަހެޅި 28 މައްސަލައިގެ ތެރެއިން 22 މައްސަލަ ތަހުގީގު ކުރަން ނިންމާފައިވާކަންވެސް 2020ވަނަ އަހަރުގެ ސެޕްޓެމްބަރުމަހު އޭސީސީން ހާމަ ކޮށްފައިވެއެވެ.

އޭސީސީގެ މީޑިއާ އޮފިޝަލް އޭރު ވިދާޅުވެފައިވަނީ، ފެނަކައާ ގުޅޭ ގޮތުން ހުށަހެޅި ޝަކުވާތައް ވަޒަންކުރުމަށް ފަހު 22 މައްސަލައެއް ތަހުގީގު ކުރަން ކޮމިޝަނުން ނިންމާފައިވާ ކަމަށާއި، އަދަދު 22 އަށް މަދުވީ ބައެއް މައްސަލަތައް އެއްކޮށްލައިގެން ބަލަން ނިންމުމުން ކަމުގައެވެ.

އެހެންނަމަވެސް، ކޮރަޕްޝަނާއި ގުޅުންހުރި ބޮޑެތި ތުހުމަތުތަކެއް ކުރެވޭ، އަދި ތުހުމަތުތަކަށް ބާރު ލިބިދޭ އެތަކެއް ހެއްކަކާއި ލިޔެކިޔުންތަކާވެސް އެކީ އެކިމޮޝަނަށް ހުށަހެޅިގެންދިޔަ މިމައްސަލަތައް އޭސީސީގައި ކުރިޔަށް ނުގޮސް ދޮޅު އަހަރު ފާއިތުވެގެން ގޮސްފައިވާއިރު، އެކޮމިޝަނަގެ މެމްބަރުން މަގާމުން އިސްތިއުފާ ދެއްވާ، އާ މެމްބަރުންތަކެއް މިހާރުވަނީ ކޮމިޝަނަށް އައްޔަންވެސް ކޮށްފައެވެ. އެހެންމަމަވެސް މިމައްސަަތަކަށް ވީގޮތެއް، ކޮރަޕްޝަނަށް ތުހުމަތުކުރެވޭ ބޮޑެތި މިމައްސަލަތައް ކުރިޔަށް ނުގޮސް އަހަރެން ފާއިތުވެގެން ދިޔަ ސަބަބެއް ފާއިތުވެދިޔަ ތަނުގައި އެކޮމިޝަނުން މީޑިއާތަކަށް ހާމަ ކޮށްފައެއް ނުވެެއެވެ.

އަދި މީގެ އިތުރުންވެސް، ފާއިތުވެދިޔަ މުއްދަތުގައި ފެނަކަ ކޯޕަރޭޝަން ހިމެނިގެން ގޮސްފައިވަނީ، އެ ކުންފުނީގެ ބައެއް މުވައްޒަފުންތައް ނުހައްގުން މަގާމުން ވަކިކުރުމުގެ ތުހުމަތު ކުންފުނީގެ މިހާރުގެ މެނޭޖްމަންޓަށް ކުރެވި، އަދި އެމްޕްލޯއިމްނަޓް ޓްރިބިއުނަލްއިން ބައެއް މުވައްޒަފުންގެ މަގާމްތައް އިއާދަކޮށްދިނުމަށް ކުންފުނީގެ މައްޗަށް އެންމެ ގިނައިން އަމުރު ކޮށްފައިވާ ދައުލަތުގެ ކުންފުނި ކަމުގައިވެސްމެއެވެ.

ހަމަ އެފަދައިން، ފާއިތުވެދިޔަ، ކޮމަންޑޫ ދާއިރާގެ ބައި އިލެކްޝަންގައި ވޯޓަށް ނުފޫޒު ފޯރުވިކަމުގެ ތުހުމަތު ކުންފުނީގެ އިސްމުވައްޒަފެއްގެ މައްޗަށް ކުރެވި، ސޯޝަލް މީޑިއާގައި އާންމު ވެގެންދިޔަ އޯޑިއޯއަށްފަހު، ތުހުމަތު ކުރެވުނު މުވައްޒިފު މަގާމުން ދުރުކުރުމަށް ޚުދު އެމްޑީޕީގެ ލީޑަޝިޕުންވެސް ކުރި ޑިމާންޑްތަކާއެކުވެސް، ފެނަކަ ކޯޕަރޭޝަންގެ އެމްޑީ ވަނީ، އެ މުވައްޒަފު ވަޒީފާއިން ދުރުކުރުމަށް ދެކޮޅު ހައްދަވާފައެވެ. ބައެއް ފަރާތްތަކުން ތުހުމަތު ކުރާގޮތުގައި،. ފެނަކަ ކޯޕަރޭޝަންގެ އިސްމަގާމްތަކަށް އިސް މުވައްޒިފުން ހަމަޖައްސާފައިވަނީ، ފަންނީ ގާބިލްކަމަށްވުރެ ބޮޑަށް، ހުންނެވި އެމްޑީއާއި އޮންނަ ގާތްކަމުގެ މައްޗަށް ރިއާޔަތް ކޮށްގެނެވެ.

