ފާއިތުވެދިޔަ ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް ދޭންފެށި އުދުވާނީ ހަމަލާތަކަކީ، ފަހުގެ ޒަމާނެއްގައި އިގްތިސާދީ ގޮތުންނާއި ސިޔާސީ ގޮތުންވެސް ދުނިޔެއަށް އެންމެ ބޮޑު ބަދަލެއް ގެނުވި އެއް ހަމަނުޖެހުން ކަމުގައި ދެންނެވިދާނެއެވެ.
މިގޮތުން މި ހަގުރާމައިގެ އަސަރު މިއަދު، އެއްގައުމު އަނެއް ގައުމާ ދެމެދު އޮންނަ ގުޅުމުން ފެށިގެން، ގައުމުތަކުގެ އިގްތިސާދީ ހާލަތަށާއި، އަދި އޭގެ އިތުރުން ދުނިޔޭގެ ޖަމިއްޔާ ޖަމާއަތްތަކާ ހަމައަށްވެސް ވަނީ އެތައް ގޮތަކުން ފޯރާފައެވެ. އަދި މީގެ އިތުރުން، މި ހަގުރާމަ ވެގެން ގޮސްފައިވަނީ، އެކުވެރި ދައުލަތްތަކުގެ ޖަމިއްޔާ، ޔޫއެންގެ ބާރު ކަނޑުވާލާ، މި ޖަމިއްޔާއަކީ، ޖަމިއްޔާގެ ސެކިއުރިޓީ ކައުންސިލްގައި ހިމެނޭ ވީޓޯގެ ބާރު ލިބިފައިވަ އެއްވެސް ގައުމެއް ޒިންމާދާރު ކުރުވުމުގެ ބާރު އޮތް ޖަމިއްޔާއެއް ނޫންކަންވެސް ވަރަށްވެސް ރަގަޅަށް ތަމްސީލު ކޮށްދިން ހަނގުރާމައަށެވެ.
އަދި މީގެ އިތުރުން، ރަޝިއާގެ އުދުވާންއާއި ދެކޮޅު ހެދުމުގެ ގޮތުން، އެގައުމާ ދެކޮޅަށް އެމެރިކާއާއި މުޅި ޔޫރަޕް އެއްގަލަކަށް އަރާފައިވާއިރު، މިގައުމުތަކުންވަނީ، ދުނިޔޭގެ ތާރީޚުގައި ގައުމަކާ ދެކޮޅަށް އަޅާފައިވާ އެންމެ ހަރުކަށި، އިގްތިސާދީ ގޮތުން ދަތިކުރުމުގެ ފިޔަވަޅުތައް ރަޝިއާއާއި ދެކޮޅަށް އަޅާފައެވެ. އެހެންނަަމަވެސް، ރަޝިއާއަކީ ދުނިޔޭގެ އެތައް ގައުމަކާއެކީ ވިޔަފާރީގެ ގުޅުންތައް ދަމަހައްޓާ، ދުނިޔޭގެ އެންމެ ބޮޑެތި އިގްތިސާދުތަކުގެ ތެރޭގައި ހިމެނޭ އެއް އިގްތިސާދުކަމަށް ވުމުގެ ނަތިޖާއެއްގެ ގޮތުން، މި ދަތިކުރުމުގެ ފިޔަވަޅުތަކުގެ އަސަރު ރަޝިއާގެ އިތުރުން ދުނިޔޭ އެތައް ގައުމެއްގެ އިގްތިސާދުންވެސް ދަނީ ފެންނަމުންނެވެ.
މިގޮތުން، ޔޫކުރެއިން ހަނގުރާމައިގެ ނަތީޖާއެއްގެ ގޮތުން، އިގްތިސާދީ ގޮތުންނާއި ސިޔާސީ ގޮތުން މުޅި ދުނިޔެއަށް އަންނަމުންދާ ބޮޑެތި ބަދަލުތަކުގެ ތެރޭގައި، ގައުމުތަކުގެ މެދުގައި އޮތް ބައިލެޓްރަލް ގުޅުންތަކަށް މި ހަގުރާމައިން އުފެދުނު ދެކޮޅުވެރިކަމުގެ އަސަރުތައް ވަނީ އިންތިހާއަށް ބޮޑަށް ކޮށްފައެވެ.
ޕާކިސްތާންގެ ސަރުކާރު ބަދަލުވުމާއި، ގައުމުތަކަށް އެމެރިކާގެ އިންޒާރު!
