ރަޝިއާއިން ޔޫކުރެއިންއަށް އަސްކަރީ ހަމަލާ ދޭން ފަށާފައިވާއިރު، މަގުތަކަށް ނިކުމެ ގައުމުގެ ދިފާޢުގައި ހަގުރާމަ ކުރުމަށް ނިކުންނަ ރައްޔިތުންނަށް ބޭނުންވާވަރަށް ހަތިޔާރު ދޫކުރާނެކަމަށް ވައުދުވެ، ރަޝިއާއި ދެކޮޅަށް ހަގުރާމަ ކުރުމަށް ނިކުތުމަށް ޔޫކުރެއިންގެ ރައީސް ވޮލޮޑޮމިރު ޒެލެންސްކީ އެގައުމުގެ ރައްޔިތުންނަށް ގޮވާލައްވައިފިއެވެ.
"ރައްޔިތުންގެ ތެރެއިން ގައުމުގެ ދިފާޢުގައި ނުކުންނަ ހުރިހާ ރައްޔިތުނަށްވެސް ހަތިޔާރު ފޯރު ކޮށްދޭނަން. ޔޫކުރެއިންގެ ހިމާޔަތުގައި އާންމު ތަންނަތަނަށް ނިކުންނަވަން ހުރިހާ ރައްޔިތުންގެވެސް ތައްޔާރަށް ތިއްބަވާ،" ޒެކެންސްކީ ޓުވީޓު ކުރައްވާފައި ވެއެވެ.
ހަގުރާމައަށް ނިކުތުމަށް ޔޫކުރެއިންގެ ރައީސް އެގައުމުގެ ރައްޔިތުންނަށް ގޮވާލައްވާފައި މިވަނީ، މިއަދު ހެދުނުން ފެށިގެން ރަޝިއާގެ އަސްކަރިއްޔާއިން ޔޫކުރެއިންގެ ސިފައިންގެ މަގާމްތަކަށް އަސްކަރީ ހަމަލާ ދޭންފަށާފައި ވަނިކޮށެވެ. އަދި ދުނިޔޭގެ މީޑިއާތަކުން ރިޕޯޓު ކޮށްފައިވާ ގޮތުގައި، ރަޝިއާއިން ދަނީ ޔޫކުރެއިންގެ ވެރިރަށް ކީވްއަށްވެސް މިސައިލް ހަމަލާތައް ދެމުންނެވެ.
ޔޫކުރެއިންއިން ރަޝިއާގެ އަސްކަރީ ހަމަލާތައް ރިޕޯޓު ކުރަމުންދާ ނޫސްވެރިން ރިޕޯޓު ކުރަމުންދާ ގޮތުގައި ރަޝިއާއިން ޔޫކުރެއިންއަށް ދެމުންދާ ހަމަލާތަކަކީ ކުރިން ހީކުރެވިފައިވަރަށްވުރެވެސް ވަރުގަދަ ހަމަލާތަކެކެވެ. އަދި ޔޫކުރެއިންގެ ފޮރިންގ މިނިސްޓަރު ވިދާލުވެފައިވަނީ، މުޅި ޔޫކުރެއިން ހިފުމަށް ރަޝިއާއިން އެގައުމަށް އުދުވާނީ ހަމަލާތައް ދެމުން ދާކަމުގައެވެ.
އަދި ހަމަލާތައް ހަމައެކަނި އަމާޒުވަމުންދަނީ، ރަޝިއާއިން ޚާއްސަ އަސްކަރީ އޮޕަރޭޝަން ހިންގާނެކަން މިއަދު އިއުލާންކުރި ޔޫކުރެއިންގެ ޑޮންބަސްއާއި ޑޮނެސްކް ސަރައްހައްދަށް އެކަނި ނޫންކަމަށާއި، ޔޫކުރެއިންގެ އިރުމައްޗާއި ހުޅަނގުގެ ސަރަހައްދުތަކުންވެސް ގޮވުމުގެ އަޑުތަކާއި ހަމަލާތަކުގެ އަޑުތައް އިވެމުންދާކަމަށްވެސް ބައިނަލްއަގުވާމީ މީޑިއާތަކުން ދަނީ ރިޕޯޓު ކުރަމުންނެވެ.
ރަޝިއާއިން ޔޫކުރެއިންއަށް އަސްކަރީ ހަމަލާ ދޭން ފެށުމާއިއެކު، ޔޫކުރެއިންގެ ރައީސް ޒެލެންސްކީވަނީ އެގައުމުން ރަޝިއާއެކު ގާއިމް ކޮށްފައިވާ ސިޔާސީ ގުޅުން ކަޑާލިކަން އިއުލާން ކުރައްވާފައެވެ. އަދި އޭނާވަނީ، ރަޝިއާގެ އުދުވާންއާއި ދެކޮޅަށް މުޒާހިރާ ކުރުމަށްވެސް ރަޝިއާގެ ރައްޔިތުންނަށް ގޮވާލައްވާފައެވެ.