ކުރިޔަށް އޮތް ރިޔާސީ އިންތިޚާބަށް ކުންފުނިތައް ސާފުކުރުން މުހިންމު!

ދައުލަތުގެ ބައެއް ކުންފުނިތައް ސަރުކާރުގެ ދާއިމީ ބޮލުގެ ރިހުމަކަށް ވެގެން ދިއުމަކީ، ބައެއް ފަރާތްތަކުން ދެކޭ ގޮތުގައި ރައީސް އިބުރާހިމް މުހައްމަދު ސާލިހަށް 2023ގައި ކުރިމަތިލައްވަން ޖެހިވަޑައި ގަންނަވާނޭ ވަރަށް ބޮޑު ގޮންޖެހުމެކެވެ. ސަބަބަކީ ސަރުކާރުގެ ބައެއް ކުންފުނިތަކުގެ ވެރީންގެ މައްޗަށް ކުރެވެމުންދާ ކޮރަޕްޝަންގެ ތުހުމަތުތަކަށް އެބޭފުޅުންނަށް ޖަވާބުދާރީ ވެވިފައި ނުވާތީވެސް މެއެވެ.

އަދި މިފަދަ ބައެއް ކުންފުނިތަކަކީ ދައުލަތުން ފޯރުކޮށްދޭ އަސާސީ ޚިދުމަތައް ފޯރުކޮށްދިނުމުގެ މަސްއޫލިއްޔަތު މަތިކުރެވިފައިވާ ކުންފުނިތަކަށް ވެގެން ދިއުމާވެސްއެކު، މި ގޮތުން ކުރެވިފައިވާ ތުހުމަތުތައް އަބަދުވެސް ވެގެން ގޮސްފައިވަނީ، ގިނަ އަދަދެއްގެ އާންމު ރައްޔިތުންވެސް، ކުރެވޭ ތުހުމަތުތަކުގެ ޖަވާބު ހޯދަން ބެނުންވާ އަދި އަކަމަށް ޑިމާންޑްކުރާ ތުހުމަތު ތަކަކަށެވެ.

އޭގެ ނަތީޖާއެއްގެ ގޮތުން، މިދެންނެވުނު ކުންފުނިތަކަކީ ރައީސް ސާލިހު ވެވަޑައިގެންފައިވާ، ކޮރަޕްޝަނަނަށް ޒީރޯ ޓޮލަރެންސްގެ ވައުދު އެކަށިގެންވާ ގޮތެއްގައި ފުއްދުމަށް އޮތް ބޮޑު ހުރަހަކަށް ވެގެން ގޮސްފައިވާއިރު، ފާއިތުވެދިޔަ ތަނުގައި މިފަދަ ބައެއް ކުންފުނިތައް ރައީސް ސާލިހު އުވާލައްވާފައި ވާކަންވެސް މިފުރުސަތުގައި ފާހަގަ ކޮށްލާންޖެހެވެ.

މިގޮތުން ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑް ކުންފުނި ސަރުކާރުން އުވާލައްވާފައިވަނީ، އެ ކުންފުނީގެ އޭރުގެ އެމްޑީގެ މައްޗަށް ކުރެވިގެންދިޔަ ކޮރަޕްޝަންގެ ބޮޑެތި ތުހުމަތަކާއެކުއެވެ. އަދި ކުންފުނި އުވާލުމަށްފަހު، ސަރުކާރުންވަނީ ކުންފުނީގެ އެސެޓްތަކާއި، މުވައްޒިފުންނާއި އަދި ޒިންމާތައްވެސް ހުޅުމާލެ ޑިވެލޮޕްމަންޓް ކޯޕަރޭޝަން، އެޗްޑީސީގެ ދަށަށް ބަދަލު ކޮށްފައެވެ. އަދި ސަރުކާރުން ގެންނެވި މި ބަދަލުގެ ހެޔޮ ނަތީޖާ ފާއިތިވެދިޔަ ތަނުގައި ވަނީ ފެނިގެންވެސް ގޮސްފައެވެ.

އެހެންކަމުން، ރައީސް ސާލިހުގެ ކޮރަޕްޝަނަށް ޒީރޯ ޓޮލަރަންސްގެ ވައުދު ފުއްދުމަށް އޮތް އެއްހުރަހަކީ ދައުލަތުގެ ބައެއް ކުންފުނިތައް ކަމީ ކަށަވަރުވެ ޔަގީންވާން އޮތް ކަމެކެވެ. އަދި މި ކުންފުނިތައް ކޮށާމަށާ، 2023ގެ ރިޔާސީ އިންތިޚާބަށް މަގު އަމާން ކުރުމުގައި، މިދެންނެވުނު ކުންފުނިތަކަށް އިސްލާޙީ ހެޔޮބަދަލު ގެނައުމަކީވެސް ކޮންމެހެން މުހިންމު ކަމެއްގައިވެސް ދަންނަވާން ޖެހެއެވެ.