ޕާކިސްތާނުގެ ބޮޑުވަޒީރު ކަމުގައި ހުންނެވި، އެގައުމުގެ ކުރީގެ މަޝްހޫރު ކުރިކެޓް ކުޅުންތެރިޔާ، އިމްރާން ޚާން މަގާމުން ދުރުކޮށް، ޕާކިސްތާނުގެ ވެރިކަން ބަދަލުކުރުގެ ތުހުމަތު، އިމްރާންގެ ޕާޓީ އަޅުވަނީ އެމެރިކާގެ ބޮލުގައެވެ. އިމްރާ ޚާން ތުހުމަތު ކުރައްވާފައިވާ ގޮތުގައި އޭނާ މަގާމުން ދުރުކޮށްފައި ވަނީ އެމެރިކާ އަޑީގައި އޮވެގެން، ރަޝިއާއި އަދި ޗައިނާއާއި ގުޅުންހުރި މައްސަލަތަކުގައި އެމެރިކާގެ ސިޔާސަތުތަކަށް އޭނާ ތާއީދު ނުކޮށްގެންނެވެ. އަދި އޭނާ ތުހުމަތު ކުރައްވާފައިވާ ގޮތުގައި، ޕާކިސްތާންގެ ގާނޫނުހަދާ މަޖިލިހުގައި އޭނާއާއި ދެކޮޅަށް ވޯޓު ހަމަ ކުރުމަށްޓަކާ ބޮޑެތި އަދަދުތަކުން ރިޝްވަތު ދީފައިވެސް ވެއެވެ.
އިމްރާން ޚާންއަކީ ރަޝިއާއިން ޔޫކުރެއިންގައި ކުރަމުންދާ ހަނގުރާމާގައި ސީދާގޮތުން ރަޝިއާ ކުށްވެރި ނުކުރާ، ދުނިޔޭގެ މަދު ގައުމުތަކުގެ ތެރޭގައި ހިމެނޭ އެއްގައުމެވެ. ހަނގުރާމަ ފެށުނުފަހުން ރަޝިއާއި ދެކޮޅަށް ޔޫކުރެއިންގައި ނަގާފައިވާ ދެ ވޯޓުގައިވެސް ޕާކިސްތާން ހިމެނިގެން ދިޔައީ އެއްވެސް ކޮޅަކަށް ވޯޓު ނުދޭ މަދު ގައުުތަކުގެ ތެރޭގައި ހިމެނިގެންދިޔަ ގައުމަކަށް ކަމުގައެވެ. ޔޫކުރެއިން ހަނގުރާމަ ފެށުނުފަހުން އިމްރާން ޚާންވަނީ ރަޝިއާއަށް ވަޑައިގެން އެގައުމުގެ ރައީސް ލާޑިމިރު ޕުޓިންއާ ބައްދަލުވެސް ކުރައްވާފައެވެ.
އެހެންނަމަވެސް، އިމްރާން ޚާންގެ ސަރުކާރު ބަދަލު ކޮށްލުމުގެ ފަހަތުގައި އޮތްކަމަށް ކުރެވޭ ތުހުމަތު އެމެރިކާއިން ދޮގުކޮށްފައި ވެއެވެ.
މީގެ އިތުރުންވެސް، ޔޫކުރެއިން ހަގުރާމަ ފެށުނުފަހުން، މި ހަނގުރާމާގައި ރަޝިއާގެ އުދުވާން ކުށްވެރި ކުރުމަށް ފަސްޖެހި، އަދި ޔޫއެންގައި ރަޝިއާއި ދެކޮޅަށް ވޯޓު ދީފައި ނުވާ ގައުމަތަކުގެ ލީޑަރުންނާއި ވާރޗުއަލްކޮށް ބައްދަލު ކުރައްވާ އެމެރިކާގެ ރައީސް ޖޯ ބައިޑްން ގެންދަވަނީ، އެގައުމުގެ މެސެޖް ސާފު ކޮށްދެއްވަމުންނެވެ. މިގޮތުން ފާއިތުވެދިޔަ ހަފްތާގައި ޖޯ ބައިޑްންވަނީ ދެކުނު އެފްރިކާގެ ރައީސް ރަމަފޯސާއަށް ގުޅުއްވާ، މި ހަނގުރާމާގައި އެގައުމުގެ "ސްޓޭންޑް" ސާފު ކޮށްދިނުމަށް އެދިވަޑައިގެންފައެވެ. ބައިޑްން ރަމަފޯސާއަށް ގުޅުއްވާފައިވަނީ، ރަޝިއާ ޔޫއެންގެ ހިއުމަންރައިޓްސް ކައުންސިލުން ސަސްޕެންޑް ކުރުމަށް އާންމު މަޖިލިހުގައި ނެގުނު ވޯޓުގައި އެގައުމުން އެއްވެސް ކޮޅަކަށް ތާއީދުކޮށް ވޯޓު ނުދިނުމާއި ގުޅިގެންނެވެ. ބެލެވޭ ގޮތުގައި، ބައިޑްންގެ އަމިއްލަ އިސްނެންގެވުމަށް އޭނާ ދެކުނު އެފްރިކާގެ ރައީސަށް ގުޅުއްވާ ފާޅު ކުރެއްވި ކަންބޮޑުވުންތަކަކީ، އެގައުމަށް އެމެރިކާއިން ފޯރުކޮށްދިން ވަރަށް ވަރުގަދަ މެސެޖެކެވެ.
