މިޑްޓާމް އިންތިހާބުގައި ރިޕަބްލިކަން ޕާޓީ ބަލިވެ، ކޮންގްރެސްގެ ދެ މަޖިލީހުގެ އަގުލަބިއްޔަތު ޑިމޮކްރެޓުންނަށް ލިބުނީ، އީރާނާ ދެކޮޅަށް ކުރިއަށްގެންދާ ހަނގުރާމައިގެ ދައުރެއް އޮވެގެން ކަމަށް އެމެރިކާގެ ރައީސް ޑޮނަލްޑް ޓްރަމްޕް ގަބޫލުކުރައްވައިފި އެވެ.
އިއްޔެ ބޭއްވި އިންތިހާބަށް ފަހު ފޮކްސް ނިއުސްއާ ވާހަކަ ދައްކަވަމުން ޓްރަމްޕް ވިދާޅުވީ، ނަތީޖާއަށް އަސަރުކުރި "އެއް ބަޔަކީ އީރާނު މައްސަލަ" ކަމަށެވެ. ވޯލް ސްޓްރީޓް ޖާނަލްއާ ވާހަކަ ދައްކަވަމުން ވެސް އޭނާ ވަނީ އެ ޚިޔާލު ތަކުރާރުކުރައްވާފަ އެވެ. ނަމަވެސް، މިދިޔަ ފެބްރުއަރީ މަހު އީރާނާ ދެކޮޅަށް އަސްކަރީ ފިޔަވަޅު އެޅުމަށް ނިންމެވީ ރަނގަޅު ނިންމެވުމެއް ކަމަށާއި، އަލުން އެފަދަ ހާލަތެއް ދިމާވިޔަސް ހަމަ އެގޮތަށް ނިންމަވާނެ ކަމަށް ޓްރަމްޕް ވިދާޅުވި އެވެ.
ނުވަ މަސް ވަންދެން ދެމިގެންދާ މި ހަނގުރާމައާ ގުޅިގެން ތެލުގެ އަގާއި ދިރިއުޅުމުގެ ހަރަދު އިތުރުވުމަކީ ކެމްޕޭންގެ މައިގަނޑު މައުޟޫއަކަށް ވެފައިވާއިރު، އާއިލާތަކަށް ކުރިމަތިވާ މާލީ ދަތިތަކުގެ ޒިންމާ ޑިމޮކްރެޓުން ވަނީ ސަރުކާރާ ހަވާލުކޮށްފަ އެވެ. އާ ހަނގުރާމައެއް ނުފެށުމުގެ ވައުދާ އެކު ވެރިކަމަށް އައި ޓްރަމްޕްގެ ރިޔާސީ ދައުރުގެ ބާކީ އޮތް މުއްދަތުގައި، ކޮންގްރެސްގެ ކޮންޓްރޯލް ގެއްލުމުން އޭނާގެ ބާރުތަކަށް ބޮޑެތި ހުރަސްތަކެއް އެޅިދާނެ އެވެ.
އިންތިހާބުގެ ނަތީޖާއަށް އީރާނުން މަރުހަބާ ކިޔާފައިވާއިރު، އީރާނުގެ މަޖިލީހުގެ ރައީސް މުހައްމަދު ބާގިރު ގާލީބާފް އެކްސްގައި ލިޔުއްވީ، އެމެރިކާގެ ރައްޔިތުން ހަނގުރާމައަށް "ނޫނެކޭ" ބުނެފި ކަމަށެވެ.
ކޮމެންޓު ފޮނުވާ