ގދ.ފަރެސްމާތޮޑާ އެއަރޕޯޓުގެ ރަންވޭގެ ތާރުއެޅުމުގެ މަސައްކަތް ފެށިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އިން ވިދާޅުވެއްޖެއެވެ.
އެމްޓީސީސީން ބުނެފައިވަނީ ފަރެސްމާތޮޑާ އެއަރޕޯޓް ތަރައްޤީ ކުރުމުގެ މަޝްރޫޢުގެ ދަށުން، އެއަރޕޯޓް ރަންވޭގައި ތާރު އެޅުމުގެ މަސައްކަތް މިހާރު ދަނީ ކުރެވެމުން ކަމަށެވެ. މިއެއަރޕޯޓް މިދިޔަ ނޮވެމްބަރުމަހުގެ ނިޔަލަށް ނިންމުމަށް މަސައްކަތް ކުރިނަމަވެސް ރާއްޖެއިން ބޭރުން ގެންނަންޖެހޭ ބައެއް ސާމާނު ލިބުމުގައި ދަތިތަކެއް ކުރިމަތިވެ މަސައްކަތް ލަސްވެފައިވާކަން އެމްޓީސީސީން ފާހަގަކުރައްވައެވެ.
ފަރެސްމާތޮޑާ އެއަރޕޯޓް ތަރައްޤީ ކުރުމުގެ މަޝްރޫޢުގެ ދަށުން، އެއަރޕޯޓް ރަންވޭގައި ތާރު އެޅުމުގެ މަސައްކަތް މިހާރު ދަނީ ކުރެވެމުން. #MTCCProjects #RayyithungeKunfuni pic.twitter.com/eiRklUIgHS
— MTCC Plc (@MTCCPlc) April 4, 2022
އެމްޓީސީސީއިން މަސައްކަތްކުރަމުން އަންނަނީ މިއަހަރުގެ މިނިވަންދުވަހާ ދިމާކޮށް މިއެއަރޕޯޓް ރަސްމީކޮށް ބޭނުންކުރެވޭގޮތް ހެދުމަށެވެ.
ފަރެސްމާތޮޑާ އެއަރޕޯޓަކީ އެތެރޭގެ އުދުހުންތަކަށް ޚާއްސަކޮށްގެން ތަރައްޤީކުރާ އެއަރޕޯޓެކެވެ. އެއަރޕޯޓްގެ ޓަރމިނަލްގެ މަސައްކަތްތައް މިހާރު ކުރިއަށްދާއިރު މި ޓަރމިނަލް ތަރައްޤީކުރާނީ ތަފާތު ހިތްގައިމު ފަރުމާއަކަށެވެ. މިއީ ރާއްޖޭގައި އެރެތޭގެ އުދުހުންތަކަށް ޚާއްސަކޮށް ހަދާ އެންމެ ތަފާތު ޓަރމިނަލްވެސްމެއެވެ. ހަމައެއާއެކު ޓާމިނަލްގެ ފަޔަރ ބިލްޑިންގެ މަސައްކަތްވެސްދަނީ ކުރިއަށެވެ.
ފަރެސްމާތޮޑާ ހިމެނޭ ސަރަޙައްދުގެ ކުދި ފަޅުރަށްތަކާއެކު ޖުމްލަ 19.9 ހެކްޓަރުގެ ބިން އެމްޓީސީސީން ވަނީ މިމަޝްރޫޢުއަށްޓަކައި ހިއްކާފައެވެ. 1200 މީޓަރުގެ ރަންވޭއަކާއެކު 888 މީޓަރުގެ ސަރަޙައްދެއްގައި ވަނީ ބޮޑުހިލަޖަހާފައެވެ. އަދި މި މަޝްރޫޢަކީ ދައުލަތުގެ ބަޖެޓުން 144.8 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫއެކެވެ.
މިމަޝްރޫޢަކީ ފަރެސްމާތޮޑާ ރައްޔިތުންނާއި އެސަރަޙައްދުގެ ރަށްރަށުގެ ރައްޔިތުންގެ އުންމީދާ ގުޅިފައިވާ އެއަރޕޯޓެކެވެ. މިއެއަރޕޯޓާއިއެކު އިތުރު ވަޒީފާތައް އުފެދި، އިޤުތިޞާދީ އިތުރު ކުރިއެރުންތައް ލިބިގެންދާނެއެވެ.
ކޮމެންޓު ފޮނުވާ