ހަމަ އެފަދައިން، ނިއުކުލިއަރ ބާރެއްގެ ގޮތުގައި އޮތް އިންޑިއާއަކީވެސް، ޔޫކުރެއިން ހަނގުރާމާގައި ވަކިއަތަކަށް ނުޖެހި، ރަޝިއާގެ އުދުވާން ކުށްވެރިކުރުމަށް މިހާތަނަށް ދެކޮޅު ހަދާފައިވާ ގައުމެކެވެ. އިންޑިއާއަކީ، ރަޝިއާއާއެކީ އަސްކަރީ ގުޅުން ވަރަށް ބޮޑަށް ގާއިމް ކޮށްފައިވާ ގައުމެކެވެ. އަދި އިންޑިއާއިން ވަނީ، ހަނގުރާމަ ފެށުނުފަހުން، ރަޝީއާއިން އަގު ހެޔޮކޮށް 13 މިލިއަން ފީފާގެ ކުރޫޑު އޮއިލް (ސާފު ނުކުރާ ތެޔޮ) ގަނެފައިވެސްމެއެވެ. ރަޝިއާއާއި ދެކޮޅަށް ޔޫއެންގައި ފަހުން ނެގިގެންދިޔަ ހުރިހާ ވޯޓެއްގައިވެސް އިންޑިއާއިންވަނީ ވަކި ކޮޅަކަށް ވޯޓު ނުދީފައެވެ.
ނަތީޖާއެއްގެ ގޮތުން، މި ހަފްތާގައި އެމެރިކާގެ ރައީސްވަނީ އިންޑިއާގެ ބޮޑުވަޒީރާ ވާޗުއަކްކޮށް ބައްދަލު ކުރައްވާ، ރަޝިއާގެ ޔެތޮ ގަތުމުގައި އިންޑިއާގެ މަސްލަހަތެއް އޮންނާނޭކަމަށް އެމެރިކާއިން ގަބޫލު ނުކުރާކަމުގައި ވިދާޅުވެފައެވެ. އަދި މި ބައްދަލުވުމުގައިވެސް އެމެރިކާއިން އިންޑިއާއަށް ފޯރުކޮށްދިން މެސެޖަކީ، ޔޫކުރެއިން ހަގުރާމައިގައި އިންޑިއާއިން ވަކިއަތަކަށް ބުރަވެ ނެތުމަކީ، ރަޝިއާއަށް ތާއީދުކުރުންކަމަށް އެމެރިކާއިން މޭރުން ކުރާ ކަމުގެ މެސެޖެވެ.
އެހެންކަމުން ހުރިހާ ގޮތަކުން ބެލިކަމުގައިވި ނަމަވެސް، ޔޫކުރެއިން އާއި ދެކޮޅަށް ރަޝިއާއިން ކުރަމުންދާ ހަނގުރާމައިގައި، ބައެއް ގައުމުތަކުން ވަކި އަތަކަށް ނުޖެހުން ވެގެން ގޮސްފައިވަނީ އެމެރިކާއާއި ޔޫރަޕުގެ ގައުމުތަކުން އެގައުމަކާ ދޭތެރޭ ދެކެމުންދާ ގޮތް ބަދަލުވެ، އަދި އޭގެ އަސަރު ދޭދޭ ގައުމުތަކުގެ ގުޅުމަށް ކުރަމުންދާ ނިންމުންތަކެއްގެ ގޮތުގައެވެ.
ރާއްޖެއިން ދަނީ، ހިއުމަންރައިޓްސް ކައުންސިލްގެ ގޮނޑިއަށް ވާދަކުރަމުން!
ރާއްޖެއަކީ ކުޑަ ގައުމަކަށް ވި ނަމަވެސް، ރާއްޖެއިންވަނީ ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތައް ކުށްވެރި ކޮށްފައެވެ. އަދި ރަޝިއާގެ އުދުވާން ކުށްވެރި ކުރުމަށް އާންމު މަޖިލިހުގައި އެންމެ ފުރަތަމަ ނެގުނު ވޯޓުގައި ރާއްޖެއިންވަނީ ރަޝިއާއި ދެކޮޅަށް ވޯޓު ދީފަައެވެ.
