ސީރިއާގެ ދާޚިލީ ހަނގުރާމައިގެ ތެރޭގައި އިންސާނިއްޔަތާ ޚިލާފު ޖަރީމާތައް ހިންގި ކަމުގެ ކުށުގައި، އެ ޤައުމުގެ ކުރީގެ ރައީސް ބައްޝާރުލް އަސަދާއި، އޭނާގެ ތިމާގެ ބޭފުޅެއް ކަމަށްވާ އާތިފް ނަޖީބުގެ މައްޗަށް މަރުގެ އަދަބު ދިނުމަށް، ސީރިއާގެ ކޯޓަކުން މިއަދު ހުކުމްކޮށްފި އެވެ.
މިއީ ސީރިއާގެ ތާރީޚުގައި ވެސް ނެރުނު މިފަދަ އެންމެ ފާހަގަކޮށްލެވޭ އެއް ހުކުމް ކަމަށް ބައިނަލްއަގުވާމީ ފަރާތްތަކުން ސިފަކުރެ އެވެ. އާތިފް ނަޖީބަކީ ސީރިއާގެ ދެކުނުގައި އޮންނަ ދަރުޢާ ޕްރޮވިންސްގެ ސިޔާސީ ސަލާމަތާ ބެހޭ ކުރީގެ ވެރިޔާ އެވެ. އެ ޕްރޮވިންސްގައި އޭނާގެ ބެލުމުގެ ދަށުން ސަލާމަތީ ޚިދުމަތްތަކުން އާންމުންނަށް ދިން އަނިޔާތަކުގެ މައްޗަށް، މި ހުކުމް އިއްވުމުގައި ވަރަށް ބޮޑަށް ބިނާކޮށްފައިވެ އެވެ.
ސީރިއާގައި 2011 ވަނަ އަހަރު ފެށުނު އިހުތިޖާޖުތަކަށް ފަހު، ދިގުލައިގެން ދިޔަ ދާޚިލީ ހަނގުރާމައިގައި ސީރިއާގެ އެތައް ހާސް ރައްޔިތުންނެއް މަރާލައި، ޤައުމުގެ ބޮޑު ބައެއް ސުންނާފަތި ކޮށްލާފައިވާ ކަމަށް، އިންސާނީ ހައްގުތަކަށް މަސައްކަތްކުރާ ބައިނަލްއަގުވާމީ ޖަމިއްޔާތަކުން ތުހުމަތުކުރެ އެވެ. އެ އިހުތިޖާޖުތައް ހުއްޓުވުމަށް، އާތިފް ނަޖީބު އިސްކޮށް ހުންނަވާ ހިންގެވި ހަރުކަށި އަމަލުތަކަކީ، މުޅި ޤައުމުގައި ދާޚިލީ ހަނގުރާމަ ފެށުމުގެ ތިކި ޖެހި މައިގަނޑު ސަބަބުތަކުގެ ތެރެއިން އެއް ސަބަބު ކަމަށް މުހައްލިލުން ސިފަކުރައްވަ އެވެ.
މި ހުކުމް އިއްވާފައި މިވަނީ، އަސަދުގެ ވެރިކަން ވެއްޓި، އޭނާ ޤައުމުން ފިލައިގެން ގޮސް، ޤާނޫނުގެ ބާރު ނުފޯރާ ފަދަ ތަނެއްގައި ހުންނަވަނިކޮށެވެ. އެހެންކަމުން، މި ދެ ބޭފުޅުންގެ މައްޗަށް އިއްވި ހުކުމް ތަންފީޒު ކުރެވޭނެ ގޮތަކާ މެދު މިހާރު ވެސް ސުވާލު އުފެދިފައިވެ އެވެ. ނަމަވެސް، ސީރިއާގެ ގިނަ ރައްޔިތުން ދެކޭ ގޮތުގައި، މިއީ އަސަދުގެ އަނިޔާވެރި ވެރިކަމުގައި ގެއްލުން ލިބުނު އާއިލާތަކަށް އިންސާފު ހޯދައިދިނުމުގެ މަގުގައި، ސީރިއާ ސަރުކާރުން އެޅި ފުރަތަމަ ބޮޑު ފިޔަވަޅު ކަމަށްވުމުން، ގިނަ ބަޔަކު އަންނަނީ މި ހުކުމާ ގުޅިގެން މަގުތަކަށް ނުކުމެ އުފާ ފާޅު ކުރަމުންނެވެ.
މި މައްސަލައިގެ ޝަރީއަތް ކުރިއަށް ގެންގޮސްފައި ވަނީ ބައިނަލްއަގުވާމީ ޝަރުޢީ މިންގަނޑުތަކާ އެއްގޮތަށް ކަމަށް، ސީރިއާ މިހާރުގެ ސަރުކާރުގެ ކަމާ ބެހޭ ފަރާތްތަކުން ބުނެ އެވެ.
ކޮމެންޓު ފޮނުވާ