އެހެންނަމަވެސް، ޔޫއެންގެ ހިއުމަންރައިޓްސް ކައުންސިލުން ރަޝިއާ ސަސްޕެންޑު ކުރުމަށް އާންމު މަޖިލިހުގައި ނެގިގެންދިޔަ ވޯޓުގައި ރާއްޖެ ހިމެނިގެން ދިޔައީ، 193 މެމްބަރު ގައުމުގެ މައްޗަށް އެކުލެވޭ އާންމު މަޖިލީހުގައި އެއްވެސް ކޮޅަކަށް ވޯޓު ނުދޭ 58 ގައުމުގެ ތެރޭގައެވެ.
ރަޝިއާ ޔޫއެން ހިއުމަން ރައިޓްސް ކައުންސިލުން ސަސްޕެންޑް ކޮށްފައިވަނީ، ޔޫކުރެއިން ބުޗާ ޓައުން އެގައުމުގެ ބާރުގެދަށަށް ގެނެސްފައި އޮތް މުއްދަތުގައި، އެ ޓައުންގައި ރަޝިއާގެ އަސްކަރިއްޔައިން ހިންގާފައިވާ، އިންސާނިއްޔާތާއި ޚިލާފް ޖަރީމާތަކުގެ ސަބަބުން، އެގައުމަށް ދިން އަދަބެއްގެ ގޮތުންނެވެ. އެހެންކަމުން ހުޅަނގާއި ޔޫރަޕްގެ ގިނަ ގައުމުތަކުންވެސް ދެކެފައިވާ ގޮތުގައި، ރަޝިއާއިން ހިންގާފައިވާ އިންސާނިއްޔަތާއި ޚިލާފް ބޮޑެތި ޖަރީމާތަކުގެ ސަބަބުން ހިއުމަން ރައިޓްސް ކައުންސިލުގައި އިނުމުގެ އެއްވެސް ހައްގެއް އެގައުމަށް މިހާރަކު ނެތެވެ.
ހަމައެއާއެކު ޕާހަގަ ކޮށްލާންޖެހޭ މުހިންމު ނުކުތާއަކީ، ޔުއެން ހިއުމަން ރައިޓްސް ކައުންސިލްގެ ކުރިޔަށްއޮތް ދައުރުގެ ގޮނޑިއަކަށް ރާއްޖެއިން މިހާރު ވާދަކުރަމުން ދާކަމެވެ. އަދި މިގޮޑިއަށް އިންތިޚާބު ވުމަށް ކުރަމުންދާ ކެމްޕޭންގައި ރާއްޖެއަށް ހުޅަނގާއި ޔޫރަޕްގެ ގިނަ ގައުމުތަކުގެ ވޯޓުވެސް މުހިންމު ވެގެން ދާނެއެވެ. ރައީސް އިބްރާހިމް މުހައްމަދު ސާލިހު ވެރިކަމަށް ވަޑައިގެންވި ފަހުން ރާއްޖޭގެ އިންސާނީ ހައްގުތަކުގެ ރެކޯޑް ރަގަޅުވެގެން ގޮސްފައި ވުމާއެކު، މި ކައުންސިލަށް ރާއްޖެއިން އިންތިޚާބު ވުމަށް ގިިނަ ގައުމުތަކުން ތާއީދު ކުރާނެކަމުގައިވެސް ވަނީ ބެލެވިފައެވެ.
އެހެންނަމަވެސް، ޔޫރަޕާއި އެމެރިކާ، ޖަޕާން، އޮސްޓްރޭލިއާއާއި އަދި މިނޫނަސް ދުނިޔޭގެ ބޮޑެތި އެތައް ގައުމަކުން ޔޫކުރެއިން ހަގުރާމާގައި ނަގާފައި "ސްޓޭންޑު"ތަކަށް ބަލާއިރު، ދުނިޔޭގެ އެހެން ގައުމުތަކުން ޔޫކުރެއިން ހަގުރާމާއައި ގުޅޭގޮތުން އަމަލް ކުރަމުންދާ ގޮތްތަކުގެ މައްޗަށް ދޭދޭ ގައުމުތަކުގެ ގުޅުންތައްވެސް ބައްޓަން ވަމުންދާއިރު، މި ހަނގުރާމާގައި ވަކިއަތަކަށް ނުޖެހޭ ގައުމެއްގެ ގޮތުގައި އޮވެގެން ރާއްޖެއަށް ހާސިލްކުރެވިދާނޭ ކަންކަމަކީ ކޮބައިތޯ މިއީ ހަގީގަތުގައިވެސް ޖަވާބު ހޯދާންޖެހޭ ސުވާލެއްކަމުގައި ދަންނަވާން ޖެހެއެވެ.
